«مامام كۋبان جەرىندە وسكەن. سوعىس باستالعاندا مامامنىڭ اكەسى افاناسي ترۋش پەن اناسى پراسكوۆيا حمارا ومىرگە اننا, مەنىڭ مامام تاتيانا, ىنىلەرى افاناسي, يۆان, ءسىڭلىسى سوفيانى اكەلگەن بەس بالالى ۋكراين وتباسى بولىپتى. نەمىستەر دەرەۆنياعا باسىپ كىرىپ, اكەسى افاناسي مەن ءىنىسىن كوز الدارىندا اتىپ كەتەدى. ەكىنشى ءىنىسى يۆان قۇتىلىپ شىعادى. مامام سول سوعىس جىلدارىن ەسكە العاندا «دەرەۆنيامنىڭ تاس-تالقانى شىققانى, اكەم مەن ءىنىمنىڭ قازاسى ءۇشىن كەتپەس كەك قالدى جۇرەگىمدە. ءوز ەركىممەن مايدانعا بارۋعا سۇراندىم» دەيتىن», دەپ باستادى ءسوزىن بەگەجانوۆتاردىڭ كىشى قىزى لۋيزا. سويتكەن ت.ترۋش كەيىن 1944 جىلى 20 جاسىندا تيموشەۆسكايا ستانساسىنداعى مايدان گوسپيتالىنە مەدبيكە بولىپ قابىلدانادى.
سەيىت بەگەجانوۆ بولسا 1917 جىلى دۇنيەگە كەلىپ, 1939 جىلى الماتىداعى پەداگوگيكالىق ينستيتۋتتى ءتامامدايدى. پاۆلودار پەداگوگيكالىق ۋچيليششەسىندە ساباق بەرەدى. سوعىس باستالعان كەزدە اسكەر قاتارىنا شاقىرىلىپ, ستالينگراد شايقاسىنا قاتىسادى. 1943 جىلى قىزىل جۇلدىز وردەنىمەن, ءى جانە ءىى دارەجەلى «وتان سوعىسى» وردەنىمەن, بىرنەشە مەدالدارمەن ماراپاتتالادى. باتالون كومانديرى بولىپتى.
تاتيانا 4-ءشى ۋكراين مايدانىنا قاتىسۋشىلار قۇرامىندا گوسپيتالگە مەدبيكە بولىپ كەلەدى. «سنارياد, بومبا جارىلىسى قۇلاعىمنان كۇنى بۇگىنگە دەيىن كەتپەيدى. شابۋىل ءجۇرىپ جاتقان ايماقتان جارالىلاردى الىپ شىعۋعا جۇگىرەمىز. كوز الدىمدا تالاي جاۋىنگەر مەرت بولدى» دەپ ەسكە الاتىن مامامىز», دەيدى لۋيزا.
...1944 جىلى گوسپيتالدى رۋمىنيانىڭ سەناي ستانساسىنا كوشىرەدى. تاتيانا ترۋش مەدسەسترا بولىپ جۇرگەن گوسپيتالدى كەرچەن بۇعازى ارقىلى رۋمىنيانىڭ سيگات قالاشىعىنا جەتكىزەدى. وسى قالاشىقتى قورعايمىن دەپ ءجۇرىپ ۇرىستا س.بەگەجانوۆ اۋىر جارالانادى. «جولداس كاپيتان! ءسىز جارالىسىز! سانيتارلىق ينسترۋكتور ترۋشپىن», دەگەن مەدبيكە قىزدىڭ داۋىسىن ەستيدى. ت.ترۋش بولسا باتالون كومانديرى س.بەگەجانوۆتى سۇيرەگەن كۇيى گوسپيتالگە جەتكىزىپتى. مايداندا تۋعان ماحاببات تاعدىرى وسىلاي باستالادى.
گوسپيتالدە كەشكىلىك بي كەشى وتەدى ەكەن. «سانباتتا» جاتىپ ەمدەلىپ شىققان كاپيتان س.بەگەجانوۆ ءبىر كۇنى ت.ترۋشتى بيگە شاقىرادى. جاس مەدبيكە كومباتپەن بيلەۋگە جۇرەكسىنگەندىكتەن, ونىڭ قۇربىسىن قۇشاقتاي الىپ, بيلەپ كەتەدى. «قاراسام, ەكى كوزى مەندە. سودان بي كەشىنەن سوڭ كەزدەستىك. ارادا ءبىر ايداي ۋاقىت وتكەندە كومبات ماعان ءسوز سالدى. اكەلەرىڭە كەلىسىم بەرىپ, قوسىلدىق تا, ەسقارادان كەلىپ بىراق شىقتىم عوي!» دەپ ەسكە الۋشى ەدى مامام», دەيدى لۋيزا.
