وبلىس بويىنشا كوكتەمگى سۋ تاسقىنىنىڭ الدىن الۋ سالدارىن جويۋعا دايىندىق جوعارى دەڭگەيدە ەكەن. توتەنشە جاعداي جونىندەگى دەپارتامەنتتىڭ مالىمەتىنشە, وڭىردە سۋ تاسقىنى كەزەڭىنە دايىندىق جۇمىستارى اياسىندا 2285 شاقىرىم ارىق, 2156 شاقىرىم كانال تازالانىپ, 100 مىڭ تەكشە مەتر قار ەلدى مەكەندەر اۋماعىنان شىعارىلعان. قالا ماڭىنداعى 5 مىڭ شاقىرىم ارىق ءىشى قوقىس, توپىراقتان ارشىلعان. سونىمەن قاتار ەلدى مەكەندەردەگى سۋ وتكىزۋ قۇرىلعىلارى دا تازالاندى.
بۇل جۇمىستار ءار اۋداندا ءجۇرىپ جاتىر. مىسالى, كوكسۋ اۋدانى كوكتەمگى سۋ تاسقىنىنا ساقاداي ساي ەكەن. ويتكەنى جەتىسۋدىڭ ءبىر ساعاسى سانالاتىن كوكسۋ وزەنى ءار كوكتەم سايىن مىنەز كورسەتىپ, جاعاسىن كوبىك شايىپ, تاسيتىنى بار. بۇل كەزدە وسى وزەننىڭ بويىن جاعالاي قونعان اۋداننىڭ شارۋاشىلىقتارىنا سەل قاۋپى تونەدى. اسىرەسە بيىلعىداي تاۋعا قار قالىڭ ءتۇسىپ, كۇن رايى ەرتە جىلىنعان كەزدە قاتەر ەكى ەسەلەنەدى. 2018 جىلى كوكسۋ اۋدانىنىڭ مۇقىرى اۋىلى مەن كوكسۋ بەكەتى اۋماعىنداعى ەلدى مەكەندەردىڭ كوشەسىنە دەيىن قىزىل سۋ كىرىپ, تۇرعىندار ابىگەرگە تۇسكەن بولاتىن. بىلتىر بۇل قاۋىپتىڭ الدى الىنىپ, وزەن جانە كانال ارنالارىنىڭ ساعاسىن كەڭەيتۋ, ءتۇبىن تەرەڭدەتۋ, تازارتۋ جۇمىستارى جۇرگىزىلگەن ەدى. وبلىستىق بيۋدجەتتەن بولىنگەن قارجى ءتيىمدى جۇمسالىپ, وزەن ماڭىنداعى اۋىلدارعا تاسقىننان تونەتىن قاتەر ازايعان. بيىل دا كۇن رايىنىڭ قۇبىلۋى وزەن ارناسىنداعى سۋدىڭ كولەمىن كوبەيتىپ وتىر. دەمەك, قاۋىپ تونبەسە دە ساقتىق شارالارى جاسالۋى ءتيىس.
– كوكتەمگى سۋ تاسقىنى كەزەڭىنە دايىندىق جۇمىستارى اياسىندا 32 شاقىرىم ارىق, 55 شاقىرىم كانال, 2500 مىڭ تەكشە مەتر قار ەلدى مەكەندەر اۋماعىنان شىعارىلىپ, اۋىل ىشىندەگى ارىق ءىشى قوقىس, توپىراقتان ارشىلىپ, سونىمەن قاتار 32 دانا سۋ وتكىزۋ قۇبىرلارى دا تازالاندى. اۋداندا ارنايى شۇعىل ارەكەت ەتۋ جاساعى قۇرىلىپ, 25 تەحنيكا مەن جۇزگە جۋىق ادام توتەنشە جاعدايمەن كۇرەسۋگە دايىن وتىر, – دەيدى كوكسۋ اۋدانىنىڭ اكىمى الماس ءادىل.
الماتى وبلىسى
