ەكونوميكا • 17 اقپان، 2020

تاۋارلار، جۇمىستار مەن قىزمەتتەردى ساتىپ الۋداعى جەرگىلىكتى قامتۋ ۇلەسى 3،2% ارتتى

98 رەتكورسەتىلدى

جەرگىلىكتى قامتۋ بويىنشا مونيتورينگ شەڭبەرىندە مەملەكەتتىك ورگاندار، ۇلتتىق كومپانيالار مەن حولدينگتەر، جەر قويناۋىن پايدالانۋشىلار سياقتى بارلىق مونيتورينگ سۋبەكتىلەرىنىڭ تاۋارلاردى، جۇمىستار مەن قىزمەتتەردى ساتىپ الۋىنىڭ جالپى كولەمى 2019 جىلدىڭ 9 ايىندا 13 559،4 ملرد تەڭگەنى قۇرادى. ونىڭ ىشىندە جەرگىلىكتى قامتۋ ۇلەسى - 7 117،7 ملرد تەڭگە نەمەسە 52،5% تەڭ. وتكەن جىلدىڭ ءتيتىستى كەزەڭىمەن سالىستىرعاندا جالپى كولەمى 1 283،8 ملرد تەڭگەگە، ال جەرگىلىكتى قامتۋ ۇلەسى 3،2%  ءوستى. بۇل تۋرالى يندۋستريا جانە ينفراقۇرىلىمدىق دامۋ مينيسترلىگىنىڭ ءباسپاسوز قىزمەتى حابارلادى.

جەرگىلىكتى قامتۋ باعىتىنداعى وڭىرلەر رەيتينگىسىنە جۇرگىزىلگەن تالداۋعا سايكەس الماتى وبلىسى (59،6 %)، الماتى قالاسى (47،7 %)، سولتۇستىك قازاقستان وبلىسى (47،6 %) جانە نۇر-سۇلتان قالاسى (43،3%) الدا كەلەدى.

قازاقستاندىق قامتۋدى دامىتۋ باعدارلاماسى جاڭا وندىرىستەردىڭ ءوسۋىن ىنتالاندىرۋعا، ءبىلىم مەن تەحنولوگيالار ترانسفەرتىن جانداندىرۋعا، جاڭا جۇمىس ورىندارىن اشۋعا باعىتتالعان. باعدارلامانى ىسكە اسىرۋ ينفراقۇرىلىمدىق وزگەرىستەرگە، جۇمىسپەن قامتۋ دەڭگەيىن جانە وتاندىق ماماندار قۇزىرەتىن ارتتىرۋعا مۇمكىندىك بەرەدى. جەرگىلىكتى قامتۋ ۇلەسىن ارتتىرۋ جانە وتاندىق وندىرۋشىلەردى دامىتۋ ماقساتىندا قر يندۋستريا جانە ينفراقۇرىلدىمدىق دامۋ مينيسترلىگى بىرقاتار شارا قابىلدادى. اتاپ ايتقاندا، ەۋرازيالىق ەكونوميكالىق وداق تۋرالى شارت شەڭبەرىندە وتاندىق ءوندىرىستىڭ اۆتوموبيلدەرىن، ترانسفورماتورلارى مەن كابەل جەلىلەرىن مەملەكەتتىك ساتىپ الۋدى جۇزەگە اسىرۋ كەزىندە 2 جىل مەرزىمگە ۇلتتىق رەجىمنەن الىپ تاستاۋ بەلگىلەنگەن. جەرگىلىكتى اتقارۋشى ورگاندار ءۇشىن جەڭىل، جيھاز ونەركاسىبى مەن قۇرىلىس ماتەريالدارىن مەملەكەتتىك ساتىپ الۋداعى جەرگىلىكتى قامتۋ بويىنشا نىسانالى ينديكاتورلار بەلگىلەندى. جەڭىل جانە جيھاز ونەركاسىبى تاۋارلارى 2019 جىلعى 1 شىلدەسىنەن باستاپ مەملەكەتتىك ساتىپ الۋلار الدىن الا بىلىكتىلىك سۇرىپتاۋمەن كونكۋرس تاسىلىمەن وتكىزىلەتىن تاۋارلار، جۇمىستار مەن قىزمەتتەر تىزبەسىنە ەنگىزىلگەن. بۇل رەتتە الەۋەتتى ءونىم بەرۋشىلەر ءۇشىن يندۋستريالىق سەرتيفيكاتىن ۇسىنۋ تالابى مىندەتتى.

«اتامەكەن» ۇلتتىق كاسىپكەرلىك پالاتاسىمەن بىرلەسىپ 2019 جىلعى ساتىپ الۋ تالداۋىنىڭ قورىتىندىسى بويىنشا جەڭىل ونەركاسىپتەگى جەرگىلىكتى قامتۋ ۇلەسى-47%، جيھازدا - 56%، قۇرىلىس ماتەريالدارى وندىرىسىندە - 50% قۇرادى.

سونىمەن قاتار، شارتتى شىعارۋعا جول بەرىلمەيتىن ءونىم تىزبەسى كەڭەيتىلدى. وعان ماشينا جاساۋ، جەڭىل جانە جيھاز ونەركاسىبى، قۇرىلىس ماتەريالدارى ەنگىزىلگەن.

كولىك قۇرالىن (جەڭىل اۆتوموبيل) ساتىپ الۋ ءۇشىن ۇلگىلىك كونكۋرستىق جانە اۋكتسيوندىق قۇجاتتاما بەكىتىلدى.

سونىمەن قاتار، ىشكى نارىقتى قورعاۋ، وتاندىق تاۋار وندىرۋشىلەردى قولداۋ جانە جەڭىل ونەركاسىپ، جيھاز سالاسى مەن تسەمەنت ونىمدەرى سالاسىندا ءوندىرىس كولەمىن ۇلعايتۋ ماقساتىندا جەڭىل، جيھاز ونەركاسىبى مەن قۇرىلىس ماتەريالدارىنىڭ جەكەلەگەن تاۋارلارىن 2 جىل مەرزىمگە مەملەكەتتىك ساتىپ الۋدى جۇزەگە اسىرۋ كەزىندە ۇلتتىق رەجيمنەن الىپ تاستاۋ بويىنشا جۇمىس جۇرگىزىلىپ جاتىر. بۇل شارا مەملەكەتتىك ساتىپ الۋعا قاتىسۋعا يمپورتتىق ءوندىرىستىڭ بىرقاتار ءونىمىن (ش ۇلىق، كيىز اياق كيىم، كەڭسەلىك جيھاز جانە تسەمەنتتەر) جىبەرۋدى شەكتەۋگە مۇمكىندىك بەرەدى.

سوڭعى جاڭالىقتار

ۇقساس جاڭالىقتار