توكپە كۇيدىڭ تۋىن تىككەن باتىس وڭىرىندە زاماناۋي وركەستر قۇرۋعا 1950 جىلدارى گۋرەۆ وبلىستىق اتقارۋ كوميتەتىنە باسشىلىققا كەلگەن بەلگىلى مەملەكەت جانە قوعام قايراتكەرى نۇرتاس وڭداسىنوۆتىڭ باستاماسى نەگىز بولعان. سوعىستان كەيىنگى ەلدىڭ ەڭسەسىن كوتەرۋ ءارى ءداستۇرلى كۇي ونەرى مەكتەبىن جاڭعىرتۋ ماقساتىندا سول جىلدارى اۋىل-ايماقتاردا كوركەمونەرپازدار بايقاۋلارى كوپتەپ ۇيىمداستىرىلاتىن. بۇل بايقاۋلاردان سوڭ وبلىس, اۋدان كولەمىندە دومبىرا وركەسترلەرىن قۇرۋ مىندەتتەلگەن. ول ءۇشىن ۇيىمداستىرۋ ىسىنە قابىلەتتى كاسىبي مۋزىكانت ماماندار قاجەت ەدى.
بۇل جونىندە وسى ونەر ۇجىمىن ۇيىمداستىرۋدىڭ باسى-قاسىندا بولعان قوبىزشى, قازاقستان رەسپۋبليكاسىنىڭ ەڭبەك سىڭىرگەن قايراتكەرى, ەلىمىزدىڭ باتىس وڭىرىندە قوبىزشىلار مەكتەبىنىڭ نەگىزىن قالاعان مۋزىكانت راۋشان نۇرپەيىسوۆا: «ن.وڭداسىنوۆ اتىراۋدا مۋزىكالىق كوللەكتيۆ قۇرۋ ءۇشىن تاجىريبەلى مۋزىكانت ىزدەپتى. سودان «الماتىدا سەيىلحان مەن راۋشان بار, بىرەۋى – دومبىراشى, بىرەۋى – قوبىزشى» دەپ ەستيدى. ن.وڭداسىنوۆ ا.جۇبانوۆقا حابارلاسىپ, 1956 جىلى مادەنيەت مينيسترلىگى ارقىلى ءبىزدى شاقىرتتى. كۇندىز-ءتۇنى جۇمىس ىستەدىك. ماڭعىستاۋدىڭ, گۋرەۆتىڭ ونەرپازدارىن دايىنداپ, 1957 جىلى ماۋسىم ايىندا وتكەن وبلىس جاستارى مەن ستۋدەنتتەرىنىڭ ءى فەستيۆالىندە 500-دەن استام دومبىراشىدان تۇراتىن وركەستردىڭ كونتسەرتىن بەردىك. ءبىر ايتا كەتەتىن دەرەك, سوندا ارامىزدا ءابىش كەكىلباەۆ پەن فاريزا وڭعارسىنوۆا دا بولدى. وركەستر داۋلەتكەرەيدىڭ «قوس القا», قۇرمانعازىنىڭ «اداي» كۇيلەرىن ورىندادى. اشىق اسپان استىندا بەس ءجۇز دومبىرانىڭ ءۇنى كۇمبىرلەگەندە تەبىرەنبەگەن جان قالمادى. سول دومبىراشىلاردىڭ اراسىنان ءجۇز ادامدى تاڭداپ الىپ, نوتا ۇيرەتەتىن كۋرس اشتىق. كلاسسيكالىق شىعارمالار مەن قازاق كۇيلەرىن ۇيرەتتىك. 1957 جىلى 23 قازاندا وبلىستىق پارتيا جانە اتقارۋ كوميتەتتەرىنىڭ بىرىككەن قاۋلىسىمەن وركەسترىمىزگە دينا نۇرپەيىسوۆانىڭ ەسىمى بەرىلدى. قۇرامىندا 50 ادام بار وركەستر 1958 جىلى ماسكەۋدە وتكەن قازاق ادەبيەتى مەن ونەرىنىڭ ونكۇندىگىنە قاتىسىپ, لاۋرەات اتاندى. سەيىلحان كوركەمدىك جەتەكشى ءارى ديريجەر, ال مەن كونتسەرتمەيستەرى بولدىم. كۇنىنە 10-12 ساعات دايىندالاتىنبىز. وركەستر باسىندا «مۇنايشىلار سارايىنىڭ حالىق اسپاپتارى وركەسترى» دەپ اتالدى. بارىنە كومەكتەسكەن نۇرتاس وڭداسىنوۆ ەدى. ۇستازىمىز احمەت جۇبانوۆ كەزدەسكەن سايىن اقىلىن ايتاتىن. سول احاڭنىڭ تاپسىرماسىمەن 1957 جىلى دينا اتىنداعى وركەستردى قۇردىق», دەپ ەسكە الادى.
