بيىلعى قىس ەرەكشە. وبلىستىڭ ءبىراز اۋدانىندا قار جوق. ادەتتە قارلى بولىپ كەلەتىن وڭىرلەردە دە جاۋىن-شاشىن دەڭگەيى تومەنىرەك بولدى. اقپان ايىنىڭ باسىندا تابيعات توسىن مىنەز كورسەتىپ, جاڭبىر جاۋدى. ورال قالاسىندا, كەيبىر ەلدى مەكەندەردە ەرىگەن سۋ جينالىپ, تۇرعىندارعا قاۋىپ ءتوندىردى.
– سۋ تاسقىنىن بولدىرماۋ ماقساتىندا ەلدى مەكەندەردە قار شىعارۋ جانە سۋ سورۋ جۇمىسى جۇرگىزىلۋدە. شىعارىلعان قاردىڭ كولەمى 112 مىڭ تەكشە مەتردەن اسادى, ەرىگەن قار سۋى – 3477 تەكشە مەتر. قازىرگى تاڭدا كوكتەمگى ماۋسىمعا 240 توننا جانار-جاعارماي, 89 مىڭ دانا قاپشىق, 19 مىڭ توننا ينەرتتى ماتەريالدار قورى دايىندالدى. قوسىمشا قاجەت ماتەريالدىق جانە تەحنيكالىق رەسۋرستاردى ساتىپ الۋ بويىنشا جۇمىس جۇرگىزىلۋدە. بىزگە ءالى 51 توننا جانار-جاعارماي, 40 مىڭعا جۋىق قاپ كەرەك, – دەپ مالىمدەدى وبلىستىڭ بيىلعى سۋ تاسقىنى جاعدايى تۋرالى بايانداما جاساعان وبلىستىق توتەنشە جاعدايلار دەپارتامەنتىنىڭ باستىعى گەنەرال-مايور جاسۇلان جۇماشەۆ.
كوميسسيا وتىرىسىندا ورال قالاسى, قازتالوۆ, تەرەكتى, بايتەرەك اۋداندارىنىڭ اكىمدەرى ءوز اۋماعىنداعى جاعداي تۋرالى بايانداپ, ۇسىنىستارىن ەنگىزدى. سونداي-اق وبلىستىق كوميسسيا مۇشەلەرى سۋ تاسقىنىنىڭ الدىن الا بولجامىن, گيدروتەحنيكالىق قۇرىلىستاردىڭ جاي-كۇيىن, وبلىستىق جانە رەسپۋبليكالىق جولداردىڭ جاي-كۇيىن, جەم-ءشوپ سانى مەن ولاردى قىستاۋعا دەيىن جەتكىزۋ ماسەلەلەرىن باياندادى.
ارينە تابيعات قۇبىلىستارىنا بارىنشا دايىن وتىرۋ كەرەك. مۇحتار مانكەەۆ سۋ تاسقىنىن اپاتسىز وتكىزۋمەن بىرگە سۋ قويمالارىنا قاجەتتى مولشەردە سۋ جيناپ الۋ دا وتە ماڭىزدى ەكەنىن ەسكە سالدى.
بيىلعى قىس باتىس قازاقستان ءۇشىن قارسىز, جايلىراق بولعانىن ايتتىق. كوكتەم ەرتە شىقسا, الدىمەن دالا وزەندەرىنىڭ ارناسى تولادى. ماسەلەن, قاراتوبەلىك توتەنشەلىكتەر اۋدان اۋماعىنداعى قالدىعايتى, جاقسىباي, جارلى وزەندەرى تاسىعان جاعدايدا اۋىل تۇرعىندارىنىڭ قاۋىپسىزدىگىن تەكسەرۋدە. تاسقىن كەزىندە قاتىناسسىز قالاتىن ەلدى مەكەندەردىڭ ازىق-ت ۇلىك قورىن جاساقتاۋ, وزەن ارنالارىن بيىكتەتۋ, كەي وسال جەرلەردى كۇشەيتۋ ءۇشىن ءار اۋىلدىق وكرۋگتە تۇرعىن ۇيلەردىڭ قاۋىپسىزدىگىن قامتاماسىز ەتۋ ماقساتىندا دايىندىق جۇمىستارى ءجۇرىپ جاتىر. قىسىلتاياڭ جاعدايدا قاجەتتى قايىقتار, قۇتقارۋ كەۋدەشەلەرى, موتوپومپالار دايىن.
باتىس قازاقستان وبلىسى
