قوعام • 17 اقپان، 2020

مۇگەدەكتەردى الەۋمەتتىك قولداۋ مەن بەيىمدەۋ كۇشەيتىلەدى - ءبىرجان نۇرىمبەتوۆ

37 رەتكورسەتىلدى

ەڭبەك جانە حالىقتى الەۋمەتتىك قورعاۋ مينيسترلىگىنىڭ 2019 جىلعى جۇمىس قورىتىندىلارى مەن 2020 جىلعا ارنالعان نەگىزگى مىندەتتەرى بويىنشا القا وتىرىسىندا ۆەدمستۆو باسشىسى ءبىرجان نۇرىمبەتوۆ مۇگەدەكتەردى الەۋمەتتىك قولداۋ مەن بەيىمدەۋ قاي باعىتتاردا كۇشەيتىلەتىنىن ايتتى.

مينيسترلىك مالىمەتىنشە، قازاقستاندا شامامەن 695 مىڭ مۇگەدەكتىگى بار ادام تۇرادى. ونىڭ 424 مىڭى ەڭبەككە قابىلەتتى جاستا (61%)، 180 مىڭى زەينەتكەرلىك جاستا (26%)، 92 مىڭ 18 جاسقا دەيىنگى بالا (13%). 2019 جىلى مۇگەدەكتەردى الەۋمەتتىك قورعاۋعا رەسپۋبليكالىق بيۋدجەتتەن 323 ملرد تەڭگە ءبولىندى.

«2019 جىلدىڭ 1 شىلدەسىنەن باستاپ مۇگەدەك بالانىڭ جانە 18 جاستان اسقان بالا كەزىنەن ءبىرىنشى توپتاعى مۇگەدەكتىڭ كۇتىمى بويىنشا مەملەكەتتىك جاردەماقىلاردىڭ مولشەرى 30%-عا ءوستى. بۇل 100 مىڭ ازاماتقا اسەر ەتتى. 292 مىڭنان استام مۇگەدەك نەمەسە بارلىق مۇقتاج ادامداردىڭ 70%-ى وڭالتۋدىڭ قاجەتتى قۇرالدارى مەن قىزمەتتەرىمەن قامتاماسىز ەتىلگەن. العاشقى مۇگەدەكتىك پروبلەماسى وزەكتى بولىپ قالۋدا. سەبەپتەردى تالداۋ دەنساۋلىق ساقتاۋ ۇيىمدارىنىڭ العاشقى مۇگەدەكتىكتىڭ الدىن الۋ جانە ساۋىقتىرۋ بويىنشا جۇمىسىنىڭ تيىسىنشە جۇرگىزىلمەيتىنىن كورسەتەدى. سونداي-اق مەديتسينالىق-الەۋمەتتىك ساراپتاما ءۇشىن نەگىزسىز جولدامالاردىڭ ءوسۋى ماسەلەسىنە ەرەكشە نازار اۋدارۋ قاجەت، ولارعا سايكەس مۇگەدەكتىك بەلگىلەنبەگەن»، – دەدى ءبىرجان نۇرىمبەتوۆ.

مۇگەدەكتەردىڭ قۇقىقتارىن قامتاماسىز ەتۋ جانە ءومىر ءسۇرۋ ساپاسىن جاقسارتۋ جونىندەگى 2025 جىلعا دەيىنگى ۇلتتىق جوسپار اياسىندا جۇمىستار جۇزەگە اسىرىلادى.

«ونى جۇزەگە اسىرۋ اياسىندا الەۋمەتتىك قىزمەتتەر پورتالى كەزەڭ-كەزەڭىمەن جۇزەگە اسىرىلۋدا. ونىڭ كومەگىمەن ازاماتتار مەملەكەتتىك ساتىپ الۋسىز وڭالتۋدىڭ قاجەتتى قۇرالدارى مەن قىزمەتتەرىن ءوز بەتىنشە تاڭداي الادى. وسى جىلدان باستاپ پورتال ارقىلى جەكە تاڭداۋدى قاجەت ەتپەيتىن تەحنيكالىق وڭالتۋ قۇرالدارىنىڭ (بۇدان ءارى – Tوق) 24 ءتۇرىن  ساتىپ الۋعا بولادى. 2021 جىلدان باستاپ توق-تىڭ بارلىق 55 ءتۇرى قولجەتىمدى بولادى. 2020 جىلدىڭ شىلدەسىنەن باستاپ جەكە كومەكشىلەردىڭ، ىمداۋ ءتىلى ماماندارىنىڭ قىزمەتتەرى مەن ساناتورلىق-كۋرورتتىق ەمدەۋ قولجەتىمدى بولادى. سونىمەن قاتار، بيىل العاش رەت ەلەكتر جەتەگى بار قازاقستاندىق مۇگەدەكتەر اربالارىن شىعارۋ قولعا الىنادى. ەكىنشى توقساننان باستاپ ءبىز العاشقى مۇگەدەكتەر ارباسىن بەرە باستايمىز»، – دەدى مينيستر.

