البەتتە, مول تۇسكەن قاردىڭ جەرگە بەرەر پايداسى شاش-ەتەكتەن. دەسە دە, كەلتىرەر زيانى دا وراسان زور. ەرتە كوكتەمدە كۇن كۇرت جىلىنىپ, وسى قار قاۋىرت ەرىسە, سوڭعى جىلدارى قارعىن سۋدان جاپا شەگىپ كەلە جاتقان وڭىرلەردىڭ ءبىرى – قاراعاندى وبلىسىنا وڭاي بولمايىن دەپ تۇر.
وسىنى ەسكەرگەن جەرگىلىكتى اتقارۋشى بيلىك بيىل كوكتەمگى سۋ تاسقىنىنا ازىرلىك جۇمىستارىن جان-جاقتى جۇرگىزە باستادى. ەڭ الدىمەن سۋ تاسقىنى كەزەڭىندە ەلدى مەكەندەر ءۇشىن قاۋىپ ءتوندىرۋى مۇمكىن 50-گە تارتا گيدروتەحنيكالىق قۇرىلىس نىسانى انىقتالدى. جوعارى دايىندىق رەجىمىن ەنگىزگەندە بۇل جەرلەردە تاۋلىك بويى كەزەكشىلىك ۇيىمداستىرىلادى. سونىمەن قاتار وڭىردە گيدروتەحنيكالىق قۇرىلىستارعا باراتىن جولدار قاردان تازارتىلدى. ءار نىسانعا كاسىپورىن قىزمەتكەرلەرى جاۋاپتى تۇلعا رەتىندە بەكىتىلگەن.
وبلىستا بۇقار جىراۋ اۋدانىنىڭ چكالوۆ اۋىلى سۋ باسۋ قاۋپى جوعارى ايماقتار قاتارىنا كىرەدى. قازىرگى تاڭدا بۇل ەلدى مەكەندى وبلىس جانە تجد باسشىلىعى ەرەكشە باقىلاۋعا العان.
وبلىستىق تجد باستىعى يبراگيم كۇلشىمباەۆ بيىلعى قاڭتار ايىندا قار نورمادان ءۇش ەسە كوپ تۇسكەنىن ايتادى. وسىعان بايلانىستى نۇرا وزەنى باسسەينىندەگى ىلعال قورى 157 پايىزعا دەيىن وسكەن.
– سۋ تاسقىنىنىڭ الدىن الۋ جانە ادامداردىڭ قاۋىپسىزدىگىن قامتاماسىز ەتۋ شارالارىن ءبىز الدىن الا جۇرگىزە باستادىق. قاۋىپتى ايماقتا ورنالاسقان 140 ەلدى مەكەن ماڭىنا قورعانىس ۇيىندىلەرى تۇرعىزىلىپ, گابيوندار ورناتىلعان. بىلتىرعى كوكتەمدە سامارقان سۋ قويماسىنان سەكۋندىنا 620 تەكشە مەتر جىلدامدىقپەن سۋ اققان كەزدە بۇل ۇيىندىلەر ءوز تيىمدىلىگىن كورسەتتى – ەرىگەن قار سۋى ەلدى مەكەندەرگە جەتكەن جوق, – دەگەن مالىمەت بەردى ۆەدومستۆو باسشىسى.
بۇگىندە سامارقان سۋ قويماسىنىڭ سۋ تورابىن باقىلاۋ كۇشەيتىلىپ, مۇندا سۋ اعىزۋ جۇمىستارى جوسپار بويىنشا جۇرگىزىلىپ جاتىر. اقپان ايىنىڭ سوڭىنا دەيىن تاعى 14 ملن تەكشە مەتر سۋ اعىزىلادى. بۇل رەتتە سۋ قويماسىنداعى ىلعالدىڭ ەڭ تومەنگى دەڭگەيى 154 ملن تەكشە مەتردەن تومەن بولماۋى ءتيىس.
قازىرگى تاڭدا «قازگيدرومەت» ماماندارى سۋ تاسقىنى كەزەڭىنە ناقتى بولجام جاساۋ ءۇشىن زەرتتەۋلەر مەن ولشەۋلەر جۇرگىزۋدە.
قاراعاندى وبلىسى
