قالا باسشىسىنىڭ ايتۋىنشا, بۇل ورتالىق ورال قالاسىندا قولعا الىنعان جۇيەلى جۇمىستىڭ جەمىسى.
- ءبىز بىلتىردان بەرى «شەت ايماقسىز قالا» اتتى جوبانى قولعا الدىق. ونىڭ ءمانىسى – زاماناۋي تەحنولوگيا, قىزمەت كورسەتۋ نىساندارى, مادەني-رۋحاني ورىندار قالانىڭ ورتالىعىندا شوعىرلانباي, شەت ايماقتارىمىزدا دا جاسالۋى كەرەك. بىلتىر ءبىز وسىنداي قوس كوميۋنيتي ورتالىق پەن مەكتەپتەن تىس جۇمىستار ورتالىعىنىڭ فيليالىن دەركولدەن اشتىق. نەگە؟ ويتكەنى ول جەردە دە 20 مىڭنىڭ ۇستىندە ادام تۇرادى. ەندى بولاشاقتا سارىتاۋ شاعىن اۋدانىندا اشقىمىز كەلەدى. ودان كەيىن كرۋگلووزەرنىي, سەرەبرياكوۆو كەنتىندە وسىنداي ورتالىقتار اشۋ جوسپاردا بار. جاقىندا جەلاەۆ كەنتىندە 100 ورىندىق بالاباقشا اشتىق. وسىنىڭ ءبارى قالامىزدىڭ شەت ايماقتارىن دامۋ وزەگىنە اينالدىرۋ ماقساتىندا جاسالدى. بۇگىنگى ورتالىق – ءبىرىنشى كەزەكتە وسى ايماق تۇرعىندارىنا جاساعان قىزمەتىمىز. وسى اۋداندا ۇلكەن ەكى ساياجاي قاۋىمداستىعى بار, ول جەردە دە اعايىندارىمىز كوپ تۇرادى. ولارعا دا مادەني ورتالىق كەرەك. قازىر جوندەۋگە جابىلعان №33 مەكتەپتىڭ ورنىنا 300 ورىندىق جاڭا عيمارات تۇرعىزامىز, ول جەردە بالاباقشا دا اشقىمىز كەلەدى. وسى اۋداندا ەمحانانىڭ ءبىر بولىمشەسىن اشۋ جوسپاردا تۇر. مىنە, وسىنىڭ ءبارى جۇزەگە اسقاندا, بۇرىن قاراۋسىز شەتتە قالعان ەت كومبيناتى اۋماعىنىڭ تىرشىلىگى جاندانىپ, مادەني ومىرىنە ءمان كىرەدى. جاڭا جىل, ناۋرىز سەكىلدى جالپىحالىقتىق مەرەكەلەردى تويلاۋ ءۇشىن حالىق ورتالىققا سابىلمايدى. وسى كوميۋنيتي ورتالىقتان ءتالىم العان بالالار بولاشاقتا قاي جاعىنان دا قاتارىنىڭ الدى بولىپ, ومىردەن ءوز ورنىن تابادى دەگەن ويدامىن, - دەدى ورال قالاسىنىڭ اكىمى ابات شىنىبەكوۆ جاڭا ورتالىقتىڭ اشىلۋ سالتاناتىندا سويلەگەن سوزىندە.
بۇرىن دەنساۋلىق ساقتاۋ ۇيىمىنا قاراعان ۇلكەن عيماراتتى وتكەن جىلدىڭ كۇزىندە ورال قالالىق مادەنيەت جانە تىلدەردى دامىتۋ ءبولىمى ءوز قۇزىرىنا الىپ, جوندەۋدەن وتكىزگەن ەكەن. بۇل جەردە قالالىق كىتاپحانا فيليالى مەن بۇرىنعى اۋلا كلۋبى كوشىپ كەلگەن.
- وردا كوشەسىندە ورنالاسقان ءبىزدىڭ بۇرىنعى عيماراتىمىز اپاتتى جاعدايدا ەدى. قالالىق كىتاپحانانىڭ №6 فيليالىنا 1980 جىلى بەرىلگەن ول ءۇي ابدەن توزدى. كىتاپحانا وسى ايماقتاعى №2, 13, 32, 33 ورتا مەكتەپتەرمەن تىعىز بايلانىستا جۇمىس ىستەيتىن. كىتاپحانادا 43 مىڭنان استام كىتاپ قورى بار, جىلىنا 4 مىڭداي وقىرمانعا قىزمەت كورسەتەدى. مۇندا ءتۇرلى قىزىعۋشىلىقتارى بويىنشا باس قوسقان ءۇش كلۋب – ايەلدەردىڭ «سىرلاسۋ-وبششەنيە» كلۋبى, «جاس قىران» جاسوسپىرىمدەر كلۋبى جانە ولكەتانۋ باعىتىندا جۇمىستاناتىن «مۇرا-ناسلەديە» قىزىعۋشىلىق كلۋبتارى بار. قالاداعى ءىرى كىتاپحانالاردىڭ ءبىرى ەدى, ەندى جاڭا عيماراتقا ورنالاسىپ, ءورىسى كەڭەيىپ جاتىر. كىتاپحانا ينتەرنەت جۇيەسىنە قوسىلعان, - دەيدى بىزگە ورال قالالىق كىتاپحاناسىنىڭ كىتاپحانانى دامىتۋ جانە ادىستەمەلىك ءبولىم مەڭگەرۋشىسى گۇلنار وتەگەنوۆا.