سەيىت اتامىز ۋكراين قىزىمەن قوسىلىپ, ۇيلەنگەندەرىن ايتىپ, اكەسىنە حات جازادى. سوعىس اياقتالعان سوڭ جاس جۇبايلار 1946 جىلى پاۆلودارعا كەلىپ جەتەدى. اۋىل تۇرعىندارى تانيا كەلىندەرىن كورىپ, كوڭىلدەرى تولادى. ۋاقىت وتە كەلە ت.ترۋش اۋىلدا دارىگەرلىك قىزمەت اتقاردى. ولاردىڭ شاڭىراعىندا جۇماباي, ماكسيم, ەركىنباي, مارات, مۇرات, بولات ەسىمدى 6 ۇل, الما, روزا, سۆەتلانا, لۋيزا اتتى 4 قىز دۇنيەگە كەلەدى. بەگەجانوۆتار اۋلەتىنەن بۇگىندە 27 نەمەرە, 8 شوبەرە ءوربىپ وتىر. 1967 جىلى 3 شىلدەدە ت.ترۋشكە «باتىر انا» اتاعى بەرىلدى.
بالا-شاعانىڭ قىزىعىنا قانىپ, اۋلەتىنىڭ ماۋەلى بايتەرەگىندەي بولعان سەيىت اتامىز وكىنىشكە قاراي, 1990 جىلى ومىردەن ءوتتى. 2004 جىلى ەلباسى ن.نازارباەۆتىڭ جارلىعىمەن ت.بەگەجانوۆا اپامىزعا «التىن القا» تابىستالدى. اراعا جىل سالىپ, 2005 جىلى سول كەزدەگى ۋكراينا پرەزيدەنتى ل.كۋچما ت.بەگەجانوۆانى «60 روكىۆ ۆيزۆولەنننيا ۋكراىني ءۆىد فاشيستسكيح زاگاربنيكىۆ» دەگەن مەدالمەن ماراپاتتادى.
ءومىردىڭ اششى-تۇششىسىن ءبىر كىسىدەي كورىپ, ۇلگى تۇتار ۇرپاق وسىرگەن تانيا اجەي 87 جاسقا كەلگەن شاعىندا ومىردەن وزدى. ء«يا, مامام مارقۇم, ەسقارا اۋىلىنىڭ تانا اجەيى ەدى. اۋىلداس اعامىز تەمىرحان رامازانوۆ مايداندا تۋعان اكە-شەشەمىزدىڭ ماحابباتى جايلى جازدى. سوعىس كەزىندە اكەم مەن شەشەمدى تابىستىرعان ءمولدىر سۇيىسپەنشىلىك, ماحابباتتان ءبىز ومىرگە كەلدىك قوي. قايتىس بولعاندا تانا يساحمەت كەلىنى دەپ جازىپ, زيراتىنا جەرلەدىك. اكەمنىڭ جانە ەنەسىنىڭ قاسىندا قاتار جاتىر. مەن دە, اعا-اپايلارىم دا كراسنودار ولكەسىندە, كيەۆتە تۇراتىن شەشەمنىڭ تۋىسقاندارىمەن ارالاسىپ تۇرامىز. بالا كەزىمىزدە جازعى دەمالىس كۇندەرىن پايدالانىپ, كراسنودار مەن كيەۆكە ءجيى باراتىنبىز», دەيدى لۋيزا.
سوعىس ءورتىن كورگەن ماحاببات تاعدىرى مىنە, وسىنداي. سەيىت بەگەجانوۆ پەن ومىرگە 10 بالا اكەلگەن تانيا اجەمىزگە ارناپ, اكىمدىك تاراپى ەسقارا اۋىلىندا, اۋدان ورتالىعى جەلەزينكا اۋىلىندا مەموريالدىق تاقتا, ماحابباتتىڭ, ەرلىكتىڭ سيمۆولى رەتىندە ەسكەرتكىش ورناتسا – ۇرپاق اتىنان جاسالعان تاعزىمنىڭ ۇلىق ۇلگىسى بولار ەدى دەيمىز.
پاۆلودار وبلىسى,
جەلەزين اۋدانى
