بۇگىنگى ۇكىمەت وتىرىسىندا 2021-2025 جىلدارعا ارنالعان گەولوگيالىق بارلاۋدىڭ مەملەكەتتىك باعدارلاماسىنىڭ تۇجىرىمداماسى جايلى تالقىلاندى.
«پرەزيدەنت قاسىم-جومارت توقاەۆتىڭ تاپسىرماسىنا سايكەس گەولوگيالىق بارلاۋدىڭ 2021-2025 جىلدارعا ارنالعان مەملەكەتتىك باعدارلاماسىنىڭ تۇجىرىمداماسى ازىرلەندى. بۇل ماسەلەگە مەملەكەت باسشىسى بىلتىر 5 قىركۇيەكتە اتىراۋ قالاسىندا وتكەن مۇناي-گاز سالاسىنا قاتىستى كەڭەستە باسا نازار اۋداردى. نەگىزى ەلىمىزدە 8 مىڭعا جۋىق كەن ورنى تىركەلگەن. ونىڭ ىشىندە 317 كومىرسۋتەك, ياعني مۇناي, گاز, كوندەنسات كەن ورىندارى بار. مۇنان بولەك, 910 قاتتى پايدالى قازبالار كەن ورنى بولسا, 3 مىڭنان استامى كەڭ تارالعان پايدالى قازبالارعا تيەسىلى. سونىمەن قاتار 4 مىڭعا جۋىعى جەراستى سۋلارى كەن ورنى بار», - دەدى مينيستر.
ونىڭ ايتۋىنشا, بۇگىنگى كۇنى بىرقاتار وزەكتى ماسەلە كۇن تارتىبىندە تۇر. سونىڭ ىشىندە سوڭعى ونجىلدىقتا سارقىلۋى مۇمكىن كەن ورىندارىن قالىپقا كەلتىرۋ جايىندا بولماق.
«اتاپ ايتقاندا, مونوقالالارداعى تاۋ-كەن كاسىپورىندارىنىڭ شيكىزات بازاسىنىڭ تۇراقسىزدىعى, پايدالى قازبا قورلارىنىڭ ازايۋى جانە «بايىرعى» كەن ورىندارىندا ءوندىرۋ كولەمىنىڭ تومەن دەڭگەيگە ءتۇسۋى وزەكتى بولىپ وتىر. مىسالى, قىزىلوردا وبلىسىندا جىل سايىن مۇناي ءوندىرۋدىڭ كولەمى 1 ملن تونناعا دەيىن تومەندەۋدە. وسى ماسەلە تاياۋ ارادا اقتوبە مەن ماڭعىستاۋ وبلىستارىندا دا بولجانۋدا. سوڭعى ون جىلدىقتا شىعىس قازاقستانداعى مونوقالالارعا جاقىن ورنالاسقان – شەمونايحا, يۋبيلەينو-سنەگيريحينسكوە, زىريانوۆسكوە ءىرى قورعاسىن-مىرىش كەن ورىندارىنىڭ قورى تۇگەلدەي تاۋسىلىپ, جابىلدى. 2025-2040 جىلدارعا تامان ورلوۆسكوە, مالەەۆسكوە, تيشينسكوە, ريددەر-سوكولنوە سياقتى كەن ورىندارىندا دا پايدالى قازبا قورلارىنىڭ تولىقتاي سارقىلۋى كۇتىلۋدە», - دەدى ەكولوگيا, گەولوگيا جانە تابيعي رەسۋرستار ءمينيسترى ماعزۇم مىرزاعاليەۆ.