ءيا, دينا اتىنداعى وركەستر س.قۇسايىنوۆ پەن ر.نۇرپەيىسوۆانىڭ ۇيىمداستىرۋشىلىق قابىلەتتەرى مەن ەڭبەكقورلىقتارىنىڭ ارقاسىندا اياقتان تۇرىپ كەتتى دەسە دە بولادى. قوس ونەرپاز ۇلاعاتتى ۇستازى احمەت جۇبانوۆتىڭ اقىل-كەڭەسىمەن, نۇرتاس وڭداسىنوۆتاي قوعام قايراتكەرىنىڭ قولداۋىمەن تەڭدەسى جوق ونەر ورداسىن دۇنيەگە اكەلدى, قايراتكەر اعالارىنىڭ سەنىمىن اقتادى. وسىدان باستاپ قوس ىشەكتى دومبىراعا ءتىل بىتىرگەن اتىراۋ ءوڭىرىنىڭ ونەرپازدارى قۇرمانعازى, داۋلەتكەرەي, دينا سىندى ۇلى كۇيشىلەردىڭ شىعارمالارىن زاماناۋي وركەستر تىلىندە سويلەتىپ, باتىس كومپوزيتورلارىنىڭ تۋىندىلارىن مەڭگەردى. رەپەرتۋار, ورىنداۋشىلاردىڭ مۋزىكالىق ساۋاتتىلىعى, اسپاپتاردىڭ ءتۇرى مەن داۋىسىنا ەرەكشە كوڭىل ءبولىندى. ۇجىمدىق ونەر سانالاتىن وركەستر ءۇشىن وتە ماڭىزدى قوبىز اسپابىنىڭ ەنگىزىلۋى تىكەلەي ر.نۇرپەيىسوۆانىڭ ەڭبەگى دەسەك ارتىق ەمەس.
سەيىلحان قۇسايىنوۆ پەن راۋشان نۇرپەيىسوۆا سول جىلدارى ءدال وسى اتىراۋدا مۋزىكالىق ۋچيليششەنىڭ دە نەگىزىن قالادى. 1958 جىلى اشىلعان مۋزىكا ۋچيليششەسىنە س.قۇسايىنوۆ ديرەكتور بولىپ تاعايىندالعان. وعان ۋچيليششەنىڭ ماتەريالدىق-تەحنيكالىق بازاسىن جاساقتاۋ, وقۋ باعدارلاماسىن ۇيلەستىرۋ, نوتالىق ادەبيەتتەر, وقۋلىقتار, مۋزىكالىق اسپاپتار جيناقتاۋ, وقىتۋشىلار ۇجىمىن ۇيىمداستىرۋ سياقتى مىندەتتەر جۇكتەلدى. مۋزىكالىق اسپاپتار تاپشى كەز, كەدەرگى كوپ. وركەسترگە قاجەتتى دومبىرا, قوبىز, باس دومبىرا, باس قوبىز اسپاپتارىن جاساۋ قولعا الىندى. ۋچيليششەنىڭ العاشقى وقىتۋشىلارى ي.كولتايس, و.گەرلاح, ر.نۇرپەيىسوۆا, ب.رزاحانوۆ, م.قۇسپاناليەۆ, ە.نۇراشەۆ جان اياماي ەڭبەك ەتتى. ولار كۇندىز ساباق وتكىزىپ, تۇندە كۇيلەر مەن شىعارمالاردى نوتاعا تۇسىرۋمەن اينالىساتىن. مىنە, وسىنداي زور ەڭبەكپەن قۇرىلعان, بۇگىندە اتىراۋ مۋزىكا كوللەدجى دەپ اتالاتىن ونەر ۇجىمى 2018 جىلى ءوزىنىڭ قۇرىلعانىنا 60 جىل تولۋىن اتاپ ءوتتى. ۇلتتىق مۋزىكا ونەرىنىڭ كاسىبي دامۋىنا سۇبەلى ۇلەس قوسىپ كەلە جاتقان كوللەدجدىڭ مەرەيتويىنا راۋشان تۇسىپبەكقىزى ارنايى شاقىرىلدى. وقۋ ورنىنىڭ تۇلەكتەرى – قازاقستان رەسپۋبليكاسىنىڭ ەڭبەك سىڭىرگەن قايراتكەرلەرى تىلەش ءباديلوۆ, عيززات ادەپقاليەۆ, ءشامىل ابىلتاەۆ, ايتقالي جايىموۆ, كاريما ساحارباەۆا, قوبىزشىلار وڭايشا قاراشەۆا مەن گۇلسارا ىزتىلەۋوۆانىڭ ەسىمى كوزىقاراقتى قازاققا جاقسى تانىس.
