نەگە تەمىرتاۋدا ءوتتى دەگەنگە كەلسەك, بۇل مادەني شارانىڭ وتۋىنە وسى قالانىڭ تۇرعىنى, جازۋشىنىڭ شىعارماشىلىعىنا تابىنۋشى تاتيانا روماشيحينا بىردەن ءبىر سەبەپكەر بولعان ەكەن. ياعني, مۇنداعى بارلىق ەكسپوناتتار ونىڭ جەكە كوللەكتسيا قورىنان الىنعان.
تەمىرتاۋ قالالىق تاريحي-ولكەتانۋ مۇراجايىنىڭ قىزمەتكەرلەرى تاتيانا روماشيحينانىڭ ۇيىندە مول كوللەكتسيا بارىن ونىڭ اناسىنان ەستىپ ءبىلىپتى.
– تاتيانا روماشيحينا مەكتەپتە مۇعالىم بولىپ ەڭبەك ەتەدى. ول ءوزىنىڭ وقۋشىلارىن ءبىزدىڭ مۇراجايعا ءجيى اكەلىپ تۇرادى. ءبىز وعان كورمە ۇيىمداستىرساق دەگەن نيەتىمىزدى ايتقانىمىزدا, ول بىردەن قۇپتاپ, ءوز كوللەكتسياسىن ۇسىنۋعا كەلىسىمىن بەردى, – دەيدى تەمىرتاۋ قالالىق تاريحي-ولكەتانۋ مۇراجايىنىڭ اعا عىلىمي قىزمەتكەرى سۆەتلانا ترەششەۆا.
تاتيانا روماشيحينا اتاقتى ەرتەگى جەلىسىمەن كوللەكتسيا جيناۋدى وسىدان ون جىل بۇرىن باستاعان ەكەن. ونىڭ قولىنداعى جادىگەرلەر اراسىندا كوپتەگەن قىزعىلىقتى كىتاپ بار. مىسالى, مۇنداعى ءتۇرلى-ءتۇستى, كوركەم يلليۋستراتسيالارمەن بەزەندىرىلگەن, ورىس تىلىندە جازىلعان سيرەك باسىلىمدار مەن اعىلشىن تىلىندەگى جاسىرىن «تەرەزەلەرى» بار كىتاپتار كىسىنى وزىنە قىزىقتىرا تۇسەدى. ال تاتيانانىڭ ءوزى ەڭ قۇندى جادىگەرلەر رەتىندە كىتاپتىڭ اۋستراليادا وتكەن 150 جىلدىق مەرەيتويىنا دەپ ارنايى شىعارىلعان كۇمىس مەدال مەن ەرتەگى جەلىسى بويىنشا بەزەندىرىلگەن سيرەك ۇستەل ساعاتتارىن اتايدى.
تاتيانا روماشيحينا – ون ساۋساعىنان ونەر تامعان شەبەر ادام. ونىڭ ءوز قولىمەن دەكۋپاج تەحنيكاسى بويىنشا قالپىنا كەلتىرىلگەن جيھازدار, سۇيىكتى تۋىندىسىنىڭ جەلىسى بويىنشا ورىندالعان كەستە جانە كارتينالار دا كەلۋشىلەردىڭ ۇلكەن قىزىعۋشىلىعىن تۋدىردى.
كورمەنى ۇيىمداستىرۋشىلار مۇنداي مادەني شارانىڭ وسكەلەڭ ۇرپاق وكىلدەرىنىڭ كىتاپ وقۋعا دەگەن قۇلشىنىسىن ارتتىرادى دەگەن سەنىمدە.
قاراعاندى وبلىسى
