قوستاناي وبلىستىق توتەنشە جاعدايلار دەپارتامەنتىنىڭ مالىمەتىنشە, وبلىستا اقپان ايىنىڭ باسىندا تۇسكەن قاردىڭ بيىكتىگى – 25 سانتيمەتر. بۇل قالىپتى نورمادان 132%-عا كوپ, دەيدى ماماندار. اسىرەسە مەڭدىقارا, قارابالىق, سارىكول جانە قاراسۋ اۋداندارىندا قار قالىڭ. ارقالىق ءوڭىرى مەن اۋليكول اۋدانىندا جەر بەتىندەگى ىلعال 150%-دان 277%-عا دەيىن جەتەدى.
وبلىستا سۋ تاسقىنى قاۋپىن ەسكەرتۋ جانە جويۋ جونىندەگى ارنايى باعدارلاما بار. اتالعان باعدارلاما اياسىندا وتكەن جازدا كوكتەمدە سۋ باسىپ قالۋى ىقتيمال اۋىلدارعا سىرتتان كەلەتىن قىزىل سۋدى وزەنگە قاراي بۇراتىن سۋ ارنالارى قازىلعان. ەلدى مەكەندەرگە جاقىن جاعالاۋلار بەكىتىلىپ, وزەندەر تەرەڭدەتىلگەن.
– 1 ناۋرىزدان باستاپ سۋ جىبەرگىش قۇرىلعىلار مەن بوگەتتەردى تازارتا باستايمىز. قازىردىڭ وزىندە 130 توننا جانارماي, 10 مىڭ توننا ينەرتتى ماتەريال, قۇم تولتىرىلعان 42 مىڭ قاپ دايىنداپ قويدىق. بۇگىنگە دەيىن ەلدى مەكەندەردەن 570 مىڭ تەكشە مەتر قار شىعاردىق. قازىر 349 تەحنيكا, 200-گە جۋىق سۋ سوراتىن قۇرىلعى مەن قايىقتار دايىن تۇر. جۋىق ارادا رەسەيلىك ماماندارمەن كەزدەسەمىز. ەكى جاقتىڭ مالىمەتتەرىن سالىستىرىپ, تەرەڭ تالداۋ جۇرگىزبەسەك بولمايدى, – دەيدى وبلىستىق توتەنشە جاعدايلار باسقارماسىنىڭ باسشىسى تالعات كاكىموۆ.
ايماق باسشىسى ا.مۇحامبەتوۆ الداعى اپتادا ۆەدومستۆوارالىق كوميسسيا وتىرىسىن وتكىزبەك. وعان بارلىق ورگاندار مەن اۋدان, قالا اكىمدەرى قاتىسادى. القالى جيىندا توپان سۋعا توتەپ بەرۋدىڭ قامى پىسىقتالادى.
نۇرقانات قۇلاباەۆ,
جۋرناليست
قوستاناي