وسى رەتتە دومبىراشى ۇستازدىڭ ءومىربايانىنا دا زەر سالىپ وتكەن ورىندى دەپ سانايمىز. سەيىلحان قۇسايىنوۆ 1929 جىلى ورال وبلىسى وردا اۋدانىندا دۇنيەگە كەلگەن. اكەسى قۇسايىن 1937 جىلى وتباسىمەن قۋعىن-سۇرگىنگە ۇشىراپ, الدىمەن دوسسورعا, كەيىن گۋرەۆكە كوشىپ كەلەدى. سەيىلحان وسىنداعى جامبىل اتىنداعى مەكتەپتە وقيدى. 7-8 جاسىنان ناعاشى اتاسى حالەل مولداشەۆتان دومبىرا ۇيرەنەدى, وڭىرگە بەلگىلى كۇيشى عىلمان قايروشەۆتەن ءدارىس الادى.
1944 جىلى اتىراۋعا الماتىدان قازاقستاننىڭ حالىق ءارتىسى لۇقپان مۇحيتوۆ باستاعان توپ گاسترولدىك ساپارمەن كەلەدى. قۇسايىننىڭ وتباسىندا قوناقتا بولعان ونەر يەلەرى جاس سەيىلحاننىڭ تالانتىن, كۇيگە دەگەن ىنتا-ىقىلاسىن بايقاپ, ونى كونسەرۆاتورياعا وقۋعا شاقىرادى. احمەت جۇبانوۆتىڭ سىناعىنان وتكەن جاس كۇيشى ۇزدىك وقىپ, 1951 جىلى كونسەرۆاتوريانى بىتىرە سالىسىمەن قۇرمانعازى وركەسترىنىڭ قۇرامىندا ونەر كورسەتەدى. بىرتىندەپ ونەر سالاسىنداعى ۇيىمداستىرۋ جۇمىستارىنا تارتىلادى, قوستاناي وبلىستىق فيلارمونياسىندا كوركەمدىك جەتەكشى بولادى.
سەيىلحان قۇسايىنوۆتىڭ گۋرەۆكە قايتا ورالۋى دا وسى ۇيىمداستىرۋشىلىق قابىلەتىنىڭ قاجەتتىلىگىنەن ەدى. وبلىستىڭ اۋدان-ايماعىن ارالاپ ءجۇرىپ وركەسترگە ادام جينايدى. دومبىرا تارتىستارى دا, جاس شاماسى دا ءارتۇرلى, كۇي تارتۋدى ءوز بەتىنشە ۇيرەنگەن دومبىراشىلاردىڭ باسىن بىرىكتىرىپ, ءبىر ىرعاقتا كۇي تارتقىزۋ وڭايعا سوقپاعانى ءمالىم. اراسىندا مالشى دا, مۇعالىم دە, دارىگەر دە بولدى. ولارعا نوتا ۇيرەتۋ العاشقى كەزەكتەگى مىندەت ەدى.
