«ميۋنحەن قاۋىپسىزدىك كونفەرەنتسياسىندا العاش رەت قازاقستان باسشىسى قاتىسىپ وتىر. سونىمەن قاتار بىرىنشە رەت ورتالىق ازياعا ارنالعان ارنايى پانەلدىك پىكىرتالاس ۇيىمداستىرىلدى. بۇل الەمدىك ساراپشىلار تاراپىنان ورتالىق ازياداعى, ونىڭ ىشىندە قازاقستاندا بولىپ جاتقان پروتسەستەرگە قىزىعۋشىلىق ارتقانىن بايقاتتى. ەكىنشىدەن, بۇگىنگى پانەلدىك سەسسيادا ساراپشىلار مەن جۋرناليستەردىڭ كوپ قاتىسۋى قازىرگى ۋاقىتتا قازاقستاننىڭ ايماقتىق جانە حالىقارالىق پروتسەستەردە الاتىن ەرەكشە ورنىن كورسەتىپ وتىر.
وزدەرىڭىز بايقاساڭىزدار, بۇگىن قازاقستان پرەزيدەنتىنە قويىلعان سۇراقتار ءتۇرلى تاقىرىپتاردى قامتىدى. وسى ورايدا ايماقتىق قاۋىپسىزدىك, سيريا مەن اۋعانستانداعى قازىرگى جاعداي, ورتالىق ازيانىڭ ساياسي-ەكونوميكالىق دامۋى, الپاۋىت ەلدەرمەن قارىم-قاتىناس, سونداي-اق كورونوۆيرۋسقا قاتىستى سۇراقتار قويىلدى. سەبەبى, بۇگىندە جالپى حالىقارالىق جاعداي اقش, رەسەي مەن قىتاي سەكىلدى الىپ مەملەكەتتەر اراسىنداعى قارىم-قاتىناسقا بايلانىستى. ءدال وسى جاعدايدا قازىر نەگىزىنەن قازاقستان عانا اتالعان الىپ مەملەكەتتەرمەن ءتيىستى قارىم-قاتىناستى قۇرعان. سوندىقتان قازاقستانعا قاتىستى سۇراقتار بۇگىنگى پانەلدىك سەسسيادا قويىلدى» دەدى ەرلان قارين.