كىتاپحانانىڭ وقىرمان بولمەسىنەن قازاق تىلىندەگى مەرزىمدى باسىلىمداردى وقىپ وتىرعان اقساقالعا جولىقتىق. جاۋىنباي ساعىنعالي ۇلى وسى كىتاپحانانىڭ بايىرعى وقىرمانى ەكەن. 2004 جىلدان بەرى قاراي وسى جەردەن الىپ 700 كىتاپ وقىپتى.
- بيىل جاسىم 72-دە. قالاعا 2001 جىلى جىمپيتى اۋدانىنان كوشىپ كەلىپ ەدىم. اۋەلدەن كىتاپتى جاقسى كورەم. كەيىنگى بالالارىما ايتارىم, كىتاپتى قادىرلەڭدەر! كىتاپحاناعا كەلىڭدەر! بۇل جەردە ۇلكەنگە دە, كىشىگە دە بارلىق جاعداي جاسالعان, - دەيدى جاۋىنباي اقساقال.
راسىندا دا بۇل جەردە قالاۋى, قىزىعۋشىلىعى ءارتۇرلى ۇلكەن-كىشىگە قاجەت نارسەنىڭ ءبارى بار ما دەپ قالدىق. بۇل جەرگە جاڭادان ورنالاسىپ جاتقان «اراي» بالالار اۋلا كلۋبى بۇرىن قالانىڭ ورتالىعىنا تامان, كوپقاباتتى ءۇيدىڭ جەرتولەسىندە بولعان ەكەن.
- ءبىزدىڭ «اراي» بالالار اۋلا كلۋبى 1989 جىلى اشىلعان. 30 جىل ىشىندە بالالار مەن جاسوسپىرىمدەردىڭ سۇيىكتى ورنىنا اينالعان, جاس بۋىننىڭ شىعارماشىلىعىن دامىتىپ, ساناسىنا مادەنيەت ۇرىعىن ەگەتىن جەر ەدى. ەندى مۇمكىندىگىمىز بۇرىنعىدان دا مولايدى. بۇل كوميۋنيتي ورتالىق جاستارعا دا, ۇلكەندەرگە دە قىزمەت كورسەتەدى. قازىردىڭ وزىندە 7 كابينەت اشىلعان: ولار – ۇلتتىق سالت-ءداستۇردى ۇيرەتەتىن «دوستىق» بولمەسى, اعىلشىن ءتىلىن, لاتىن ءالىپبيىن ۇيرەتەتىن ۇيىرمەلەر, مۋزىكا كابينەتىندە ءان ايتۋ, دومبىرا, قوبىز, گيتارا ۇيرەنۋ ۇيىرمەلەرى, سپورتتىق ويىندار بولمەسىندە ترەناجەرلەر, ەسپاندەر, بالالار قابىرعاسى ورناتىلعان, ۇستەل ويىندارى, شاحمات, توعىزقۇمالاق, كونسترۋكتور, موزايكا – ءبارى بار. ال قولدانبالى ونەر كابينەتىندە بالالار سۋرەت سالۋدى, قاعازدان بۇيىمدار جاساۋ, قۇممەن سۋرەت سالۋدى ۇيرەنەدى. ۇلكەندەرگە ارنالعان كابينەتتە كاراوكە جۇيەسى بار. ءتۇرلى كەزدەسۋ, مادەني شارالار وتكىزەتىن زالىمىز دا بار. وسى اۋدانعا كوشىپ كەلگەلى وتكەن ەكى اپتا ىشىندە جەرگىلىكتى تۇرعىندارعا تانىمال بولىپ ۇلگەردىك. كەلۋشىلەر وتە كوپ, – دەيدى ورتالىق مەڭگەرۋشىسى لاريسا گريگورەۆا.
ايتا كەتەيىك, «اراي» كوميۋنيتي ورتالىعىنا جاس مولشەرىنە قاراماستان شاعىن اۋداننىڭ كەز كەلگەن تۇرعىنى كەلە الادى ەكەن. مۇندا كۇندىزگى اۋىسىمدا بالالار مەن جاسوسپىرىمدەرگە ارنالعان «داۋىس international» ەسترادالىق ءان ۇيىرمەسى, «سيقىرلى الەم» قولونەر ۇيىرمەسى, ەرەسەكتەرگە سمارتفون قولدانۋدى ۇيرەتەتىن «سمارت كZ» ۇيىرمەسى, «مەن - ەرىكتىمىن» اتتى ەرىكتى جاستار ۇيىمى, بالالارعا ارنالعان «التىن ساقا» ۇلتتىق ويىندار جانە باسقا كوپتەگەن باعىتتاعى ۇيىرمەلەر اشىلعان.
باتىس قازاقستان
