بىزگە جەتكەن اقپاراتقا سايكەس, كەلىسىمگە 12 اقپاندا ەۋرازيالىق دامۋ بانكى باسقارما توراعاسىنىڭ ورىنباسارى امانگەلدى يسەنوۆ قول قويعان. «جوبانى ەۋروپالىق قايتا قۇرۋ جانە دامۋ بانكى, ەۋرازيالىق دامۋ بانكى جانە يسلام دامۋ بانكى ۇسىناتىن كرەديتورلار سينديكاتى قارجىلاندىرادى. جوبا اياسىندا ەادب 95 ميلليون دوللار بەرەدى», دەلىنگەن ەادب ءباسپاسوز ءبولىمى تاراتقان اقپاراتتا.
جوبا يندۋستريا جانە ينفراقۇرىلىمدى دامىتۋ مينيسترلىگى مەن ءتورت كومپانيانىڭ كونسورتسيۋمى اراسىندا جاسالعان كونتسەسسيالىق كەلىسىم نەگىزىندە جۇزەگە اسىرىلادى: Alsim Alarko Sanayi Tesisleri ve Ticaret A.Ş., Makyol İnşaat Sanayi Turizm ve Ticaret A.Ş., SK Engineering & Construction Co., Ltd. جانە Korea Expressway كورپوراتسياسى.
كەلىسىم «قۇرىلىس - بەرۋ - پايدالانۋ» شارتتارىمەن 20 جىلعا جاسالدى.
يندۋستريا جانە ينفراقۇرىلىمدى دامىتۋ مينيسترلىگىنىڭ مالىمەتىنشە, جوبانىڭ قۇنى 150 ميلليارد تەڭگەنى قۇرايدى.
جولدىڭ ۇزىندىعى التى جولاقتى قوزعالىسپەن 66 شاقىرىم.
38 كوپىر وتكەلىن جانە جول وتپەلەرىن, سونىمەن قاتار جولدىڭ جانە ونىڭ قۇرىلىمدارىنىڭ جوعارى ساپاسىن قامتاماسىز ەتۋ ءۇشىن الدىڭعى قاتارلى تەحنولوگيالاردى قولدانۋ ارقىلى سالىناتىن جەتى كولىكتىك وتكەلدى قامتيدى. جوبا دايىن وبەكتىنى مەملەكەت مەنشىگىنە قابىلداعاننان كەيىن عانا ينۆەستورلاردىڭ شىعىندارىن رەسپۋبليكالىق بيۋدجەتكە اۋىرتپالىقسىز بىرتىندەپ وتەۋدى كوزدەيدى.
2018-2019 جىلدارى جوبالىق-سمەتالىق قۇجاتتامانى ازىرلەۋ جانە باسقا دا دايىندىق جۇمىستارى جۇرگىزىلدى. بۇگىنگى تاڭدا الماتى 26,5 كم جولدا قۇرىلىس-مونتاج جۇمىستارىن ءجۇرىپ جاتىر.
جول اقىلى بولادى. جەڭىل اۆتوموبيلدەر مەن جۇك كولىكتەرىنە ءارتۇرلى تاريفتەر بولادى. الدىن الا زەرتتەۋلەر بويىنشا 15 جىل ىشىندە 231, 25 جىل ىشىندە 570 ملرد تەڭگە جينالادى.
ەستەرىڭىزگە سالا كەتەيىك, بۇدان بۇرىن ەلباسى نۇرسۇلتان نازارباەۆ ۇلكەن الماتى اينالما جولىنىڭ قۇرىلىسىن باستاۋعا تاپسىرما بەرگەن بولاتىن. بۇعان دەيىن بۇرىنعى ينۆەستيتسيالار جانە دامۋ ءمينيسترى جەڭىس قاسىمبەك قۇرىلىستىڭ ۇزاق ۋاقىتقا كەشىكتىرىلۋ سەبەبىن, الماتى قالاسىنىڭ ەكس-اكىمى باۋىرجان بايبەك ءوز كەزەگىندە قۇرىلىسقا 1,5 ميلليارد دوللاردان استام قاراجات كەتەتىنىن ايتقان بولاتىن.
اتاپ وتسەك, «ۇلكەن الماتى اينالما اۆتوكولىك جولى» جوباسى ۇزىندىعى 66 شاقىرىمدىق اۆتوجولىن سالۋ مەن ىسكە قوسۋعا باعىتتالعان.
جابىندىسى تسەمەنت-بەتوندى اۆتوكولىك جولى 4 جانە 6 جولاقتى بولماق. جوبانىڭ قۇرامىنا كولىك جول ايىرىعى, كوپىرلەر, ەستاكادالار, جول كورسەتكىشتەرى جانە باسقالارى ەنگىزىلگەن.
