– بۇل مەموراندۋمنىڭ ءمانىسى – ەلىمىزدە قابىلدانعان مەملەكەتتىك باعدارلامالاردى ايماقتا جۇزەگە اسىرۋ, قولدانىستاعى زاڭناماعا سايكەس ادىستەمەلىك كومەك كورسەتۋ, كورنەكى اقپارات جانە جارناما سالاسىنداعى ءماتىن ساۋاتتىلىعىن بىرىزدەندىرۋ ەدى. مەموراندۋم مەرزىمى 5 جىلعا ارنالعان. ايتا كەتەيىن, ءبىزدىڭ وسى باستامامىز 2019 جىلدىڭ سوڭىندا وتكەن Nur Otan پارتياسى جانىنداعى «Miras» رەسپۋبليكالىق قوعامدىق كەڭەسىنىڭ وتىرىسىندا ەل كولەمىندە تاجىريبە رەتىندە تاراتىلدى, – دەيدى باتىس قازاقستان وبلىستىق تىلدەردى دامىتۋ باسقارماسىنىڭ باسشىسى ايگۇل مىڭباەۆا.
مىنە, وسى مەموراندۋم اياسىندا جاقىندا ورال قالاسىندا «ساۋاتتى جارناما – ءتىل تازالىعىنىڭ كورىنىسى» تاقىرىبىندا سەمينار-ترەنينگ ءوتتى. ونى باتىس قازاقستان وبلىستىق تىلدەردى دامىتۋ باسقارماسى مەن وبلىستىق كاسىپكەرلەر پالاتاسى كورنەكى اقپارات سالاسىنداعى ىنتىماقتاستىقتى دامىتۋ جانە ءوزارا تۇسىنىستىككە ىقپال ەتۋ ماقساتىندا ۇيىمداستىرعان.
«تيىمدىلىكتى ارتتىرۋعا يكەمدى داعدىلار» اتتى ترەنينگپەن باستالعان شارا كورنەكى اقپارات جانە جارناما سالاسىنداعى ءماتىن ساۋاتتىلىعىن ساقتاۋ جولىن تالقىلاۋمەن جالعاستى. سەمينارعا وبلىستىق تىلدەردى دامىتۋ باسقارماسى مەن كاسىپكەرلەر پالاتاسىنان بولەك, وبلىستىق ادىلەت دەپارتامەنتى, «نۇر وتان» حدپ بقو فيليالى, ورال قالالىق اكىمدىگى, ورال قالالىق پروكۋراتۋراسى, مەملەكەتتىك كىرىستەر دەپارتامەنتى, «DAMU» كاسىپكەرلىكتى دامىتۋ قورى, كاسىپكەرلەر قاۋىمداستىعى وكىلدەرى جانە جۋرناليستەر قاتىستى.
جيىندا باتىس قازاقستان وبلىستىق «قازاق ءتىلى» قوعامىنىڭ توراعاسى التىنبەك ابدۇلمانوۆ «كورنەكى اقپارات ءتىلى – قوعام ءتىلىنىڭ بارومەترى» تاقىرىبىنا بايانداما جاساپ, كورنەكى اقپاراتتىڭ ساۋاتتى بولۋى تۋرالى ءسوز قوزعادى. ورال قالالىق پروكۋراتۋراسىنىڭ ءبولىم پروكۋرورى اسەل زايدۋللينا جارناما مەن كورنەكى اقپاراتتاعى كەمشىلىكتەردى زاڭ تۇرعىسىنان باعالاپ بەردى. ال ورال قالالىق مادەنيەت جانە تىلدەردى دامىتۋ ءبولىمىنىڭ باسشىسى سەرىك قايىرليەۆ ورال قالاسىنداعى كورنەكى اقپاراتتار مەن جارنامالاردا ءتىل نورمالارىنىڭ ساقتالۋ جاعدايىنا شولۋ جاسادى.
مىسال ءۇشىن ايتا كەتسەك, وتكەن جىلى تىلدەردى دامىتۋ باسقارماسى «قازاقستان رەسپۋبليكاسىنداعى ءتىل تۋرالى» زاڭنىڭ 21-بابى جانە «جارناما تۋرالى» زاڭدارى تالاپتارىنىڭ كورنەكى اقپارات قۇرالدارىن راسىمدەۋدە ساقتالۋ ماسەلەسى بويىنشا «ساۋاتتى جارناما – قالا كوركى» اتتى اكتسيا ۇيىمداستىرعان بولاتىن.
