«رۋحاني جاڭعىرۋ» باعدارلاماسى اياسىندا, سونداي-اق ۇلى ابايدىڭ 175 جىلدىق مەرەيتويى قارساڭىندا وتكەن شارا ەلىمىزدىڭ رۋحاني قۇندىلىعى – قىز ۇلاعاتىن دارىپتەۋ ماقساتىندا كوپشىلىكتىڭ كوڭىلىنەن شىقتى. بايقاۋعا قاتىسقان ارۋلار ۇلى ابايدىڭ كوڭىل تۇكپىرىندە ماڭگى مۇنارتىپ قالعان توعجان بەينەسىن اينىتپاي جەتكىزۋدە ءوز ونەرلەرىن ءار قىرىنان تانىتا ءبىلدى.
سايىستىڭ العاشقى كەزەڭىندە ءار قاتىسۋشى ءوزىن ولەڭمەن تانىستىرىپ وتسە, كەلەسى كەزەڭدە ابايدىڭ ويلى ولەڭدەرى مەن قارا سوزدەرىنەن ءۇزىندى وقۋدان باق سىناستى. «ونەرگە اركىمنىڭ-اق بار تالاسى» دەمەكشى كورەرمەندەر قاتىسۋشىلاردىڭ شىرقاي ءان ايتىپ, مىڭ بۇرالا بي بيلەگەن تاڭعاجايىپ ونەرلەرىنە ەرەكشە ءتانتى بولدى.
قىزىقتى ءارى تارتىستى وتكەن سايىستى سارالاعان قازىلار القاسى بايقاۋ قورىتىندىسى بويىنشا قاراتال ورتا مەكتەبىنىڭ وقۋشىسى اياجان ماناربەكقىزىن باس جۇلدەگە لايىق دەپ تانىدى.
ۇلتتىق بولمىسىمىز بەن رۋحاني قۇندىلىقتارىمىز دارىپتەلگەن بايقاۋدىڭ جوعارى دەڭگەيدە وتۋىندە اۋداندىق مادەنيەت ءۇيىنىڭ رەجيسسەرى الما سۇلەيمەنوۆا مەن قاراتال ورتا مەكتەبىنىڭ مۇعالىمى گۇلدەن سايرانوۆانىڭ ەڭبەكتەرىنىڭ ەرەكشە ەكەندىگىن اتاپ وتكەن ءجون. سونىمەن قاتار حاكىم ولەڭدەرىن جاتقا وقىعان جۇرگىزۋشىلەر زايسان تەحنولوگيالىق كوللەدجىنىڭ ستۋدەنتتەرى, «جاستار» پوەزيا تەاترىنىڭ مۇشەلەرى الىشەر سليامبەكوۆ پەن ايقىن قۋاندىق جانە «جاستار» پوەزيا تەاترىنىڭ وزگە دە جاس ونەرپازدارى ونەرلەرىمەن كورەرمەندەرىن ءتانتى ەتتى.
اسەرلى كەشتىڭ كۋاسى بولىپ, اقىلىنا كوركى ساي, يناباتتى دا يبالى قىزدارىمىزدىڭ ونەرىنە سۇيسىندىك. ۇلى اباي جىرلاپ وتكەن, ەسىمى ماحاببات پەن سۇلۋلىقتىڭ سيمۆولىنا اينالعان توعجانداي قىزدارىمىز كوپ بولعاي دەگىمىز كەلەدى.
نۇرگۇل حالىقوۆا,
جۋرناليست
شىعىس قازاقستان وبلىسى,
زايسان اۋدانى
