جالپى, قازاقستان قاي كەزدە دە قۇشاعىن ايقارا اشىپ, ەلىمىزدە مەكەن ەتكەن ۇلتتار دياسپوراسىنىڭ بارلىعىنا تەڭدەي قامقورلىق كورسەتىپ كەلەدى. باۋىرىنداي جاقىن تارتتى, ەشقانداي ۇلتتى شەتتەتپەدى. ەگەر قازاقتان قورلىق كورىپ, جاعدايى جان توزگىسىز بولسا – ول ۇلتتاردىڭ ءبىرى دە بۇل جەردى تۇراقتاپ قالماس ەدى. جايلى قونىس ىزدەپ, جان-جاققا باس ساۋعالار ەدى. قازاق جەرى قۇتتى بولعاندىقتان دا ارقاسىن كەڭگە جايىپ, ەركىن قونىستاندى. ءتىپتى قازاقتاردىڭ وزدەرىنەن ارتىق قامقورلىق كوردى دەسەك تە جالعان ەمەس. سوندىقتان بۇل جەردە كىنالىنى بىرجاقتى قاراۋعا بولمايدى.
مۇنداي جاعدايدا مەن ءبىر-اق دۇنيەنى ايتقىم كەلەدى: ۇلتتار دياسپوراسى اراسىنداعى ءتارتىپ جۇمىستارىن كۇشەيتۋ كەرەك. بارلىق جاعىنان قازاقتى ۇنەمى كىنالى ەتىپ, كىشىرەيتە بەرۋىمىز ءجون ەمەس. وزگە ۇلتتاردىڭ دا ءبىر ءسات قازاققا دارقان پەيىلى, قوناقجاي كوڭىلى ءۇشىن ايتقان راحمەتىن سەزىنىپ وتىرۋدىڭ ءاربىر قازاق ازاماتى ءۇشىن ماڭىزى زور. سوندا دوستىق بىرلىگىمىز نىعايادى. وزگە ۇلتتار قازاق جەرىندەگى ءوز ورنى مەن مارتەبەسىن سەزىنەتىن بولادى. سوندىقتان دا مەن مەملەكەت باسشىسى قاسىم-جومارت توقاەۆتىڭ ۇستانعان ساياساتىن تولىق قولدايمىن. ءبىز ەڭ اۋەلى ەلىمىزدىڭ بىرلىگىن, تىنىشتىعىن ويلاۋىمىز قاجەت. بەيبىت ءومىر باستى ۇستانىمىمىز بولۋى ءتيىس. قازاققا ءدال قازىرگى ۋاقىتتا ەلدىڭ بەرەكە-بىرلىگى, تىنىشتىعى قىمبات. وسىنى ۇمىتپاساق ەكەن.
انەس ساراي,
جازۋشى
