ايماقتار • 17 اقپان، 2020

قۇجاتتارى ءمىنسىز، ىستەرى ءونىمسىز

149 رەتكورسەتىلدى

بيىلعى جىلدىڭ قىس ايلارى دا اياقتالىپ كەلەدى. قىستىڭ اتى -  قىس. ونىڭ بورانى مەن بۇرقاسىنى، قارى مەن كوكتايعاعى ءبىر-بىرىمەن الماسىپ كەلىپ تۇرادى. وسىنداي تابيعات قۇبىلىستارىنان كەيىن ىلە-شالا تازالاۋ جۇمىستارى نەمەسە كوكتايعاقتىڭ قاتەرىن جويۋ جونىندەگى شارالار جۇرگىزىلمەسە، تۇرعىنداردىڭ تايىپ جىعىلىپ، اياق-قولىن سىندىرىپ الۋى ابدەن مۇمكىن. سولاي بولىپ تا ءجۇر. ونىڭ الدىن الۋدىڭ باستى ءبىر جولى كوشەلەردەگى قاردى تيەپ، قالانىڭ سىرتىنا تاسىمالداۋ جانە مۇزداقتىڭ ۇستىنە قۇم، نەمەسە تۇز سەبۋ جۇمىستارىن جۇيەلى تۇردە جۇرگىزۋ بولماق.

ايتسە دە اقتوبە قالاسىندا بۇلاي بولماي وتىر. اقتوبە قالالىق اكىمدىگى تاراپىنان اتالعان ىستەردى اتقارۋمەن اينالىساتىن مەردىگەردىك كومپانيالارعا قويىلاتىن تالاپتىڭ تومەندىگىنەن كوكتايعاق قاتەرى تىيىلار ەمەس. سونىڭ سالدارىنان تۇرعىندار ءارتۇرلى جاراقاتتار الىپ، وقۋشىلار مەكتەپتەرىنە جەتە الماي، قۇلاپ-ءسۇرىنىپ جاتىر.

وبلىس ورتالىعىندا قالا كوشەلەرىن قاردان جانە كوكتايعاقتان تازالاۋ جۇمىستارىن سەگىز كومپانيا مەملەكەتتىك ساتىپ الۋلار كەزىندە ۇتىپ الىپتى. سول ۋاقىتتا قۇجاتتارىندا ەشقانداي ءمىن بولماسا، كەيىننەن «تۇيەلەرىن كوپىردەن وتكىزىپ العان» سوڭ ولار جۇمىسشىلار سانىنىڭ ازدىعىن جانە تەحنيكا جەتىسپەۋىن كولدەنەڭ تارتىپ ءارت ۇلى سىلتاۋلاردى قاپتاتىپ جىبەرگەن. بۇگىنگى كەزدە مەملەكەت قارجىسىن تاقىمدارىنا باسىپ العان «اۆتولاين»، «تابىس ەل»، «بوشان ترانس اۆتو»، «ەرحات جولدارى»، «كوكۆەست»، «بارلىق قۇرىلىس» جشس كومپانيالارى جالپى كولەمى 5،5 ميلليون شارشى مەتر قۇرايتىن 711 كوشەنى قار مەن كوكتايعاقتان ارشۋى ءتيىس. ايتسە دە ولاردىڭ قازىرگى ءىس-قيمىلدارى ماردىمسىز، ءونىمسىز، ءتىپتى جوققا ءتان ەكەنى قالا تۇرعىنداارىنىڭ ورىندى وكپە-رەنىشتەرىن تۋعىزىپ ءجۇر.

اقتوبە قالاسىندا وتكىزىلەتىن مەملەكەتتىك ساتىپ الۋ جونىندەگى كونكۋرستار كەزىندە مەملەكەت قارجىسى وسىلاي تەكتەن-تەككە شاشىلىپ كەتە بەرە مە؟ تالاس جوق، بۇل جاعدايدا جەرگىلىكتى اتقارۋشى ورگاندلار تاراپىنان بەلگىلى ءبىر كومپانيالارعا قويىلاتىن تالاپتىڭ تومەندىگى مەن كەلىسىمشارتتاردىڭ بوساڭ، جالپىلاما جاسالعاندىعى ايقىن كورىنەدى. بۇنىڭ ءوزى ەڭ الدىمەن اقتوبە قالاسىنىڭ اكىمى ماۆر ءابدۋلليننىڭ قىزمەتىنە ۇلكەن سىن بولماق. سوندىقتان دا الداعى ۋاقىتتا مۇنداي ۇستىرتتەر مەن ولقىلىقتاردان ساباق الىنىپ، ءاربىر مەردىگەر كومپانيانىڭ اتقاراتىن قىزمەتىنىڭ اتقاراتىن قىزمەتىنىڭ اۋقىمى مەن كولەمى ناقتى كورسەتىلسە، ەنجارلىق مەن سىلبىرلىق جانە سالدىر-سالاقتىق كورىنىستەرى قايتالانباسى حاق.

ال ازىرگە وڭىردە قوماقتى كولەمدەگى مەملەكەت قاراجاتىن كونكۋرس ارقىلى يەمدەنىپ، سوعان ساي ءتيىستى قىزمەتتەرىن اتقارماعان مەردىگەر ۇيىمداردىڭ قىزمەتى الاياقتىق ارەكەتپەن تەڭ ءارى سوعان پاراپار قۇبىلىس رەتىندە باعالانىپ وتىر.

اقتوبە

سوڭعى جاڭالىقتار

ۇقساس جاڭالىقتار