بۇگىنگە دەيىن قىتاي حالىق رەسپۋبليكاسىنىڭ پروۆينتسيالارىندا كوروناۆيرۋستىق پنەۆمونيا جۇقتىرعان 40 مىڭنان استام (42 638) ادام تىركەلىپ, ونىڭ 1016-سى قايتىس بولعان جانە 3 مىڭنان استام ناۋقاس (3 996) ەمدەلىپ شىققان.
«الەمنىڭ 27 ەلىندە 448 ادامنان كوروناۆيرۋستىق ينفەكتسيا انىقتالدى. دەگەنمەن, قىتايدا اتالعان ۆيرۋستىڭ تارالۋ قارقىنى 31 قاڭتار مەن 11 اقپان ارالىعىندا 3,6 ەسەگە تومەندەدى (22 پايىزدان 6,1 پايىزعا دەيىن). ياعني, قىتايدا ەپيدەميولوگيالىق جاعدايدىڭ تۇراقتالىپ كەلە جاتقانى بايقالادى. ال قازاقستاندا كوروناۆيرۋستىق ينفەكتسياعا قارسى كۇرەس شارالارى اياسىندا 6 قاڭتاردان بەرى مەملەكەتتىك شەكارالارداعى پۋنكتتەردە 260 885 ادام تەكسەرۋدەن ءوتتى, ونىڭ 30 852-ءسى قىتايدان كەلگەن. جالپى, دەنە قىزۋى جوعارى جانە جەدەل رەسپيراتورلىق-ۆيرۋستىق ينفەكتسيانىڭ سيمپتومدارى بار 140 ادام اۋرۋحاناعا جاتقىزىلدى, ونىڭ 113-ءى ەمدەلىپ شىقتى, 27-ءسى ستاتسيوناردا. ناۋقاستاردىڭ ەشقايسىسىنان كوروناۆيرۋستىق ينفەكتسيا انىقتالعان جوق. مەديتسينالىق ۇيىمدار قىتايدان كەلگەن 23 059 ادامنىڭ دەنساۋلىعىنا تۇراتىن جەرى بويىنشا 14 كۇن بويى مونيتورينگ جاسايدى. بۇگىندە ينكۋباتسيالىق كەزەڭنىڭ اياقتالۋىنا بايلانىستى 15 478 ادام مونيتورينگتەن الىندى, 8 690 ادام مەديتسينالىق باقىلاۋدا تۇر. ەشكىمدە كوروناۆيرۋستىق ينفەكتسياعا كۇدىك تىركەلگەن جوق», دەدى باس مەملەكەتتىك سانيتارلىق دارىگەر.
سونىمەن قاتار ول پرەمەر-ءمينيستردىڭ ورىنباسارىنىڭ توراعالىعىمەن ەلىمىزدە كوروناۆيرۋستىق ينفەكتسيانىڭ پايدا بولۋى مەن تارالۋىنا جول بەرمەۋ جونىندەگى ءىس-شارالاردى ۇيلەستىرۋ جونىندە ۆەدومستۆوارالىق كوميسسيا قۇرىلعانىن, ونىڭ قۇرامىنا بارلىق مۇددەلى مەملەكەتتىك ورگاندار مەن وبلىستاردىڭ جانە نۇر-سۇلتان, الماتى جانە شىمكەنت قالالارىنىڭ اكىمدىكتەرى كىرگەنىن تىلگە تيەك ەتىپ, كوروناۆيرۋستىق ينفەكتسيانىڭ اكەلىنۋى مەن تارالۋىنا جول بەرمەۋ جونىندەگى ءىس-شارالار جوسپارى ىسكە اسىرىلىپ جاتقانىن العا تارتتى.
«قحر ۋحان قالاسىنان رەسەي فەدەراتسياسىنا (تۇمەن وبلىسى – 3 ادام) جانە وزبەكستان رەسپۋبليكاسىنا (5 ادام) ەۆاكۋاتسيالانعان قازاقستان رەسپۋبليكاسى ازاماتتارىنىڭ جاعدايى قاناعاتتانارلىق, دەنە قىزۋى جوق, جرۆي بەلگىلەرى مەن شاعىمدارى انىقتالعان جوق. سونداي-اق بۇگىن تاڭەرتەڭگى ساعات 6:05-تە نۇر-سۇلتان قالاسىنا قىتايدىڭ 36 قالاسىنان 217 قازاقستاندىق ازامات كەلدى. بارلىعى مەديتسينالىق جانە زەرتحانالىق تەكسەرۋدەن ءوتۋ ءۇشىن كەمىندە 3 كۇن مەرزىمگە اۋرۋحاناعا جەتكىزىلدى. دەنساۋلىق جاعدايى قاناعاتتانارلىق», دەدى جانداربەك بەكشين.
