كينو • 17 اقپان، 2020

شاكەن ايمانوۆتىڭ فيلمدەرىن Youtube جەلىسىنەن كورۋگە بولادى

42 رەتكورسەتىلدى

«قازاقفيلم» كينوستۋدياسى قازاق كينوسىنىڭ ساڭلاعى، كسرو حالىق ءارتيسى شاكەن ايمانوۆتىڭ تۋعان كۇنىنە وراي ھاس شەبەردىڭ اكتەرلىك جانە رەجيسسەرلىك جۇمىستارىن YouTube جەلىسىندەگى رەسمي ارناسىنا جۇكتەدى. بۇل تۋرالى «قازاقفيلم» كينوستۋدياسىنىڭ پرەزيدەنتى، قازاقستاننىڭ ەڭبەك سىڭىرگەن قايراتكەرى ارمان اسەنوۆ حابارلادى.

- كينوستۋديانىڭ رەسمي الەۋمەتتىك جەلىلەرىندە وتاندىق فيلمدەردى عالامتوردان قالاي كورۋگە بولاتىنى تۋرالى ءجيى سۇرايدى. ءبىز YouTube جەلىسىندەگى ارنامىزدى ۇنەمى جاڭارتىپ وتىرۋعا تىرىسامىز. سوندىقتان دا قازاق كينوسىنىڭ كلاسسيگى شاكەن كەنجەتاي ۇلى قاتىسقان بارلىق فيلمدەردى youTube جەلىسىنە جۇكتەپ، بارلىق قازاقستاندىقتارعا وسىنداي سىيلىق جاساۋدى شەشتىك، - دەدى ول. 

ارمان اسەنوۆ ودان بولەك، «قازاقفيلم» كينوستۋدياسى قازاق كينوسىنىڭ التىن قورىنا ەنگەن باسقا دا فيلمدەردى وزىنىڭ youtube جەلىسىندەگى رەسمي ارناسىنا جۇكتەۋدى جوسپارلاپ وتىرعانىن ايتتى.

ەستەرىڭىزگە سالا كەتسەك، بىلتىر قازان ايىندا رەسمي youtube-ارناسىنا تاۋەلسىزدىك جىلدارى جارىق كورگەن 4 تولىقمەتراجدى جانە 15 قىسقامەتراجدى انيماتسيالىق فيلمدەر جۇكتەلگەن بولاتىن.

سوڭعى جاڭالىقتار

ۇقساس جاڭالىقتار