سول كەزدە وركەستر مۇشەلەرىنىڭ مۋزىكالىق ساۋاتىن ارتتىرۋ ءۇشىن وبلىستىق مادەنيەت باسقارماسى جانىنان 5 ايلىق كۋرس اشىلعان ەكەن. وندا باس دومبىرا, كونتراباس دومبىرا, الت-قوبىز, پريما-قوبىز, قىلقوبىز, سىرناي اسپاپتارى بويىنشا ءبىلىم بەرىلەدى. كۋرسقا قاتىسۋشىلارعا س.قۇسايىنوۆ, ب.رزاحانوۆ, م.شيم, ر.نۇرپەيىسوۆا ساباق بەرەدى. «ول كەزدە ەكىنشى بالام جاڭا تۋعان, قىرقىنان شىقپاي جاتىپ جۇمىسقا شىقتىم. ءسابيىمدى ەمىزە سالىپ, شاكىرتتەرىمە ساباق بەرۋگە جۇگىرەمىن. وركەستر اياعىنان نىق تۇرعانشا كۇن-ءتۇن دەمەي ەڭبەك ەتتىك» دەپ ەسكە الادى سول كۇندەردى بۇگىندە 90 جاستان اسقان راۋشان تۇسىپبەكقىزى.
وسىلايشا وركەستردىڭ اسپاپتىق مۇمكىنشىلىگى دە, ورىنداۋشىلاردىڭ دەڭگەيى دە وسە تۇسەدى. سول جىلدارى قۇرامىندا 50 ادام بار دينا وركەسترى الماتى مەن ماسكەۋدە بىرنەشە رەت كونتسەرت بەرەدى. اتاقتى كولوننالار زالىندا ونەر كورسەتەدى. 1958 جىلدىڭ كۇزىندە ماسكەۋدە وتكەن قازاقستان ونەرى مەن ادەبيەتىنىڭ ونكۇندىگىنە قاتىسۋىنىڭ ءوزى-اق بۇل ۇجىمنىڭ كوركەمدىك جانە ورىنداۋشىلىق دەڭگەيىن مويىنداۋ ءارى ۇلكەن قۇرمەت ەدى. وسىدان بىلاي دينا وركەسترى ءوسۋ, وركەندەۋ ۇستىندە بولدى.
س.قۇسايىنوۆتىڭ جانكەشتى ەڭبەكقورلىعىنا, ۇيىمداستىرۋشىلىق قىزمەتىنە احمەت جۇبانوۆ لايىقتى باعاسىن بەرىپتى. اكادەميك-ۇستاز ونى شاكىرتى رەتىندە دە, سىرلاس ءىنىسى دەپ تە جاقسى كورگەن ەكەن. 1960 جىلى شىققان «قۇرمانعازى» اتتى كىتابىندا: «الماتىنىڭ كونسەرۆاتورياسىن بىتىرگەننەن كەيىن سەيىلحان گۋرەۆكە بارىپ, وندا 70 ادامنان قۇرالعان ۇلكەن وركەستر ۇيىمداستىرىپ, ءبىر جاعىنان مۋزىكالىق تەحنيكۋمنىڭ باسشىلىق قىزمەتىن اتقارىپ, حالىق اسپابى مادەنيەتىنىڭ وسۋىنە مول ۇلەس قوسىپ ءجۇر. سەيىلحان تەك پەداگوگ, ۇيىمداستىرۋشى عانا ەمەس, ول – جاقسى ديريجەر, كومپوزيتور. ونىڭ باسقارۋىنداعى وسى ايتىلعان وركەستر بىرنەشە رەت بايگە الدى», دەپ جازادى. احمەت جۇبانوۆتىڭ بۇل باعاسى دينا وركەسترى مەن وقۋ ورنىنىڭ قۇرىلۋىنداعى س.قۇسايىنوۆتىڭ ەڭبەگىن ايگىلەپ تۇر.
اتىراۋدا بۇرىن بولماعان ۇلت اسپاپتارى وركەسترى مەن مۋزىكالىق ۋچيليششە اشقانى ءۇشىن س.قۇسايىنوۆ «قازاق كسر-نا ەڭبەگى سىڭگەن مادەنيەت قىزمەتكەرى» اتاعىن الدى. اتىراۋ مۋزىكالىق ۋچيليششەسىن قۇرۋعا قوسقان ۇلەسى جانە پ.چايكوۆسكي اتىنداعى الماتى مۋزىكالىق كوللەدجىندە حالىق اسپاپتارى ءبولىمىن اشقانى ءۇشىن راۋشان نۇرپەيىسوۆا «قازاق كسر-نا ەڭبەگى سىڭگەن مادەنيەت قىزمەتكەرى» جانە «كسرو ءبىلىم بەرۋ ءىسىنىڭ ۇزدىگى» اتاندى. قازىرگى تاڭدا اتىراۋدا س.قۇسايىنوۆ اتىنداعى ديريجەرلەر كونكۋرسى, ر.نۇرپەيىسوۆا اتىنداعى كاسىبي قوبىزشىلاردىڭ رەسپۋبليكالىق كونكۋرسى ءوتىپ تۇرادى.
