گەرمانيانىڭ ءىرى اۋىل شارۋاشىلىعى كومپانياسىنىڭ باسشىسى كلاۋس لۋتتسپەن بولعان كەزدەسۋدە ەنەرگيا كوزدەرىن قايتا قالپىنا كەلتىرۋ جانە اگروونەركاسىپ كەشەنىن تسيفرلاندىرۋ سالالارى بويىنشا بىرلەسكەن ينۆەستيتسيالىق جوبالاردى جۇزەگە اسىرۋدىڭ پەرسپەكتيۆالارى تالقىلاندى.
مەملەكەت باسشىسى قازاقستاننىڭ گەرمانيا بيزنەسىمەن اراداعى تىعىز ءارى جەمىستى ىنتىماقتاستىقتى دامىتۋعا باسا ءمان بەرەتىنىن اتاپ ءوتىپ, كاسىپكەردىڭ نازارىن ەلىمىزدەگى ەنەرگيا كوزدەرىن قايتا قالپىنا كەلتىرۋ جانە تىڭايتقىشتار ءوندىرۋ باعىتىنىڭ الەۋەتىن ارتتىرۋدىڭ ماڭىزدىلىعىنا اۋداردى.
– ءبىز قازاقستاندا جەل جانە كۇن ەلەكتر ستانتسيالارىن كوبىرەك سالۋىمىز كەرەك, بىراق ءتيىستى ينفراقۇرىلىم جەتىسپەيدى. سوندىقتان ءسىزدىڭ كومپانيامەن تىعىز سەرىكتەستىك ورناتۋعا زور قىزىعۋشىلىق تانىتىپ وتىرمىز, – دەدى پرەزيدەنت.
ميحاەل ۆيفەرسپەن اڭگىمەلەسۋ كەزىندە كولىك-لوگيستيكا سالاسى بويىنشا بىرلەسكەن ينفراقۇرىلىمدىق جوبالاردى ىسكە اسىرۋ پەرسپەكتيۆالارى قاراستىرىلدى.
نەمىس بيزنەسمەنى قاسىم-جومارت توقاەۆقا نۇر-سۇلتان مەن الماتى قالالارىندا وكىلدىكتەرى بار كومپانيانىڭ قازاقستانداعى جۇمىسى جانە قاراعاندىدا ءۇشىنشى وكىلدىكتىڭ اشىلۋى تۋرالى مالىمەت بەردى. كومپانيا ەلىمىزدىڭ اۋماعىندا جاڭا بىرلەسكەن كولىك-لوگيستيكالىق تەرمينالدى الۋعا جانە ىسكە قوسۋعا مۇددەلى ەكەنىن ءبىلدىردى.
مەملەكەت باسشىسىنىڭ پاتريك ۆيدەماننمەن وتكىزگەن كەزدەسۋىندە قازاقستاندا بوس ىدىستاردى قايتا اينالىمعا جىبەرۋدىڭ كەپىلدىك-قايتارىمدىق جۇيەسى جونىندەگى جوبانىڭ جۇزەگە اسىرىلۋ پەرسپەكتيۆالارى تالقىلاندى.
«Reverse Logistics Systems GmbH» كومپانياسىنىڭ باسشىسى ماتەريالدار مەن قالدىق زاتتاردى قايتا وڭدەۋ سالاسىندا ءتيىستى ەكوجۇيە قۇرۋ ءۇشىن قازاقستانمەن ىنتىماقتاستىق ورناتۋعا دايىن ەكەنىن ايتتى.
پرەزيدەنت كومپانيانىڭ جۇمىسىن جانە بىرەگەي ازىرلەمەلەرىن, ونىڭ ىشىندە بوس ىدىستاردى قايتا اينالىمعا جىبەرۋ ءۇشىن ءاربىر بۋماعا يدەنتيفيكاتور ەنگىزۋ قىزمەتىن جوعارى باعالادى.
جالپى, كەزدەسۋلەر اياسىندا قاسىم-جومارت توقاەۆ ەلىمىزدىڭ شەتەلدەن, سونىڭ ىشىندە گەرمانيادان تارتىلعان ينۆەستيتسيالاردى ارتاراپتاندىرۋعا مۇددەلى ەكەنىن راستادى. ول بيزنەس وكىلدەرىنە مەملەكەت تاراپىنان جان-جاقتى قولداۋ كورسەتىلەتىنىن جانە بىرلەسكەن جوبالاردى جۇزەگە اسىرۋ ءۇشىن قاجەتتى جاعداي جاسالاتىنىن ايتتى.