وسى اكتسيا اياسىندا ورال قالاسى كاسىپكەرلەرىنە كورنەكى اقپاراتتاردا ءتىل زاڭدىلىعىن ساقتاۋ ءۇشىن Whats App مەسسەندجەرى ارقىلى ۇنەمى كومەك كورسەتىلدى. جىل بويى «قازاق ءتىلى» قوعامدىق قورى, كاسىپكەرلەر پالاتاسى جانە جەرگىلىكتى باق وكىلدەرى 130 كاسىپكەرلىك نىسانعا ادىستەمەلىك كومەك كورسەتكەن بولسا, «جەدەل جەلى» ارقىلى 137, Whats App مەسسەندجەرى ارقىلى 192, بارلىعى 459 كورنەكى اقپاراتقا ادىستەمەلىك كومەك كورسەتىلگەن.
بۇعان قوسا باسقارمانىڭ الەۋمەتتىك تاپسىرىسى اياسىندا «Tilge qurmet» ءتىل ينسپەكتسياسى جۇمىس جاسايدى. كورنەكى اقپاراتتاردىڭ ءتىل نورمالارىنا سايكەس مەملەكەتتىك جانە ورىس تىلدەرىندە ورنالاستىرۋ بويىنشا ورال قالاسىنداعى 3 داڭعىل مەن 492 كوشەدە ورنالاسقان 2178 كاسىپكەرلىك نىسانىنا ادىستەمەلىك كومەك كورسەتىلىپ, كارتوتەكا تولتىرىلعان. كورنەكى اقپاراتتا كەمشىلىك انىقتالعان 908 كاسىپكەرلىك نىسانىنا وبلىستىق «قازاق ءتىلى» قوعامدىق بىرلەستىگىنىڭ ەسكەرتۋ حاتى تاپسىرىلىپ, ادىستەمەلىك كومەك كورسەتىلگەن. مىنە, وسىنىڭ ناتيجەسىندە قازىرگى تاڭدا بۇل كاسىپكەرلىك نىساندارىنىڭ كورنەكى اقپاراتى تۇزەتىلدى.
كورنەكى اقپاراتتى ايتقاندا ەلدى مەكەن, كوشە اتاۋلارىنا دا سوقپاي كەتە المايمىز. رەسەيدىڭ بەس وبلىسىمەن شەكتەسەتىن باتىس قازاقستان وبلىسىندا بۇل باعىتتا اتقارىلار جۇمىس ءالى دە كوپ. دەگەنمەن, مەملەكەت باسشىسى ق.توقاەۆتىڭ 2019 جىلعى 27 قىركۇيەكتەگى №19-32-20.357 تاپسىرماسىنا سايكەس ونوماستيكالىق اتاۋلاردى رەتكە كەلتىرۋ جانە يدەولوگيالىق تۇرعىدان ەسكىرگەن اتاۋلاردى ۇلتتىق تانىمعا جاقىن اتاۋلارمەن اۋىستىرۋ باعىتىندا بىرقاتار جۇمىس جۇرگىزىلدى. باتىس قازاقستان وبلىستىق ونوماستيكا كوميسسياسى 1 اۋىلدىق وكرۋگ, 6 ەلدى مەكەن, 200 كوشە اتاۋىن وزگەرتۋگە وڭ قورىتىندى بەردى. سونداي-اق قازاقستان رەسپۋبليكاسى ۇكىمەتىنىڭ 2019 جىلعى 20 جەلتوقسانداعى №945 قاۋلىسى نەگىزىندە اقجايىق, ءبورلى, قازتالوۆ اۋداندارى مەن ورال قالاسىنىڭ 12 ءبىلىم بەرۋ مەكەمەسىنىڭ اتاۋلارى وزگەرتىلىپ, تاريحي تۇلعالاردىڭ ەسىمى بەرىلدى. دەگەنمەن, وڭىردەگى بىرنەشە اۋدان ورتالىعىنىڭ, ورال قالاسى ماڭىنداعى ەلدى مەكەندەردىڭ وتارلىق كەزەڭنەن قالعان ورىسشا اتاۋلارىن اۋىستىرۋ ءالى كەزەگىن كۇتىپ تۇر.
باتىس قازاقستان وبلىسى
