«كيىكتەردىڭ سانىن كوبەيتىپ, ولاردى ساقتاۋ ماقساتىندا ەكولوگيا, گەولوگيا جانە تابيعي رەسۋرستار مينيسترلىگىنىڭ ورمان شارۋاشىلىعى جانە جانۋارلار دۇنيەسى كوميتەتىنىڭ بۇيرىعىمەن قازاقستان رەسپۋبليكاسىنىڭ اۋماعىندا كيىكتەردى 2023 جىلعا دەيىن اتۋعا تىيىم سالىندى», - دەپ جازدى ساكەن دىلداحمەت.
قر بعم عىلىم كوميتەتىنىڭ زوولوگيا ينستيتۋتى كيىكتى عىلىمي ماقساتتاردا پايدالانۋدان باسقا, كيىكتى اتۋعا 2023 جىلعا دەيىن تىيىم سالۋ تۋرالى كەڭەس بەرگەن. بيولوگيالىق نەگىزدەمە مەملەكەتتىك ەكولوگيالىق ساراپتامامەن ماقۇلداعان. كيىكتى اتۋعا تىيىم سالۋ تۋرالى بۇيرىق رەسمي تۇردە جاريالانعاننان كەيىن 10 كۇننىڭ ىشىندە (20 اقپاندا) كۇشىنە ەنەدى.
«قازىرگى ۋاقىتتا قازاقستاننىڭ ءتۇرلى ايماقتارىندا كيىكتىڭ جاعدايى ءارتۇرلى. ءۇستىرت پوپۋلياتسياسىنىڭ سانى - 5,9 مىڭ دانا. بەتپاقدالا پوپۋلياتسياسىنىڭ سانى - 111,5 مىڭ دانا. ول 2015 جىلى جاپپاي قىرىلۋدان كەيىن قالپىنا كەلۋ ساتىسىندا. وزدەرىڭىز بىلەتىندەي, قازاقستاندا 2015 جىلى 150 مىڭنان استام كيىك قىرىلعان ەدى. سول سەبەپتى 2015 جىلدان باستاپ 2019 جىلدىڭ 31 جەلتوقسانعا دەيىن كيىكتەردى اتۋعا تىيىم سالىنعان ەدى. ەندى كيىكتىڭ سانىن كوبەيتۋ ءۇشىن بۇل مەرزىم 2023 جىلعا دەيىن ۇزارتىلدى. جالپى كيىك قىزىل كىتاپقا ەنگىزىلمەگەن. زاڭمەن شەكتەپ قانا قويماي, بۇل باعىتتا ءارتۇرلى جۇمىستاردى جۇرگىزىپ جاتىرمىز. قازىرگى ماقسات – كيىك سانىن 500 مىڭعا جەتكىزۋ», - دەپ جازدى ساكەن دىلداحمەت Facebook پاراقشاسىندا.
