جيىن بارىسىندا ايداربەك ساپاروۆ سۋبسيديالاۋ ەرەجەسىنە ەنگىزىلەتىن وزگەرىستەر سالانى جاڭعىرتۋ ءۇشىن ۇكىمەت ماقۇلداعان «2017-2021 جىلدارعا ارنالعان اوك دامىتۋدىڭ» مەملەكەتتىك باعدارلاماسىنا ەنگەن وزگەرىستەر مەن تولىقتىرۋلار نەگىزىندە جاسالاتىنىن اتاپ ءوتتى.
«ەلباسى مەن مەملەكەت باسشىسى اۋىل شارۋاشىلىعىن دامىتۋ جونىندە الدىعا قويعان بەس مىندەتتى جۇزەگە اسىرۋ ماقساتىندا سۋبسيديالاۋ ەرەجەسىنە وزگەرىستەر ەنگىزىلەدى. اۋىل شارۋاشىلىعى مينيسترلىگىنەن سالاداعى ەڭبەك ونىمدىلىگىن جوعارلاتۋ, يمپورتقا تاۋەلدىلىكتى تومەندەتۋ, قايتا وڭدەلگەن ءونىمنىڭ ۇلەسىن كوتەرۋ, ونىڭ ەكسپورتى مەن تارتىلعان ينۆەستيتسيا كولەمىن ارتتىرۋ تالاپ ەتىلەدى», - دەدى ا. ساپاروۆ.
ەرەجەگە ەنگىزىلەتىن وزگەرىستەردى تالقىلاۋ قورىتىندىسى بويىنشا اشم ءبىرىنشى ۆيتسە-ءمينيسترى جەرگىلىكتى اتقارۋشى ورگاندار مەن اۋىل كاسىپكەرلەرىنەن مينيسترلىككە ءوز ەسكەرتۋلەرى مەن ۇسىنىستارىن جىبەرۋدى سۇرادى.
وڭىرلەردەن كەلىپ تۇسكەن ۇسىنىستار قارالىپ, تولىقتىرىلعاننان كەيىن جاڭا ەرەجە جوباسى «اتامەكەن» ۇكپ الاڭىندا فەرمەرلەردىڭ بارلىق سالالىق بىرلەستىكتەرىنىڭ قاتىسۋىمەن قايتا تالقىلاناتىن بولادى.
