ادەتتە, وبلىستىڭ تۋريستىك الەۋەتىن الاكول مەن بالقاش كولىنە قاتىستى باعالاۋعا بەيىلمىز. بىراق وڭىردەگى قىسقى ءتۋريزمنىڭ دامىپ وتىرعانىن ايتپاي كەتۋ ادىلەتسىزدىك بولار ەدى. وبلىستا قىسقى دەمالىس نىساندارى ورنالاسقان ەڭبەكىشقازاق, سارقان, تالعار, كەگەن, ۇيعىر اۋداندارىنىڭ سالانى وركەندەتۋگە قوساتىن ۇلەسى مول ەكەن. اسىرەسە ءوڭىردىڭ وڭتۇستىك بولىگىندە ورنالاسقان ەڭبەكشىقازاق اۋدانىنا بىلتىردىڭ وزىندە 76 مىڭنان اسا تۋريست دەمالۋعا كەلگەن. اۋداندا 10 قوناقۇي, 3 دەمالىس ءۇيى, 3 ساۋىقتىرۋ لاگەرى, 2 اڭشى ءۇيى جانە 2 دەمالىس ورنى مەيماندار ءۇشىن جۇمىس ىستەپ تۇر. بيىل قىزمەت كورسەتۋ ساپاسىن ارتتىرۋ ماقساتىندا ءتيىستى جۇمىستار جۇرگىزىلىپ, تۋريزم سالاسىنداعى ماماندار ءۇشىن تەگىن ساباقتار وتكىزىلۋدە. دەمالۋشىلار تابيعي قورىقتارعا, مۇراجايلارعا, ارحەولوگيالىق ەسكەرتكىشتەرگە بارىپ, شاعىن حايۋاناتتار باعىن ارالاي الادى. بۇل ماقساتتا اۋداندا 12 تۋريستىك باعىت بەلگىلەنگەن.
جالپى, ەكونوميكانىڭ دامۋىندا ءتۋريزمنىڭ الار ورنى ەرەكشە. وسى ورايدا سارقان اۋدانىنداعى «جوڭعار الاتاۋى» مەملەكەتتىك ۇلتتىق تابيعي پاركى» مەملەكەتتىك مەكەمەسىنىڭ 11 ەكولوگيالىق جانە مادەني-تاريحي تۋريستىك باعىتى بار. بىلتىر وسى باعىتتار ارقىلى 1500 مەيمان ءجۇرىپ ءوتىپ, اسەم تابيعات اياسىندا دەمالىپ قايتقان. اۋداننىڭ ءمولدىر سۋى, جۇپار ءيسى ءاربىر جاندى ەرىكسىز باۋرايتىنى انىق. سوندىقتان بالقاش كولى جاعالاۋىندا دا دەمالۋشىلار سانى كۇننەن-كۇنگە ارتىپ كەلەدى. تەك وتكەن جىلدىڭ وزىندە 17 دەمالىس اۋماعىندا 35 مىڭ تۋريست دەمالىپ قايتقان.
مۇنان بولەك, جەتىسۋداعى جەراستى سۋىنان شيپا ىزدەۋشىلەر قاتارى ءوسىپ وتىر. اسىرەسە ىستىق سۋى بار دەمالىس ورىندارىنا كەلەتىن تۋريستەر سانى دا جىل سايىن كوبەيۋدە. قازىرگى تاڭدا ۇيعىر اۋدانىندا 51 دەمالىس ورنى جۇمىس ىستەيدى. ىستىق قايناردىڭ سۋى مينەرالدى زاتتارعا باي ءارى ەمدىك قاسيەتكە يە. جۇرەك-قان تامىرلارى اۋرۋلارىنا ەم بولاتىن سۋعا شومىلۋ ءۇشىن بىلتىر 80 مىڭعا تارتا تۋريست ىستىق سۋى بار دەمالىس ورىندارىنا بارعان.
