قاتىسۋشىلاردىڭ باياندامالارى بويىنشا, قازىرگى ۋاقىتتا قۇرىق, اقتاۋ جانە سولتۇستىك اقتاۋ تەڭىز تەرمينالى 25, 80 جانە 60 پايىزدىق كورسەتكىشتەرگە سايكەس جۇمىس ىستەپ كەلەدى جانە ءبىر-بىرىنە باسەكەلەس بولىپ وتىر.
سونداي-اق قۇرىق پورتىندا ءوز پارومدارىنىڭ بولماۋىنا بايلانىستى ءازىربايجان پارومدارىن جالعا الۋعا تاۋەلدى بولىپ وتىرعانى دا ايتىلدى. تاراپتار سونىمەن قاتار پورتتا قاجەتتى قۇرعاق جۇك پەن ينفراقۇرىلىمنىڭ سالىنباعانى, اتاپ ايتقاندا قويمالاردىڭ جوقتىعى نەگىزگى پروبلەما ەكەنىن اتاپ ءوتتى.
«قازاقستان تەمىر جولى» ۇك» اكتسيونەرلىك قوعامى باسقارما توراعاسىنىڭ ورىنباسارى پاۆەل سوكولوۆتىڭ ايتۋىنشا, قازاقستاندا بىردەيلەنگەن تاريفتەر دەڭگەيى ەاەو-عا مۇشە باسقا ەلدەرگە قاراعاندا 2-3 ەسە تومەن ءارى ول كولىك كومپانيالارىن تەڭسىزدىككە ۇشىراتىپ وتىر.
كوشپەلى وتىرىسقا قاتىسۋشىلار ينفراقۇرىلىمدى جاڭعىرتۋ, ءترانزيتتى ۇلعايتۋ ءۇشىن جاعداي جاساۋ, ءترانزيتتى تەكسەرۋگە موراتوري ەنگىزۋ مۇمكىندىكتەرىمەن بىرگە اكىمشىلىك كەدەرگىلەردى ازايتۋ قاجەتتىگىن پروبلەمالاردىڭ شەشىمى رەتىندە اتاپ ءوتتى.
دەپۋتاتتارعا سونداي-اق وتاندىق كەمەلەردىڭ رەسەيدىڭ ىشكى سۋ جولدارى ارقىلى اشىق تەڭىزدەرگە ترانزيتپەن وتۋىنە رۇقسات بەرۋدەگى 3 ايدان 6 ايعا دەيىن سوزىلاتىن ءراسىمىنىڭ ۇزاقتىعى تۋرالى دا ايتىلدى.
سەرىك جاقسىبەكوۆ شارانى قورىتىندىلاي كەلىپ, 2020-2025 جىلدارعا ارنالعان دەنساۋلىق ساقتاۋ مەن ءبىلىم بەرۋدى دامىتۋ جونىندەگى قابىلدانعان جاڭا مەملەكەتتىك باعدارلامالارعا باسا نازار اۋداردى جانە ايتىلعان ۇسىنىستاردى پارلامەنت جۇمىسىندا پايدالانىلاتىنىن جەتكىزدى.
