قوعام • 17 اقپان، 2020

قازاقستاندىقتاردىڭ ەڭبەك قۇقىقتارى قالاي قورعالادى؟

82 رەتكورسەتىلدى

ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ ەڭبەك قاۋىپسىزدىگى مەن ەڭبەكتى قورعاۋدى باقىلاۋدى جانە قازاقستاندىقتاردىڭ ەڭبەك قۇقىقتارىن قورعاۋدى قامتاماسىز ەتۋدىڭ جاڭا تاسىلدەرىن اتاپ ءوتتى. بۇل تۋرالى ەڭبەك جانە حالىقتى الەۋمەتتىك قورعاۋ مينيسترلىگىنىڭ ءباسپاسوز قىزمەتى حابارلادى.

مينيستر ەڭبەكمينى تۇراقتى نەگىزدە ەڭبەك زاڭناماسىنىڭ ساقتالۋىنا مونيتورينگ جانە باقىلاۋ جۇرگىزىلەتىنىن حابارلادى. سونىمەن قاتار 2019 جىلى 9،5 مىڭ جۇمىس بەرۋشىنى تەكسەرۋ ناتيجەلەرى بويىنشا 11،3 مىڭنان استام بۇزۋشىلىق جويىلدى. 41 مىڭنان استام قىزمەتكەردىڭ قۇقىقتارى قورعالدى، ولارعا ەڭبەكاقى بويىنشا 5،4 ملرد تەڭگەدەن استام بەرەشەك تولەندى.

سونىمەن قاتار جالاقى بويىنشا بەرەشەك پروبلەماسى ءالى دە ساقتالۋدا. وسىلايشا، 31 قاڭتارعا بەرەشەك 89 كاسىپورىندا 1،2 ملرد تەڭگەنى قۇرادى. بانكروتقا ۇشىراعان نەمەسە وڭالتۋداعى 53 كاسىپورىندا 755 ملن تەڭگەنى قۇراعان بەرەشەك ەرەكشە الاڭداۋشىلىق تۋدىرادى.

«ەڭبەك قاۋىپسىزدىگى مەن ەڭبەكتى قورعاۋدى قامتاماسىز ەتۋ تاعى ءبىر ماڭىزدى ماسەلە بولىپ تابىلادى. قازاقستاندا 2019-2023 جىلدارعا ارنالعان وندىرىستىك جاراقاتتانۋ مەن ەڭبەك جاعدايلارى زياندى جۇمىس ورىندارىن ازايتۋ جونىندەگى جول كارتاسى ىسكە اسىرىلۋدا. 2،6 مىڭنان استام كاسىپورىن حالىقارالىق ستاندارتتاردى ەنگىزدى، 2 مىڭنان استام وندىرىستىك وبەكت اتتەستاتتالدى. ىشكى باقىلاۋدى 15 مىڭنان استام وندىرىستىك كەڭەس جۇزەگە اسىرادى. ناتيجەسىندە جازاتايىم وقيعالار سانى 8،8%-عا تومەندەدى. زارداپ شەككەندەر سانى 1 430 ادامدى قۇرادى (2018 جىلى – 1568 ادام)، ونىڭ ىشىندە ولىممەن اياقتالعان 180 ادام (2018 جىلى - 220 ادام)»، – دەدى ءبىرجان نۇرىمبەتوۆ.

ول سونداي-اق 2019 جىلعى 17 ماۋسىمدا جەنەۆادا ەڭبەكمينى حالىقارالىق الەۋمەتتىك قامسىزداندىرۋ قاۋىمداستىعىمەن «Vision Zero» نولدىك جاراقاتتانۋ تۇجىرىمداماسىن ىلگەرىلەتۋ تۋرالى مەموراندۋم جاسالعانىن ايتتى.