س.قۇسايىنوۆ 1972 جىلى قازاق كسر-ءى, قىرعىز كسر-ءى جانە التاي ءوڭىرىنىڭ بىرىككەن «مەلوديا» اتتى تاسپا جازۋ ورتالىعىنىڭ باسشىسى بولىپ تاعايىندالدى. ماسكەۋدەن اتاقتى امىرە قاشاۋباەۆتىڭ داۋسىنىڭ تابىلۋىندا ول كىسىنىڭ ەڭبەگى زور. 1977-1980 جىلدارى «قازاقكونتسەرت» ۇيىمىن باسقاردى. 1980-1983 جىلدارى ب.سارىباەۆپەن بىرلەسىپ «وتىرار» ءانسامبلىن قۇرىپ, جەتەكشىلىك ەتتى. دەنساۋلىعىنا بايلانىستى 1988 جىلى ەلىنە كەلىپ, ماڭعىستاۋ مۋزىكا مەكتەبىنىڭ ديرەكتورى بولدى, مۇندا دا «ماڭعىستاۋ مارجاندارى» اتتى انسامبل قۇردى, مۋزىكادان ءدارىس وقىدى. كومپوزيتور رەتىندە س.قۇسايىنوۆتىڭ «كوركەيىپ گۇلدەنە بەر, گۋرەۆىم!», ج.سايننىڭ سوزىنە جازىلعان «قاراماشى, قاداماشى» اندەرى, «مەرەكە», «شاتتىق» جانە باسقا تۋىندىلارى بەلگىلى.
سەيىلحان قۇسايىنوۆ 2006 جىلى دۇنيە سالدى. كۇيشى-كومپوزيتورمەن قوشتاسۋ راسىمىندە كومپوزيتور ەركەعالي راحماديەۆ: «سەيىلحان قۇسايىنوۆ – ءتىرى كەزىندە ءوز باعاسىن الا الماي كەتكەن ازامات» دەپ وكىنىشىن بىلدىرگەن ەكەن. راۋشان تۇسىپبەكقىزى دا جارىنىڭ مىنەزى, بولمىسى بولەك بولعانىن ايتادى. «ەشكىممەن داۋلاسپايتىن, ەشقاشان داۋىس كوتەرمەيتىن, تايتالاسپايتىن. وتە سابىرلى, اقكوڭىل, بارىن ايامايتىن ادام ەدى. ءجۇرىس-تۇرىسى, كيىم كيىسىنە دەيىن سىربازدىق, سىپايىلىق ءبىلىنىپ تۇراتىن. وسىنداي مىنەزىمەن قولىنداعىسىنان ايرىلىپ قالعان كەزى دە بولدى», دەپ ەسكە الادى راۋشان اپا. س.قۇسايىنوۆتىڭ شاكىرتتەرى ش.ابىلتاەۆ پەن ا.جايىموۆ ۇستازدارىنىڭ ادامگەرشىلىك قاسيەتىن, ونەرگە ادالدىعىن, پەداگوگتىك شەبەرلىگىن جوعارى باعالايدى, ء«تۋابىتتى ينتەلليگەنت» دەپ ايرىقشا قۇرمەتتەيدى.
