قارت مايدانگەر تۇرىپ جاتقان ءۇيدىڭ جانىنان ۇلتتىق ۇلان ساربازدارى جاۋىنگەرلىك تۋمەن, اسكەري وركەستردىڭ سۇيەمەلدەۋىمەن ساپ تۇزەپ ءوتىپ, ارداگەرگە ەرەكشە ءىلتيپات, قۇرمەت كورسەتتى.
جاسى توقسان توعىزعا كەلىپ قالعان قاريانىڭ ۇيىنە ارنايى اتباسىن بۇرعان ۇلتتىق ۇلان باس قولباسشىسىنىڭ ورىنباسارى, گەنەرال-مايور مۇحامەتقالي ساتوۆ پەن قازاقستاندىق ءىىو مەن ۇلتتىق ۇلان ارداگەرلەر كەڭەسىنىڭ توراعاسى ميليتسيا گەنەرال-مايورى ومىرزاق بولسامبەكوۆ جەڭىس مەرەكەسىمەن قۇتتىقتادى. ىشكى ىستەر ءمينيسترى مەن ۇلتتىق ۇلان باس قولباسشىسىنىڭ اتىنان سىي-سياپات كورسەتىلدى.
شارا بارىسىندا اسكەري وركەستر سوعىس جىلدارىنداعى اندەردى ورىنداپ, مايدانگەردىڭ كوڭىلىن ءبىر سەرپىلتىپ تاستادى.
قايىرلى ۋاتاي ۇلى شىعىس قازاقستان وبلىسى سامار اۋدانىندا دۇنيەگە كەلگەن. ەڭبەك جولىن 1940 جىلى شىعىس قازاقستان وبلىسى قۇلجا ورتا مەكتەبىندە مۇعالىم بولىپ باستاعان. 1941 جىلى قازان ايىندا پانفيلوۆ ديۆيزياسىنىڭ 23-ءشى گۆارديالىق پولكىنە قىزىل اسكەر جاۋىنگەرى بولىپ الىنعان.
ارداگەر سوعىسقا باسىنان اياعىنا دەيىن قاتىسقان ەكەن. 8-ءشى گۆارديالىق اتقىشتار ديۆيزياسى قۇرامىندا مەرگەن, پۋلەمەتشى, بارلاۋشى بولىپ ازاماتتىق بورىشىن وتەگەن.
– مەن كەڭەس وداعىنىڭ باتىرى مالىك عابدۋللينمەن ءبىر روتادا بولدىم, بەلارۋس, پولشا, ەستونيانى ازات ەتۋگە قاتىستىم. 1943 جىلى اقپاندا رجەۆتەگى قاندى مايداندا اۋىر جارالانىپ, جەڭىستى درەزدەندە قارسى الدىم, – دەيدى مايدانگەر.
قايىرلى اتا سوعىستان كەيىن سامار اۋداندىق اتقارۋ كوميتەتىندە ءبولىم مەڭگەرۋشىسى بولىپ ىستەدى. ءارى قاراي اۋداندىق تۇتىنۋشىلار وداعىنىڭ جۇيەسىندە باسشىلىق لاۋازىمدارىندا بولعان. 1970-1983 جىلدارى ارالىعىندا الماتىداعى قوعامدىق تاماقتاندىرۋ جۇيەسىندە شارۋاشىلىق ەسەپتەرىنىڭ ديرەكتورى بولدى. 1983 جىلى قۇرمەت دەمالىسىنا شىقتى, بەس بالا تاربيەلەپ ءوسىردى.
ۇلى وتان سوعىسىندا كورسەتكەن ەرلىكتەرى ءۇشىن «قىزىل جۇلدىز» جانە ءىى دارەجەلى «وتان سوعىسىنىڭ» وردەنىمەن, «ەرلىگى ءۇشىن», «ماسكەۋدى قورعاعانى ءۇشىن» جانە باسقا دا كوپتەگەن مەدالمەن ماراپاتتالعان.
– سوعىستان كەيىن ءۇيلى-باراندى بولىپ, 5 بالا تاربيەلەپ ءوسىردىم, بۇگىنگى تاڭدا ۇرپاعىمنان ون نەمەرە, ون ءۇش شوبەرە ءسۇيىپ وتىرمىن. اللانىڭ بەرگەنىنە رازىمىن. عاسىرلىق جاسىما تاياۋ قالدىم. مەنىڭ سىزدەرگە دەگەن العىسىم شەكسىز. ەستافەتانىڭ اتريبۋتى رەتىندە كەڭەس وداعىنىڭ باتىرى گەنەرال-مايور ي.ۆ.پانفيلوۆ اتىنداعى ايگىلى 8-ءشى گۆارديالىق ديۆيزيانىڭ جاۋىنگەرلىك تۋىنىڭ كوشىرمەسى الىنىپتى. سوعىستا وسى ديۆيزيانىڭ قاتارىندا بولعان سوڭ بۇل مەن ءۇشىن ەرەكشە قۋانىش بولدى. ەندىگى ۋاقىتتا ونداي زۇلمات بولماسىن. وسىنداي ماعان كورسەتكەن قۇرمەتتەرىڭىزگە ۇلكەن العىسىمدى ءبىلدىرىپ, اق باتامدى بەرەمىن, دەپ ءسوزىن اياقتادى قاريا.
قۋانىش قوجاحمەتوۆ
الماتى