«رەسپۋبليكانىڭ 137 كاسىپورنى وسى تۇجىرىمداماعا قوسىلدى. بۇل جۇمىستى بارلىق وڭىرلەردە جانداندىرۋ كەرەك. وبلىس اكىمدەرىنىڭ ورىنباسارلارىن ەڭبەكتى قورعاۋ، جالاقى بويىنشا بەرەشەكتى باقىلاۋ ماسەلەلەرىن باقىلاۋعا الۋدى سۇرايمىن»، – دەپ اتاپ ءوتتى مينيستر.

ول سونداي-اق 2019 جىلدىڭ مامىر ايىندا ەڭبەك جانجالدارىنىڭ الدىن الۋ جانە شەشۋ بويىنشا كەشەندى جوسپار قابىلدانعانىن ەسكە سالدى.

2020 جىلعى 1 قاڭتاردا ۇجىمدىق شارتتارمەن ءىرى جانە ورتا كاسىپورىنداردىڭ 96،5%-ى جانە شاعىن كاسىپورىنداردىڭ 42،7%-ى قامتىلعان. قىزمەتكەرلەردى قىسقارتۋعا جول بەرمەۋ ماقساتىندا اكىمدىكتەر مەن وڭىرلەر كاسىپورىندارى اراسىندا ءوزارا ىنتىماقتاستىق تۋرالى مەموراندۋمدار جاسالادى.

باس پروكۋراتۋرامەن بىرلەسىپ شەتەلدىك جۇمىس كۇشىن (بۇدان ءارى – شجك) تارتاتىن كاسىپورىنداردى تەكسەرۋ اياقتالدى، قاجەتتى اكىمشىلىك شارالار قابىلداندى.

«2020 جىلى شجك تارتۋعا رۇقسات بەرۋدىڭ الدىن الۋ جانە ءتارتىبىن كۇشەيتۋ ءۇشىن جۇمىس بەرۋشىلەردىڭ قىزمەتكەرلەرگە تەڭ سانيتارلىق-تۇرمىستىق جاعداي جاساۋ جونىندەگى مىندەتىن جانە اكىمشىلىك جاۋاپكەرشىلىكتى بەلگىلەۋدى جوسپارلاپ وتىرمىز. تاۋەكەل دارەجەسىن باعالاۋ كريتەريلەرىنە جانە تەكسەرۋ پاراقتارىنا وزگەرىستەر ەنگىزىلەتىن بولادى. بۇل جىل سايىن  قىزمەتكەرلەرىنىڭ سانى 250 ادامنان اساتىن، 30-دان استام شەتەلدىك قىزمەتكەردى تارتاتىن كاسىپورىنداردى جوسپارلى تەكسەرۋلەرمەن قامتۋعا مۇمكىندىك بەرەدى»، – دەدى ءبىرجان نۇرىمبەتوۆ.

سونداي-اق حالىقارالىق ەڭبەك ۇيىمىنىڭ كونۆەنتسيالارىنا سايكەس كاسىپورىنداردى تەكسەرۋدى كەدەرگىسىز جۇزەگە اسىرۋ، ەڭبەك ينسپەكتورلارىنىڭ شتات سانىن ۇلعايتۋ بولىگىندە مەملەكەتتىك ەڭبەك ينسپەكتورلارىنىڭ مارتەبەسىن قايتا قاراۋ جونىندە شارالار قابىلداناتىن بولادى.

سونىمەن قاتار كاسىپوداقتاردىڭ قىزمەتىن جەتىلدىرۋ، كاسىبي تاۋەكەلدەردى باعالاۋعا نەگىزدەلگەن ەڭبەكتى قورعاۋدى باسقارۋ جونىندەگى جاڭا تاسىلدەردى ەنگىزۋ، سونداي-اق قىزمەتكەرلەردىڭ ەڭبەك قىزمەتىن تسيفرلاۋدى ەنگىزۋ جونىندەگى ماسەلەلەردىڭ ۇلكەن شەڭبەرىن قامتيتىن ەڭبەك جونىندەگى زاڭ جوباسى پارلامەنتتە قاراۋدا جاتىر.

سوڭعى جاڭالىقتار

ۇقساس جاڭالىقتار