قازاقستان • 17 اقپان، 2020

قازاقستان اۋەجايلارىندا جولاۋشىلارعا قىزمەت كورسەتۋ ساپاسى ارتادى

18 رەتكورسەتىلدى

بۇگىن قازاقستاننىڭ اۆياتسيالىق اكىمشىلىگىندە جولاۋشىلارعا قىزمەت كورسەتۋ ساپاسىن ارتتىرۋ، قازاقستان اۋەجايلارىنداعى قىزمەتتەردىڭ قولجەتىمدىلىگى جانە e-Freight جوباسىنا قاتىستى كەزدەسۋ ءوتتى. بۇل تۋرالى يندۋستريا جانە ينفراقۇرىلىمدىق دامۋ مينيسترلىگىنىڭ ءباسپاسوز قىزمەتى حابارلادى.

ءىس-شاراعا قر يدم ازاماتتىق اۆياتسيا كوميتەتىنىڭ وكىلدەرى، وتاندىق اۋەجايلاردىڭ تاسىمالداۋ قىزمەتتەرىنىڭ باسشىلارى، «Air Astana»، «Scat»، «Fly Arystan»، «Qazaq Air» اۋە كومپانيالارىنىڭ جانە «TransInfoTech» جشس جولاۋشىلارعا قىزمەت كورسەتۋگە جاۋاپتى وكىلدەرى قاتىستى.

وتىرىس بارىسىندا جولاۋشىلاردى تىركەۋ جانە وتىرعىزۋ پروتسەدۋرالارى كەزىندە جولاۋشىلارعا قىزمەت كورسەتۋدى جاقسارتۋ شارالارى، رەيستەردىڭ كەشىگۋ جانە كەيىنگە قالدىرۋ كەزىندەگى تاسىمالداۋشىلاردىڭ جاۋاپكەرشىلىگى، سونداي-اق انا مەن بالاعا ارنالعان بولمە، جۇكتى ساقتاۋ كامەراسى، دارەتحانا، سىمسىز ينتەرنەت (Wi-Fi) سياقتى جولاۋشىلار تەرمينالدارىنداعى قىزمەتتەردىڭ جەكەلەگەن تۇرلەرىنىڭ قولجەتىمدىلىگى تالقىلاندى. اۋەجايلار مەن اۋە كومپانيالارى قىزمەتكەرلەرىنىڭ قارىم-قاتىناس مادەنيەتى، قىزمەتكەرلەردىڭ سىرتقى كەلبەتى، اقپاراتتىق قامتاماسىز ەتۋ سياقتى اسپەكتىلەردىڭ ماڭىزدىلىعى اتاپ ءوتىلدى.

مۇمكىندىگى شەكتەۋلى جولاۋشىلارعا، ونىڭ ىشىندە مەنتالدىق اۋىتقۋلارى بار جولاۋشىلارعا قىزمەت كورسەتۋگە ەرەكشە نازار اۋدارىلدى. مۇگەدەكتەرگە ارنالعان اربالارىنىڭ بولۋى، سونداي-اق اۋە كەمەسىنىڭ بورتىنا تاسىمالداۋ، كوتەرۋ،ءتۇسىرۋ ءۇشىن ارنايى كولىكتەر پەن مەحانيزمدەردىڭ بولۋى تالقىلاندى.

«TransInfoTech» جشس وكىلدەرىمەن بىرلەسىپ قازاقستانداعى كولىكتى تسيفرلاندىرۋ سالاسىنداعى E-Freight العاشقى مەملەكەتتىك-جەكەمەنشىك ارىپتەستىك جوباسىن ىسكە اسىرۋ بويىنشا بىرقاتار ماسەلەلەر قارالدى. «ە-freight» جوباسىن ىسكە اسىرۋ جۇكتەردى اۋە كولىگىمەن تاسىمالداۋ كەزىندە قۇجاتتاردى راسىمدەۋدىڭ تيىمدىلىگىن ارتتىرۋعا مۇمكىندىك بەرەدى (20-عا جۋىق قاعاز قۇجاتتى ەلەكتروندىق فورماتقا اۋىستىرۋ)، جۇكتەردى اۋە كولىگىمەن تاسىمالداۋ اعىندارىن وڭدەۋ مەرزىمىن قىسقارتادى (جۇكتەردى وڭدەۋ مەرزىمىن ورتا ەسەپپەن 1 كۇننەن 1 ساعاتقا دەيىن قىسقارتادى)  جانە قازاقستان رەسپۋبليكاسىنىڭ اۋماعى ارقىلى جۇكتەردى اۋە كولىگىمەن تاسىمالداۋ مەن ءترانزيتتىڭ تارتىمدىلىعىن ارتتىرۋعا مۇمكىندىك بەرەدى. كەزدەسۋ اياسىندا جۇكتەردى وڭدەۋ پروتسەسىنە قاتىساتىن اۋەجاي قىزمەتكەرلەرىنە ارنالعان باعدارلامامەن جۇمىس ىستەۋ بويىنشا ترەنينگ وتكىزىلدى.

وتىرىس قورىتىندىسىندا قازاقستان اۋەجايلارىنىڭ، اۋە كومپانيالاردىڭ جانە اۆياتسيالىق اكىمشىلىك وكىلدەرى بارلىق ساناتتاعى  جولاۋشىلار ءۇشىن اۋە كولىگىمەن تاسىمالداۋدىڭ قاجەتتى جاعدايلاردىن جاساۋ بويىنشا بىرلەسكەن ءوزارا ءىس-قيمىل تۋرالى شەشىم قابىلدادى.

سوڭعى جاڭالىقتار

ۇقساس جاڭالىقتار