قازاقستان • 17 اقپان، 2020

قازاقستانداعى كوشى-قون پروتسەستەرى قالاي رەتتەلەدى؟

45 رەتكورسەتىلدى

ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ كوشى-قون پروتسەستەرىن رەتتەۋ جانە ىشكى ەڭبەك نارىعىن قورعاۋ ماسەلەلەرىندەگى جاڭا ادىستەردى جاريا ەتتى.

مينيستر 1991 جىلدان بەرى 1 ميلليون 57 مىڭ ەتنيكالىق قازاق تاريحي وتانىنا ورالىپ، ورالمان مارتەبەسىن العانىن ايتتى. 2019 جىلى رەسپۋبليكاعا 9 993 وتباسى (17،7 مىڭ ەتنيكالىق قازاق) كەلدى، 597 ورالمان وتباسى (2 مىڭ ادام) قابىلداۋ وڭىرلەرىندە قونىس اۋداردى.

ازاماتتىق الۋ ءۇشىن قۇجاتتاردى تاپسىرىپ ۇلگەرمەگەن 8،2 مىڭ ەتنيكالىق قازاق وتكەن جىلعى قانداس مارتەبەسىن ۇزارتۋ بويىنشا بىرجولعى اكتسيا شەڭبەرىندە قازاقستان ازاماتتىعىن الدى.

«2019 جىلى شەتەلدىك جۇمىس كۇشىن (بۇدان ءارى – شجك) تارتۋعا بولىنگەن كۆوتا  شەڭبەرىندە جەرگىلىكتى اتقارۋشى ورگاندار 25،5 مىڭ رۇقسات بەردى (2019 جىلعا كۆوتا 48،7 مىڭ بىرلىكتى قۇرادى)، ونىڭ ىشىندە كومپانيا باسشىلارى، سونداي-اق قۇرىلىمدىق بولىمشەلەر مەنەدجەرلەرى مەن بىلىكتى ماماندارعا رۇقساتتاردىڭ 80%-ى بەرىلدى. جۇمىس بەرۋشىلەر 8،2 ملرد تەڭگە سالىق الىمىن تولەدى. سونىمەن قاتار كومپانيالار كادرلارداعى قازاقستاندىقتاردى قامتۋدى قامتاماسىز ەتۋ تالاپتارىن ساقتاۋدا، ونىڭ ۇلەسى 96%-دى قۇرايدى»، – دەدى ءبىرجان نۇرىمبەتوۆ.

2020 جىلعا شەتەلدىك جۇمىس كۇشىن تارتۋ كۆوتاسى 2019 جىلمەن سالىستىرعاندا 40%-عا قىسقارىپ، 29،3 مىڭ بىرلىكتى قۇرادى.

قولدانىستاعى كوشى-قون جۇيەسىن جەتىلدىرۋ، ەلگە كەلگەن ەتنيكالىق قازاقتار مەن ميگرانتتار ءۇشىن قولايلى جاعدايلار جاساۋ، سونداي-اق ىشكى ەڭبەك نارىعىن قورعاۋ ماقساتىندا كوشى-قون پروتسەستەرىن رەتتەۋ تۋرالى زاڭ جوباسى ازىرلەندى، ول قازاقستان رەسپۋبليكاسى پارلامەنتىنىڭ ماجىلىسىندە قارالىپ جاتىر.

«زاڭ جوباسى اياسىندا قانداستارعا تۇرۋعا جانە قازاقستان ازاماتتىعىن الۋعا ءبىر ءوتىنىش بەرۋ قۇقىعىن قاراستىرۋ ۇسىنىلادى. قانداستارعا ء«بىر تەرەزە» قاعيداتى بويىنشا مەملەكەتتىك قىزمەتتەر كورسەتۋ راسىمدەرىن وڭتايلاندىرۋ كوزدەلىپ وتىر. سونداي-اق شەتەلدىك بىلىكتى قىزمەتكەرلەردى قازاقستاندىق كادرلارمەن اۋىستىرۋ جونىندەگى مىندەتتەمەلەردى جۇمىس بەرۋشىلەرگە جۇكتەۋ ۇسىنىلادى. رۇقسات تەك ىشكى ەڭبەك نارىعىندا ماماندار بولماعان جاعدايدا عانا بەرىلۋى ءتيىس»، – دەدى ءبىرجان نۇرىمبەتوۆ.

سوڭعى جاڭالىقتار

ۇقساس جاڭالىقتار