پارلامەنت • 17 اقپان، 2020

سەرىك جاقسىبەكوۆ بيزنەس وكىلدەرىنە: ماسەلەنى بىرگە شەشەيىك

32 رەتكورسەتىلدى

پارلامەنت سەناتىنىڭ ەكونوميكالىق ساياسات، يننوۆاتسيالىق دامۋ جانە كاسىپكەرلىك كوميتەتى اتىراۋدا كوشپەلى وتىرىس وتكىزدى. وعان وبلىس باسشىلىعى مەن كاسىپكەرلىك سەكتور وكىلدەرى قاتىستى. بۇل تۋرالى پارلامەنت سەناتىنىڭ ءباسپاسوز قىزمەتى حابارلادى. 

سەنات دەپۋتاتتارى ساپار بارىسىندا ءجۇن ونىمدەرىن شىعاراتىن «Caspiy Lana Atyrau» فابريكاسىنىڭ جۇمىسىمەن تانىستى. ءوندىرىس ورنىندا اياق كيىم، ارنايى كيىمدەر، مەكتەپ فورماسى مەن قوي جانە تۇيە جۇنىنەن كورپە جاسالادى. ونەركاسىپ ديرەكتورى نازگۇل ەسماحانوۆانىڭ ايتۋىنشا، قازىرگى ۋاقىتتا ءونىمدى شىعارۋ مەن شيكىزاتتى جەتكىزۋدەگى قيىندىقتارعا بايلانىستى فابريكا 30% پايىز قۋاتتىندا عانا جۇمىس ىستەۋگە تۋرا كەلۋدە.  

سەنات دەپۋتاتى سەرىك جاقسىبەكوۆ ەڭ الدىمەن ماركەتينگ جانە ءونىمدى ساتۋ ستراتەگياسى بويىنشا جۇمىس ىستەۋ كەرەكتىگىن اتاپ ءوتتى. سونىمەن قاتار كاسىپورىن ءوز الەۋەتىن تولىق پايدالانۋ ءۇشىن ءۇشىن قۇرىلتايشىلار مەن الەۋمەتتىك-كاسىپكەرلىك كورپوراتسيالار ءتۇرلى تاسىلدەردى پايدالانا وتىرىپ، باسقارۋ ساياساتىن وزگەرتۋ قاجەتىگى ايتىلدى.

سەناتورلار اتىراۋ وبلىستىق جەڭىل ونەركاسىپ تاۋار ونىمدەرىنىڭ جارمەڭكەسىنە دە قاتىستى.

جيىنعا قاتىسۋشىلار مەملەكەت تاراپىنان ءجۇن وندىرىسىنە سۋبسيديا بەرىلمەيتىنىن، ءجۇن شيكىزاتى نارىعى مەن دايىن ءجۇن ونىمدەرىن وتكىزۋ ورىندارىنىڭ جوقتىعىن كاسىپورىندار جۇمىسىنداعى باستى پروبلەمالاردىڭ ءبىرى رەتىندە اتاپ ءوتتى.

سەرىك جاقسىبەكوۆ وتىرىستى قورىتىندىلاي كەلىپ، بيزنەس وكىلدەرىنە تەك مەملەكەتتىك تاپسىرىسقا عانا سەنىم وتىرماۋ قاجەتتىگىن ايتىپ ءوتتى. «مەملەكەتتىك جانە قورعانىستىق تاپسىرىسقا قاتىستى ماسەلەلەر جەتكىلىكتى. ەگەر مەملەكەتتىك تاپسىرىسقا عانا سەنىم ارتىپ وتىرساق بيزنەس جۇرمەيدى. ءبىر بيزنەسمەن ءوزىنىڭ 15 كەرەمەت جوباسى بار ەكەنىن ايتىپ، بىراق ونى جۇزەگە اسىراتىن قارجىنىڭ جوق ەكەنىن ايتتى. وعان ينۆەستوردى مەملەكەت تاۋىپ بەرۋ كەرەك. بۇدان ءىس ونەدى مە؟ ءيا، جالپى قولداۋ كورسەتۋدىڭ ءتۇرى بار، بىراق بۇل ءسىز ءۇشىن بىرەۋ جۇمىس ىستەيدى دەگەن ءسوز ەمەس. ونەركاسىپ ءوز ىشىندە قايتا باعامداۋ قاجەت. جالپى، زاڭنامالىق قۇجاتتارعا بىرقاتار وزگەرىستەر ەنگىزەتىن ۋاقىت كەلدى. وسىعان قاتىستى وڭىرلەرگە شىعىپ، وي-پىكىرلەردى سارالاپ كەلەمىز. بىرگە جۇمىس ىستەپ، ماسەلەنى بىرگە شەشەيىك. بىزگە ديالوگ كەرەك»، - دەدى س. جاقسىبەكوۆ.

سوڭعى جاڭالىقتار

ۇقساس جاڭالىقتار