Call center-گە كەلىپ تۇسكەن قوڭىراۋلاردىڭ دەنى ءمامس ءۇشىن اۋدارىمدار مەن جارنا تولەۋ, ساقتاندىرۋ مارتەبەسىن انىقتاۋ, قىمبات تۇراتىن مەديتسينالىق قىزمەتتەردى الۋ ماسەلەلەرىنە قاتىستى بولدى. سونداي-اق جەكە جاعدايلارعا بايلانىستى وتىنىشتەر دە كەلىپ ءتۇستى. مۇنداي جاعدايلاردا وپەراتور پاتسيەنتتىڭ دەرەكتەرىن الىپ, ءوتىنىم بويىنشا اقپاراتتى ءتيىستى ماماندارعا بەرەدى.
قوردىڭ حالىقپەن كەرى بايلانىستىڭ بولۋىنا ەرەكشە كوڭىل بولەتىنىن, ونى جۇزەگە اسىرۋدا 1406 بايلانىس ورتالىعىنىڭ ءرولى ماڭىزدى ەكەنىن ايتقان ايباتىر جۇماعۇلوۆ: «بۇگىنگى ءىس-شارانىڭ ماقساتى – پاتسيەنتتەردىڭ قۇقىقتارىن قالاي قورعاۋعا بولاتىنىن كورۋ. تۇرعىندار مەديتسينالىق ۇيىمدارعا قارالعان كەزدە قانداي قيىندىقتارعا تاپ بولاتىنىن انىقتاۋ ماڭىزدى. بايلانىس ورتالىعىنا كەلىپ تۇسكەن ءاربىر ءوتىنىم مۇقيات تەكسەرىلىپ, تالداۋ جاسالادى. ادامداردىڭ ساقتاندىرۋ تاقىرىبىنا بەلسەندىلىك تانىتقانىنا قۋانىشتىمىز. تولەم جۇيەسى مەن قىزمەت كورسەتۋ تۋرالى, اتاپ ايتقاندا كلينيكالىق دياگنوستيكالىق كومەك تۋرالى سۇراقتار ءجيى قويىلادى. كوپتەگەن ازاماتتار بىردەن زەرتحاناعا نەمەسە دياگنوستيكالىق ورتالىققا بارىپ, تەگىن قىزمەت العىسى كەلەدى. دارىگەردىڭ جولداماسى بولماعاندىقتان ولار وسى قىزمەت تۇرلەرىن الا الماعاندارىنا شاعىمدانادى. الايدا, ەڭ الدىمەن, ازاماتتار دارىگەرىنە حابارلاسۋى كەرەك. مىسالى, توموگرافيا بەلگىلى ءبىر دارەجەدە ساۋلەلەنۋگە اكەلىپ سوعادى جانە ونى جايدان-جاي جاساي بەرۋگە بولمايدى. سوندىقتان دارىگەر پاتسيەنتكە مرت-نى نۇسقاۋلىقتار بولعان جاعدايدا عانا تاعايىندايدى. سوندىقتان الدىمەن دارىگەرگە بارىپ, ونىڭ بەلگىلەرى تۋرالى ايتۋ كەرەك», دەدى.
وتكەن جىلدىڭ قىركۇيەك ايىنان جۇمىسىن باستاعان بايلانىس ورتالىعى 2020 جىلدان باستاپ 24/7/365 جۇمىس ىستەۋ رەجىمىنە كوشىرىلدى. جاڭا جىلدان بەرى 24 مىڭنان استام ءوتىنىم ءتۇسىپ, ونىڭ 23 مىڭنان استامىنا (96,6%) جاۋاپ بەرىلگەن, ال قالعاندارى وڭدەلۋدە. ءبىر تاۋلىكتە وپەراتورلار 1 مىڭعا جۋىق قوڭىراۋدى قابىلداپ, وڭدەيدى. ورتالىق ءتيىمدى جۇمىس ىستەۋ ماقساتىندا تۇسكەن ءوتىنىمدى وڭدەۋدىڭ جاڭا, ءۇش دەڭگەيلى مودەلىنە كوشكەن. اتاپ ايتقاندا, ەڭ الدىمەن, كونسۋلتاتسيالىق دەڭگەيدە وتىنىشتەردىڭ شامامەن 85%-ى جابىلادى. ەكىنشى دەڭگەيدە ازاماتتاردان كەلىپ تۇسكەن وتىنىمدەردىڭ سەبەپتەرى مەن ونىڭ قايتالانۋىن ساراپتاۋ جانە مەديتسينالىق ۇيىمداردىڭ جاۋاپتارىنىڭ ساپاسى مەن جۇيەلىلىگى تەكسەرىلەدى. ەڭ سوڭىندا قور فيليالدارى مەن مەديتسينالىق ۇيىمدار دەڭگەيىندە سەبەپتەردى جويا وتىرىپ, شاعىمدار تەكسەرىلەدى.