ال تالعار اۋدانىندا بۇگىنگى تاڭدا 28 تۋريستىك نىسان بار. بيىل تاعى بىرەۋى اشىلادى دەپ كۇتىلۋدە. 2019 جىلى 85 مىڭنان استام مەيمان ايماقتىڭ تۇمسا تابيعاتىن كورىپ, دەمالىپ قايتقان. ونىڭ ءبىر مىڭى – شەتەلدىك تۋريستەر. بيىل شەتەلدەن كەلگەن قوناقتار سانىن 1050 ادامعا دەيىن جەتكىزۋ جوسپارلانىپ وتىر. سونىمەن قاتار اۋداندا قىسقى ءتۋريزمدى دامىتۋ باعىتىندا «Oi-Qaragai – Lesnaya Skazka» تاۋلى كۋرورتتىق-قوناقۇيى دەمالىس ورنىن ودان ءارى دامىتۋعا باعىتتالعان «اپورت-اقتاس» تاۋ شاڭعى كۋرورتىنىڭ قۇرىلىسى ءجۇرىپ جاتىر.
جەتىسۋداعى تاۋ ءتۋريزمىن دامىتۋدا «كولساي كولدەرى» مەملەكەتتىك ۇلتتىق پاركىنىڭ دە الاتىن ورنى ەرەكشە. الەمدەگى تاڭعاجايىپ سۇلۋلىقتى ءبىر وزىنە جيناعان جالعىز كول كولسايدى تاماشالاۋ ءۇشىن بىلتىر 3 مىڭعا جۋىق تۋريست كەلگەن. بۇندا دەمالۋعا كەلگەندەر ايناداي كولدىڭ ايدىنىن, تىنىشتىعى مەن اسەمدىگىن, عاجايىپ تاۋلارى مەن كوز تارتار ورمانىن قايتا تاماشالاۋعا ىنتىق بولىپ تۇرارى اقيقات. سوندىقتان دا اسەم جەرگە دەمالۋعا كەلگەن قوناقتار ءۇشىن كول جاعاسىندا 12 قوناقۇي بوي كوتەرىپ, ساپالى قىزمەت كورسەتۋدە.
– تۋريزم – تابىس كوزى عانا ەمەس, قازاق مادەنيەتىن الەمگە تانىتۋدىڭ دا ءبىر جولى. ءبىز ءوز تاراپىمىزدان تۋريستىك ايماقتاردىڭ ينفراقۇرىلىمىن جاساقتاۋعا كوڭىل ءبولىپ وتىرمىز. الاكول جاعالاۋى بۇرىن قانداي ەدى, قازىر قانداي؟ دەمالۋشىلار سانى جىل سايىن كوبەيۋدە. 2019 جىلى تۋريستەر سانى 2 ملن ادامعا جەتتى. جالپى, 2025 جىلى الماتى وڭىرىنە كەلەتىن بولجامدى تۋريستەر لەگى 4 ملن ادامعا جەتەدى, سونىڭ ىشىندە الماتى وبلىسىنىڭ نىساندارىنا عانا 3,5 ميلليون ادام كەلەدى دەپ كۇتىلۋدە. مۇنان بولەك الماتى ءوڭىرىنىڭ تاۋ كلاستەرىن دامىتۋعا اسا ءمان بەرىلۋدە. ينۆەستيتسياسىنىڭ جالپى كولەمى 111 ملرد تەڭگەنى قۇرايتىن تۇرگەن شاتقالىنداعى «دولينا-3» تاۋ-شاڭعى كۋرورتى جانە «اپورت اق-تاس» كوپسالالى تاۋ-شاڭعى كەشەنى جوبالارىن ىسكە اسىرۋ جوسپارلانعان. تاۋ كلاستەرى اۋماعىندا جىلىنا 1,5 ملن تۋريستكە قىزمەت كورسەتۋ جوسپارى تۇر, – دەيدى الماتى وبلىسىنىڭ اكىمى اماندىق باتالوۆ.
الماتى وبلىسى