ءبىرجان نۇرىمبەتوۆ سونىمەن قاتار 2019 جىلى كەدەرگىسىز ورتا قۇرۋ ماقساتىندا پاسپورتتالعان وبەكتىلەردىڭ ىشىنەن الەۋمەتتىك ماڭىزى بار وبەكتىلەردىڭ 96،6%-ىندا قولجەتىمدىلىك قامتاماسىز ەتىلگەنىن اتاپ ءوتتى.

«2019 جىلى مۇگەدەكتىگى بار ادامداردىڭ قۇقىقتارىنىڭ ساقتالۋىنا 1300 تەكسەرۋ جۇرگىزىلدى، ولاردىڭ ناتيجەلەرى بويىنشا 1000-نان استام باقىلاۋ سۋبەكتىسىنە نۇسقامالار بەرىلدى، سونىڭ ىشىندە 46 ميلليون تەڭگەگە 212 ايىپپۇل سالىندى. سوندىقتان بۇل جۇمىستى قاتاڭ باقىلاۋ قاجەت. بارلىق وبەكتىلەرگە مونيتورينگ جۇرگىزۋ ماقساتىندا «قولجەتىمدى ورتا» پورتالى ازىرلەنۋدە»، – دەدى ول.

ءمينيستردىڭ ايتۋىنشا، الداعى ەكى جىلدىڭ ىشىندە ەڭبەكمينىنىڭ باستى مىندەتى – مۇگەدەكتەردىڭ ەكونوميكالىق بەلسەندىلىگى ءۇشىن مۇمكىندىكتەر جاساۋ.

ء«بىز مۇگەدەكتىگى بار ادامداردى ورگانيزم فۋنكتسيالارىنىڭ بۇزىلۋ تۇرلەرىنە بايلانىستى جۇمىسقا ورنالاستىرۋ جونىندەگى ۇسىنىمدارمەن كاسىپتەر اتلاسىن ازىرلەۋدى جوسپارلاپ وتىرمىز. شەت ەلدەردىڭ تاجىريبەسىنە سۇيەنە وتىرىپ، بيىل ءبىز مەملەكەتتىك ساتىپ الۋ تۋرالى زاڭناماعا وزگەرىستەر ەنگىزۋ تۋرالى باستاما كوتەرۋدەمىز. مۇگەدەكتىگى بار ادامداردى جۇمىسپەن قامتۋ كۆوتاسىن ورىندامايتىن ءىرى جانە ورتا كومپانيالار ءۇشىن مەملەكەتتىك ساتىپ الۋلارعا قاتىسۋدى شەكتەيتىن نورما ەنگىزۋ ۇسىنىلادى. سونداي-اق جاپونيا مەن گەرمانيا تاجىريبەسىنە سۇيەنە وتىرىپ، ءبىز جۇمىسپەن قامتۋ كۆوتاسىنىڭ ورنىنا ارنايى قورعا وتەماقى تولەۋدى ەنگىزۋدىڭ بالاما تەتىگىن قاراستىرىپ جاتىرمىز. «ەڭبەك» مەملەكەتتىك باعدارلاماسى اياسىندا ميكروكرەديت جانە قايتارىمسىز گرانت بەرۋ قۇرالدارى مۇگەدەكتىگى بار ادامداردىڭ بيزنەس باستامالارىنا باعىتتالادى»، – دەدى ءبىرجان نۇرىمبەتوۆ.

قازىردىڭ وزىندە بيزنەسپەن اينالىساتىن نەمەسە ستارتاپ-جوبالارى بار مۇگەدەكتىگى بار ادامدارعا يندۋستريالاندىرۋ كارتاسىنا ۇقساس ScaleUp باعدارلاماسى ارقىلى كومەك كورسەتىلەدى، وعان اكسەلەراتسيا، ماسشتابتاۋ، بيزنەس-تالىمگەرلىك، وقىتۋ، جاڭا نارىقتارعا شىعۋعا كومەك جانە تاعى باسقا كىرەدى.

سوڭعى جاڭالىقتار

iPhone 12 Pro رەندەرى شىقتى

تەحنولوگيا • كەشە

ۇقساس جاڭالىقتار