تالانتى مەن ەرىك-جىگەرىنىڭ ارقاسىندا كۇش-قۋاتى مەن ۋاقىتىن سارپ ەتىپ قۇرعان ۇجىمدارى, تاربيەلەگەن شاكىرتتەرى, ارتىندا قالعان تۋىندىلارى – ونىڭ ونەردەگى سايراپ جاتقان ءىزى. دەسەك تە, قازاقستاندا قۇرمانعازى وركەسترىنەن كەيىن دۇنيەگە كەلگەن ۇلكەن ۇجىم – دينا نۇرپەيىسوۆا اتىنداعى حالىق اسپاپتار وركەسترىنىڭ قۇرىلۋىنداعى س.قۇسايىنوۆتىڭ ەڭبەگى لايىقتى باعالانىپ ءجۇر مە دەگەن ساۋال تۋادى. ويتكەنى اتىراۋداعى وسى ايرىقشا ونەر ۇجىمى ءوزىنىڭ قۇرىلعانىن 1990 جىلدان باستاپ ەسەپتەيدى. وركەستردىڭ نەگىزى 1957 جىلى قالاندى ەمەس پە؟ وركەستردىڭ باستاۋىندا تۇرعان تۇلعالاردىڭ ەسىمى مەن ەڭبەگى بەلگىلى عوي. وسىعان وراي: «قازاقتىڭ ۇلتتىق وركەسترلەرىنىڭ جولىن ەسەپتەگەندە ءبىرىنشى «قۇرمانعازى», ەكىنشى «دينا», سونان سوڭ بارىپ «وتىرار سازى» وركەسترى قۇرىلدى. ال قازىر «قۇرمانعازىنى» ايتادى, «وتىراردى» ايتادى, «دينانى» ايتپايدى. «دينا» وركەسترى دە قازىر اكادەميالىق وركەستر عوي. قۇرعان ادامنىڭ ەڭبەگى اتالىپ, ەلەنۋ كەرەك. بىراق سەيىلحاننىڭ ەسىمى كوپ جەردە اتالماي قالادى», دەپ قاپالانادى راۋشان نۇرپەيىسوۆا.
ايتا كەتەر ەرەكشەلىگى, دينا وركەسترى قۇرىلعان كەزىنەن باستاپ قوعامدىق نەگىزدەگى حالىقتىق ۇجىم ەسەبىندە ونەر كورسەتىپتى. 1990 جىلى 26 ماۋسىمنان باستاپ كاسىبي وركەستر اتانادى. بۇل جونىندە ينتەرنەتتەگى مالىمەتتەردە «وركەستر 1990 جىلى وبلىستىق حالىق دەپۋتاتتارى سوۆەتىنىڭ №175 26.06.
1990 ج. شەشىمىمەن قۇرىلدى» دەگەن دەرەك كەزدەستى. سونداي-اق 2019 جىلى الماتىداعى «قازاق كىتابى» باسپاسىنان شىققان «اسۋى بيىك وركەستر» اتتى دەرەكتى كىتاپتا دا (قۇراستىرعان ءو.الىمگەرەەۆ, ا.شارىپباەۆا) العاشقىدا قوعامدىق نەگىزدە جۇمىس ىستەپ, 1990 جىلدان بەرى قازاقستاننىڭ حالىق ءارتىسى رىسباي عابديەۆتىڭ جەتەكشىلىگىمەن كاسىبي ونەر ۇجىمىنا اينالعانى اتاپ وتىلگەن. ر.نۇرپەيىسوۆا بۇل جونىندە: «نۇرتاس وڭداسىنوۆ اعايمەن بىرىگىپ, قويان-قولتىق قىزمەت جاساعان, وركەستردىڭ كوركەمدىك جەتەكشىسى ءارى ديريجەرى دە – سەيىلحان. قازاقستاندا حالىق مۋزىكاسىن كاسىبي دەڭگەيگە كوتەرگەن تۇڭعىش ادام احمەت جۇبانوۆ, ال اتىراۋدا قازىعىن قاققان سەيىلحان قۇسايىنوۆ. مۋزىكادان حابارى بار ادام سولاي ۇعىنۋى كەرەك» دەپ سانايدى. سول العاشقى دومبىراشىلار ۇيىرمەسىندە وقىعان وركەستر مۇشەسى, بۇگىندە اتىراۋ وبلىستىق ارداگەرلەر كەڭەسىنىڭ توراعاسى قاتيموللا ريزۋانوۆ تاريحي داتالاردىڭ دۇرىس اتالىپ ءوتۋىن قولدايدى. «وركەستردىڭ قۇرىلعان جىلى ماسكەۋدە دە, ەلىمىزدە دە تاريحتا تاڭبالاندى. سوندىقتان د.نۇرپەيىسوۆا اتىنداعى وركەستردى 1990 جىلى ەمەس, 1957 جىلى قۇرىلدى دەۋ ءارى دۇرىس, ءارى زاڭدى جانە ادامگەرشىلىك تۇرعىسىنان دا ادىلدىك» دەيدى وركەستردىڭ ارداگەر دومبىراشىسى.
دينا يمامباەۆا,
الەۋمەتتانۋشى, «اقيقات» جۋرنالى باس رەداكتورىنىڭ ورىنباسارى
الماتى
