مەملەكەتتىك قولداۋدىڭ ارقاسىندا جاستاردىڭ جۇمىسقا ورنالاسۋىنا, ءوز قابىلەت-قارىمدارىن شىڭداۋعا, تاجىريبە الۋعا ۇلكەن مۇمكىندىكتەر جاسالدى. جاستار جىلىندا جۇزەگە اسىرىلعان باعدارلامالار نەگىزىندە جاس ماماندار تۋعان جەردىڭ تۇعىرىن بيىكتەتۋگە اتسالىسىپ ءجۇر. سولاردىڭ قاتارىندا ەلىمىزدىڭ تۇكپىر-تۇكپىرىندە ءبىلىم الىپ, اق حالاتتى ابزال جان بولام دەپ ارمان قۋعان جاستار جامبىل وبلىسى, تۇرار رىسقۇلوۆ اۋدانى, قۇلان اۋىلىنىڭ ورتالىق اۋرۋحاناعا ءوز ماماندىقتارى بويىنشا جۇمىسقا ورنالاسقاندىعىن ايتۋعا بولادى. «جاس كەلسە – ىسكە» دەگەندەي, اۋرۋحانا ۇجىمى ەلدىڭ بولاشاعىنا قامقورلىق جاساپ, ولاردىڭ وقۋ ورنىندا العان ءبىلىمىن ءىس جۇزىندە بىلىكتىلىكپەن يگەرۋىنە جان-جاقتى جاعداي تۋعىزىپ وتىر.
بۇگىندە وسى جاستار ەڭبەك ەتىپ جاتقان ورتالىق اۋرۋحانادا 795 ادام جۇمىس ىستەيدى. ولاردىڭ قاتارىندا 95 دارىگەر, 388 ورتا بۋىندى قىزمەتكەر, 114 كىشى بيكە جانە باسقا ساناتتاعى 98 ادام قىزمەت اتقارادى. قازىرگى ۋاقىتتا اۋرۋحانا تسيفرلاندىرۋ جۇيەسىنە كوشكەن. زامان تالابىنا ساي ولار اۋرۋلاردى باسقارۋ (پۋز), «دامۋمەد», اۆتوماتتاندىرىلعان اقپاراتتىق جۇيە (ايس) سىندى باعدارلامالاردى جۇرگىزىپ, ناتيجەلى جۇمىس اتقارۋدا. ياعني, ناۋقاستاردىڭ كەزەگىن بولدىرماۋ ماقساتىندا سىرقات جانداردى تىركەۋ جۇمىستارى دا اۆتوماتتاندىرىلعان. جانىنا شيپا ىزدەپ كەلگەن ءاربىر جانعا قولايلى جاعداي جاسالعان دەپ ايتۋعا بولادى.
ەلباسى باستاماسىمەن قولعا الىنعان «ديپلوممەن – اۋىلعا!» باعدارلاماسىن ناتيجەلى پايدالانۋدا اۋرۋحانا باسشىلارى ءبىلىمدى جاستارعا ۇلكەن قامقورلىق كورسەتۋدە. اسىرەسە اۋرۋحانانىڭ باس دارىگەرى كىسىلىگى مەن كىشىلىگى مول ش.مىرزاليەۆكە, سونداي-اق ر.جۇمانقۇلوۆاعا, ر.ەستەمەسوۆاعا, گ.ۇكىباەۆاعا, ق.نييازبەكوۆكە, سونىمەن قاتار وسى ۇجىمدا ەڭبەك ەتىپ جاتقان ارىپتەستەرىمىزگە جاس ماماندار اتىنان شەكسىز العىسىمىزدى بىلدىرگىمىز كەلەدى.
ۇلبوسىن جيەنباەۆا,
ت.رىسقۇلوۆ اۋداندىق ورتالىق ەمحانانىڭ پسيحولوگى
جامبىل وبلىسى
