الي بەن احمەد ءال-كاۋاري قازاقستان ۇكىمەتىنىڭ باسشىسىن جوعارى دەڭگەيدەگى V قازاقستان–كاتار بىرلەسكەن كوميسسياسىنىڭ ساراپشىلىق توبى وتىرىسىنىڭ قورىتىندىلارى تۋرالى حاباردار ەتتى.
ۇكىمەت باسشىسى ساۋدا-ەكونوميكالىق, ينۆەستيتسيالىق, قارجى-بانك, اۋىل شارۋاشىلىعى جانە باسقا دا سالالارداعى ىنتىماقتاستىقتى دامىتۋعا ەلەۋلى الەۋەتتىڭ بار ەكەنىن اتاپ ءوتتى.
ەلدەردىڭ اراسىندا ۆيزاسىز رەجيم ورناتىلعان, جاقىندا نۇر-سۇلتان مەن دوحا اراسىندا تىكەلەي رەيستەردى ىسكە قوسۋ جوسپارلانعان. ودان كەيىن استانالار اراسىندا عانا ەمەس, سونداي-اق الماتى مەن دوحا اراسىندا اپتاسىنا 7 رەت ءجيى رەيستەر ورىندالا باستايدى.
تاراپتار بيىل ناۋرىز ايىندا قازاقستانعا كاتار شەيحى ءامىر تاميم بەن حاماد ءال-ءتانيدىڭ كەلۋىن, سونداي-اق ساۋدا-ەكونوميكالىق, ينۆەستيتسيالىق جانە قارجى-بانك سالالارىنداعى ءوزارا ءىس-قيمىل پەرسپەكتيۆالارىن تالقىلادى.
كەزدەسۋگە قازاقستاننىڭ ۇلتتىق ەكونوميكا ءمينيسترى ر. دالەنوۆ, كاتار مەملەكەتىندەگى قازاقستاننىڭ توتەنشە جانە وكىلەتتى ەلشىسى ا. شوقىباەۆ قاتىستى.
