«اۋىز سۋ بويىنشا قالاداعى 81 ەلدى مەكەننىڭ 63-ءى تولىق قامتىلعان, 10-ى جارتىلاي, 8 ەلدى مەكەنى تاسىپ ىشەدى. قامتىلۋى 94,7%. حالىقتى اۋىز سۋمەن قامتۋ ءۇشىن وتكەن 3 جىلدا 31 مىڭنان استام تۇرعىنى بار 9 ەلدى مەكەنگە اۋىز سۋ قۇبىرى تارتىلعان. قازىرگى تاڭدا قالانىڭ سولتۇستىك بولىگىندەگى جاڭا شاعىناۋدانداردى دامىتۋعا اۋىز سۋدىڭ قۋاتى جەتىسپەيدى. بۇل ماسەلەنى شەشۋ ءۇشىن 3 ماگيسترالدى قۇبىر سالۋىمىز قاجەت. بيىلعى جىلى قالالىق بيۋدجەتتەن 8 ەلدى مەكەندى سۋمەن قامتيتىن 2 ماگيسترالدى سۋ قۇبىرىنىڭ قۇرىلىسى جۇرگىزىلەدى. سونىمەن قاتار, شالعايداعى 5 ەلدى مەكەندى سۋمەن قامتيتىن ماگيسترالدى سۋ قۇبىرىنىڭ قۇرىلىسى جۇرگىزىلۋدە. الداعى 3 جىل ىشىندە جارتىلاي قامتىلعان 10 ەلدى مەكەن جانە قالاعا جەتىسپەيتىن ماگيسترالدى سۋ قۇبىرلارىن تارتۋدى جوسپارلاپ وتىرمىز», دەدى م.ايتەنوۆ.
بۇدان بولەك, قالا باسشىسى وسى جىلى 100 مىڭنان استام حالقى بار 7 ەلدى مەكەندى قامتيتىن ارعىنبەكوۆ - جىبەك جولى ماگيسترالدى كارىز جۇيەسىنىڭ قۇرىلىسىنا 850 ملن. تەڭگە بولىنگەنىن جانە 3 جىلدىق جوسپار بويىنشا 26 كم كارىز كوللەكتورىنىڭ جانە قۋاتى 150 مىڭ مەتر كۋب. تازارتۋ قوندىرعىسىنىڭ قۇرىلىسىن كەزەڭ-كەزەڭىمەن سالۋ جوسپارلانىپ جاتقانىن ءمالىم ەتتى. ياعني, الداعى ۋاقىتتا 13 ەلدى مەكەن كارىز جۇيەسىنە قوسىلىپ, كوللەكتوردىڭ قابىلداۋ قۋاتى ارتپاق وسىلايشا, كارىز جۇيەسىمەن قامتۋ كورسەتكىشى 49 پايىزدان 59 پايىزعا جەتپەك. ال, قالا تۇرعىندارىن كوگىلدىر وتىنمەن قامتۋ ماقساتىندا بيىلعى جىلى رەسپۋبليكالىق بيۋدجەتتەن قۋاتى ساعاتىنا 250 مىڭ مەتر كۋب قۇرايتىن №3-ءشى اگرس قۇرىلىسى باستالماق. قۇرىلىسى 2022 جىلى اياقتاۋ جوسپارلانۋدا.
سوڭعى 3 جىلدىڭ ىشىندە تۇرعىنداردى ساپالى ەلەكتر جارىعىمەن قامتۋ ماقساتىندا 10 ەلدى مەكەنگە ەلەكتر جەلىسى جانە 2 پودستانسانىڭ قۇرىلىسى سالىنعان. بۇگىندە شىمكەنت قالاسىندا تۇرعىنداردى ساپالى ەلەكتر ەنەرگياسىمەن قامتۋ دەڭگەيى 93 پايىزدى قۇرايدى. قازىرگى تاڭدا, قالانىڭ سولۇستىك بولىگىنە ەلەكتر ەنەرگياسىنىڭ قۋاتى جەتىسپەۋدە. وسى ماسەلەنى شەشۋ ءۇشىن قۋاتى 220 كۆ بوزارىق پودستانساسىنىڭ قۇرىلىسى جۇرگىزىلۋدە. اعىمداعى جىلى پايدالانۋعا بەرۋ جوسپارلانۋدا. سونىمەن قاتار ەكى پودستانسانىڭ قۇرىلىستارى جۇرگىزىلۋدە (قۋاتى 110 كۆ «اقجار» جانە «1-م-1»). ولار كەلەسى جىلى پايدالانۋعا بەرىلەدى. ناتيجەسىندە, قۋاتى 110 كۆ قۇرايتىن ءتورت («استانا-1», «استانا-2», «1-م-1», «اقجار») پودستانسا ىسكە قوسىلىپ, ەلەكتر قۋاتىمەن قامتۋ 180 مۆت-تان 300 مۆت ارتادى. بۇل قالانىڭ قاجەتتىلىگىن شەشۋگە مۇمكىندىك بەرەدى. وسىنىڭ ارقاسىندا 90 مىڭ حالقى بار 30 ەلدى مەكەننىڭ ماسەلەسى شەشىلەدى.
