جيىنعا پارلامەنت سەناتىنىڭ دەپۋتاتتارى, قورعانىس ۆەدومستۆولارى, يندۋستريا جانە ينفراقۇرىلىمدىق دامۋ, ۇلتتىق ەكونوميكا جانە ەلىمىزدىڭ جەڭىل ونەركاسىپ سالاسىنىڭ وكىلدەرى قاتىستى.
داريعا نازارباەۆا ەلىمىزدە ءونىم وندىرۋگە بارلىق مۇمكىندىك بارىن العا تارتتى.
«ماسەلە رەسۋرستاردىڭ جەتىسپەۋىندە, جالپى اتالعان سالانى دامىتۋداعى مەملەكەتتىك ستراتەگيا جەتكىلىكتى دەڭگەيدە ويلاستىرىلماعان. سونداي-اق ءبىز ىشكى نارىقتىڭ ساپاسىز ونىمدەرگە تولۋىنا جايبىراقات قارايمىز», - دەدى ول.
«Qaz Textile Industry» ديرەكتورلار كەڭەسىنىڭ توراعاسى باۋىرجان جامالوۆ مەملەكەتتىك قورعانىستىق تاپسىرىس جانە قورعانىس كۇشى قۇرىلىمىنىڭ ساتىپ الۋ سالاسىنداعى جۇيەلەنگەن پروبلەمالار تۋرالى ايتتى.
«تاپسىرىس بەرۋشىلەر ءونىمدى وندىرۋگە جۇمسالاتىن ۋاقىتتى ەسەپتەمەي, ونى از ۋاقىتتا جەتكىزۋ تالابىن قويادى. شيكىزاتتان دايىن ءونىم شىعارۋ ۋاقىتىن ەسكەرمەيدى», - دەيدى ول.
سونداي-اق وتىرىسقا قاتىسۋشىلار مەملەكەتتىك قورعانىستىق تاپسىرىس الۋشىلاردىڭ تەحنيكالىق ەرەكشەلىك قۇرامىنداعى ماسەلەلەردى تالقىعا سالدى. جەڭىل ونەركاسىپ وكىلدەرى تەحنيكالىق تالاپتاردىڭ كورسەتىلۋى تيىستىگىن جانە ونى تاپسىرىس بەرگەن سوڭ وزگەرتپەۋ كەرەكتىگىن ايرىقشا ايتىپ ءوتتى. ودان بولەك, شيكىزات بويىنشا دا كەزەك كۇتتىرمەس ماسەلەلەر تۇر.
«مەملەكەتتىك قورعانىس تاپسىرىسىنا قاتىستى زاڭناما وتاندىق وندىرىلگەن شيكىزاتتى قولدانۋدى مىندەتتەمەيدى», - دەدى ب. جامالوۆ.
سەنات باسشىسىنىڭ ايتۋىنشا, مەملەكەتتىك ورگانداردىڭ جەڭىل ونەركاسىپ سالاسى بويىنشا ساتىپ الۋعا جۇمسالاتىن بيۋدجەت قاراجاتى پروبلەماسىن كەڭىنەن قاراۋ ماڭىزدى. «مەملەكەتتىك تاپسىرىس تۋرالى حابارلاندىرۋ جاريالاپ, ونى ارزان باعامەن ساتىپ الۋمەن شەكتەلىپ, ىشكى ۆەدومستۆولىق سۇراقتاردى عانا شەشىپ قويماۋ قاجەت. مەملەكەتتىك تاپسىرىسقا بولىنگەن قاراجات, ءبىزدىڭ ەكونوميكامىزعا جۇمىس ىستەپ, ءوز كاسىپكەرلەرىمىزدىڭ اياعىنا تىك تۇرۋىنا جۇمىس ىستەۋى ءتيىس. ياعني جاڭا جۇمىس ورىندارىن اشىپ, وتاندىق ونىمدەردىڭ جاندانۋىنا ىقپال ەتۋى ءتيىس. قازىرگى نارىقتاعى وتاندىق تاۋارلاردىڭ ساپاسى وتە جاقسى. ءبىزدىڭ ماماندار ەشكىمنەن كەم ەمەس, ءوز ىستەرىنىڭ شەبەرى», - دەدى د. نازارباەۆا.
سونىمەن قاتار, جەڭىل ونەركاسىپ سالاسىنىڭ وكىلدەرى قازاقستاندىق اسكەري قورعانىس كۇشى قۇرىلىمدارىنىڭ كوبىنەسە يمپورتتىق ماتادان تىگىلگەن ونىمدەردى تاڭدايتىنىن ءمالىم ەتتى.
ءوز كەزەگىندە د. نازارباەۆا قورعانىس جانە اسكەر سالاسىن ازىق-ت ۇلىك جانە باسقا دا قاجەتتى بۇيىمدارمەن تەك وتاندىق وندىرۋشىلەردىڭ قامتاماسىز ەتۋ كەرەكتىگىن ەرەكشە ايتىپ ءوتتى. «بۇل ۇلتتىق قاۋىپسىزدىكتىڭ اجىراماس بولىگى. ۇلتتىق قاۋىپسىزدىك ستراتەگياسى – ول ءوز ازاماتتارىمىزدى وتاندىق ونىممەن قامتاماسىز ەتۋ. ول ءۇشىن بىزدە بارلىق قاجەتتى ادامي, ماتەريالدىق جانە قارجىلىق رەسۋرستار بار. ازىرگە ءار مەكەمەنىڭ قىزىعۋشىلىعى ءارتۇرلى بولىپ وتىر», - دەيدى ول.
سەنات توراعاسى جەڭىل ونەركاسىپ وندىرۋشىلەرىنە كۇردەلەنگەن ماسەلەلەردى شەشۋ ماقساتىندا ۇكىمەتپەن بىرلەسىپ, سالا ستاندارتى مەن مەتودولوگياسىن رەتتەۋدى ۇسىندى.
كەزدەسۋدى قورىتىندىلاي كەلە, پارلامەنت سەناتىنىڭ توراعاسى ەكونوميكالىق ساياسات, يننوۆاتسيالىق دامۋ جانە كاسىپكەرلىك كوميتەتىنە جيىندا كوتەرىلگەن ماسەلەلەردى زەرتتەپ, پارلامەنتتىك تىڭداۋعا ازىرلەۋدى تاپسىردى.
