قازاقستان • 18 اقپان، 2020

كاسپي ماڭى باسسەينىنىڭ تەرەڭ قاباتتارىندا رەسۋرستار بولۋى مۇمكىن

17 رەتكورسەتىلدى

ەلىمىزدە 76 ملرد توننانى قۇرايتىن مۇناي-گاز رەسۋرستارى بار دەپ بولجانۋدا. بۇگىن ۇكىمەت وتىرىسىندا گەولوگيالىق بارلاۋدىڭ 2021-2025 جىلدارعا ارنالعان مەملەكەتتىك باعدارلاماسىنىڭ تۇجىرىمداماسىن تانىستىرعان ەكولوگيا، گەولوگيا جانە تابيعي رەسۋرستار ءمينيسترى ماعزۇم مىرزاعاليەۆ ايتىپ ءوتتى.

«كومىرسۋتەگى تۋرالى ايتار بولساق، ەلىمىزدىڭ 15 شوگىندى باسسەيندەرىندە شامامەن 76 ملرد توننانى قۇرايتىن مۇناي-گاز رەسۋرستارى بار دەپ بولجانۋدا. بۇل شوگىندى باسسەيندەردىڭ گەولوگيالىق زەرتتەلۋ دارەجەسى ءارتۇرلى. ونىڭ بەسەۋى يگەرىلگەن، بەسەۋى از زەرتتەلگەن جانە بەسەۋىنىڭ پەرسپەكتيۆاسى تومەن. كاسپي ماڭى، ءۇستىرت-بوزاشى، ماڭعىشلاق، وڭتۇستىك تورعاي، زايسان باسسەيندەرىنىڭ تەرەڭ قاباتتارىن گەولوگيالىق ىزدەستىرۋ-باعالاۋ جۇمىستارىنا جەكە ينۆەستيتسيالار تارتۋ جوسپارلانۋدا. از زەرتتەلگەن سولتۇستىك-تورعاي، ەرتىس ماڭى، ارال، سىرداريا، شۋ-سارىسۋ شوگىندى باسسەينى اۋماقتارىندا گەولوگيالىق زەرتتەۋدى مەملەكەتتىك بيۋدجەت ەسەبىنەن جۇرگىزۋ قاجەت دەپ ەسەپتەيمىز»، - دەدى مينيستر.

2019 جىلى مەملەكەتتىك بيۋدجەت ەسەبىنەن قاتتى پايدالى قازبالارعا ىزدەۋ جۇمىستارىن جۇرگىزۋ كەزىندە ۇلكەن قاراتاۋدا مۇناي كوزى انىقتالعان بولاتىن. ەندى وسى اۋماقتىڭ دامۋ باعىتىن انىقتاۋ ءۇشىن گەولوگيالىق بارلاۋ جۇمىستارىن ءارى قاراي جالعاستىرۋ كەرەك دەگەن ۇسىنىس ايتتى، ماعزۇم مىرزاعاليەۆ.

«90-شى جىلدارى جۇرگىزىلگەن زاماناۋي سەيسميكالىق زەرتتەۋلەردىڭ ناتيجەسىندە قاشاعان، قالامقاس-تەڭىز، سولتۇستىك ترۋۆا جانە دە باسقا كەن ورىندارى اشىلدى. بۇگىنگى كۇنى ەسكى سەيسميكالىق مالىمەتتەر كوپ بولعانىمەن، ونىڭ ساپاسى مەن ناقتىلىعى قازىرگى تالاپتارعا سايكەس كەلمەيدى. سول سەبەپتى، كاسپي ماڭى باسسەينىنىڭ تەرەڭ قاباتتارىنىڭ الەۋەتى ءالى تولىقتاي باعالانعان جوق. بۇل باسسەين ينۆەستورلار ءۇشىن تارتىمدى ايماق. قازىرگى كەزدە كوپتەگەن وتاندىق جانە شەتەلدىك كومپانيالار وسى باسسەيندە گەولوگيالىق زەرتتەۋ جۇرگىزۋگە دەگەن وزدەرىنىڭ نيەتتەرىن بىلدىرۋدە. سوندىقتان دا، جاڭارتىلعان گەولوگيالىق اقپاراتتى الۋ ءۇشىن زاماناۋي سەيسموبارلاۋ جۇمىستارىن جۇرگىزۋ قاجەت»، - دەدى ەكولوگيا، گەولوگيا جانە تابيعي رەسۋرستار ءمينيسترى.

سوڭعى جاڭالىقتار

ەرلىكتى دارىپتەيتىن قوماقتى قور

رۋحانيات • 05 ماۋسىم، 2020

ۇقساس جاڭالىقتار