قوعام • 17 اقپان، 2020

مەملەكەتتىك قىزمەتتەردىڭ 90%-ى ەلەكتروندىق فورماتقا كوشىرىلەدى

53 رەتكورسەتىلدى

ەڭبەك جانە حالىقتى الەۋمەتتىك قورعاۋ مينيسترلىگى 2020 جىلدىڭ سوڭىنا دەيىن الەۋمەتتىك-ەڭبەك سالاسىنداعى مەملەكەتتىك قىزمەتتەردىڭ 90%-ىن ەلەكتروندىق فورماتقا كوشىرۋدى جوسپارلاپ وتىر. بۇل تۋرالى 2019 جىلعى جۇمىس قورىتىندىسى جانە 2020 جىلعا ارنالعان نەگىزگى مىندەتتەر بويىنشا ۆەدومستۆونىڭ القا وتىرىسىندا مينيستر ءبىرجان نۇرىمبەتوۆ ءمالىم ەتتى.

مينيستر بۇگىنگى تاڭدا ەڭبەكمينى الەۋمەتتىك-ەڭبەك سالاسىنداعى ماڭىزدى جوبالاردى ىسكە اسىراتىنىن حابارلادى.

ءبىرىنشىسى – «وتباسىنىڭ الەۋمەتتىك كارتاسى»، ول قازاقستان حالقىنىڭ 100%-ىن، ياعني 7 ميلليون وتباسىن قامتيدى. الەۋمەتتىك كارتا ءار وتباسىنىڭ قانداي ومىرلىك جاعدايدا ەكەنىن كورسەتەدى، كۇردەلى نەمەسە داعدارىستى جاعدايدان شىعۋ ءۇشىن جۇمىس الگوريتمىن ايقىندايدى.

«2019 جىلدىڭ شىلدەسىندە الەۋمەتتىك كارتالاردى قالىپتاستىرعاننان كەيىن كۇردەلى جانە داعدارىستى جاعدايدا بولعان 101 مىڭ وتباسى انىقتالدى. ولارعا قاتىستى جۇمىسقا ورنالاستىرۋ (12،7 مىڭ)، ەمحانالارعا (68،8 مىڭ)، بالاباقشالار مەن مەكتەپتەرگە (72،9 مىڭ) بەكىتۋ بويىنشا شارالار قابىلداندى. بارلىعى 150 مىڭنان استام شارا جۇزەگە اسىرىلدى. قىركۇيەك ايىندا 505 وتباسى ومىرلىك قيىن جاعدايدان شىعارىلدى، ولارعا 533 الەۋمەتتىك قولداۋ شاراسى كورسەتىلدى»، – دەدى ءبىرجان نۇرىمبەتوۆ.

ەكىنشى جوبا – «قازاقستان ازاماتىنىڭ الەۋمەتتىك ID» الەۋمەتتىك جاردەماقى الۋدىڭ اشىقتىعىن، قولايلىلىعىن ارتتىرۋعا باعىتتالعان. الەۋمەتتىك ID ااك تولەۋدى، قوعامدىق كولىكتە جەڭىلدىكپەن جول ءجۇرۋدى، كوپبالالى جانە تابىسى از وتباسىلاردىڭ بالالارىنىڭ مەكتەپتەردە تەگىن تاماقتانۋىن تولەۋدى كوزدەيدى.

اقتوبە اكىمدىگىمەن بىرلەسىپ ونى پيلوتتىق قولدانۋ 2019 جىلدىڭ شىلدەسىندە باستالدى، وپەراتورى «قازپوشتا» اق بولدى. 5 مىڭعا جۋىق كارتا شىعارىلىپ، 31 مىڭ ترانزاكتسيا جۇزەگە اسىرىلدى.

«جوبا قاراعاندى، اتىراۋ، پاۆلودار وبلىستارىندا جانە نۇر-سۇلتان قالاسىندا ەنگىزىلۋدە. 2020 جىلى جوبانى بارلىق وبلىس ورتالىقتارىنا تاراتۋ قاجەت»، – دەپ تولىقتىردى ەڭبەك ءمينيسترى.

جۇمىسپەن قامتۋ جانە جۇمىسقا ورنالاستىرۋ سالاسىندا «ەلەكتروندىق ەڭبەك بيرجاسى» (بۇدان ءارى – ەەب) جانە «ەلەكتروندىق ەڭبەك شارتتارى» جوبالارى ىسكە اسىرىلۋدا.

ەەب ارقاسىندا 2 جىل ىشىندە 1 ملن-نان استام ادام جۇمىس تابا الدى. «ەلەكتروندىق ەڭبەك شارتتارى» جوباسىنا 25 مىڭ ۇيىم قوسىلدى. 1،1 ملن ەلەكتروندىق شارت تىركەلگەن، بۇل قىزمەتكەرلەردىڭ ەڭبەك قۇقىقتارىن قورعاۋعا ىقپال ەتەدى.

«مەملەكەتتىك قىزمەتتەردى اۆتوماتتاندىرۋ سالاسىندا ەلەكتروندىق قىزمەتتەردىڭ ۇلەسى 80%-عا جەتكەنىن، 2019 جىلدىڭ باسىندا 42% بولعانىن اتاپ وتكىم كەلەدى. Egov پورتالىندا 6 مەملەكەتتىك قىزمەتتى ورنالاستىرۋ جانە 10 قىزمەتتى پرواكتيۆتى فورماتقا كوشىرۋ ەسەبىنەن وسىمگە قول جەتكىزىلدى. 2020 جىلدىڭ سوڭىنا دەيىن ءبىز ەلەكتروندىق قىزمەتتەردىڭ ۇلەسىن 90%-عا دەيىن جەتكىزۋدى جوسپارلاپ وتىرمىز»، – دەپ تۇيىندەدى ءبىرجان نۇرىمبەتوۆ.

بۇگىنگى تاڭدا الەۋمەتتىك جانە ەڭبەك سالاسىنداعى 40 مەملەكەتتىك قىزمەتتىڭ 18-ءى ەلەكتروندىق، 14-ءى پرواكتيۆتى جانە 10-ى كومپوزيتتى تۇردە كورسەتىلەدى.

مىسالى، «التىن القا»، «كۇمىس القا» القالارىمەن ماراپاتتالعان كوپبالالى انالارعا بەرىلەتىن جاردەماقى نەمەسە مۇگەدەكتىگى بويىنشا مەملەكەتتىك جاردەماقى، بالا تۋ جانە 1 جاسقا دەيىنگى بالا كۇتىمى بويىنشا جاردەماقىلار ءوتىنىشسىز نەمەسە پرواكتيۆتى تۇردە تاعايىندالادى. ءبىر ءوتىنىش بويىنشا بارلىق زەينەتاقى تولەمدەرى كومپوزيتتى تۇردە تاعايىندالادى.

سوڭعى جاڭالىقتار

ۇقساس جاڭالىقتار