جىل سايىن فورۋمدا مەديا سالاسىنداعى ۇزدىك ساراپشىلار, جۋرناليستەر, ۆەب-سايتتاردىڭ باس رەداكتورلارى كاسىبي تاجىريبەسىمەن ءبولىسىپ, سالاداعى وزەكتى ماسەلەلەردى تالقىلايدى. بيىل قاتىسۋشىلار قازاق تىلىندەگى ونلاين كونتەنتتەن اقشا تابۋ, قازاقستان مەديا نارىعىن دامىتۋ ماسەلەلەرىن ورتاعا سالدى. فورۋمدى ەلىمىزدەگى اقش ەلشىلىگى مەن قازاقستان ءباسپاسوز كلۋبى ۇيىمداستىردى. شارا قوناقتارى National Geographic Qazaqstan ۇسىنعان قازاقستان مەن اقش تاقىرىبىندا فوتوسۋرەتتەر كورمەسىن تاماشالاۋعا مۇمكىندىك الدى.
اقش-تىڭ قازاقستانداعى توتەنشە جانە وكىلەتتى ەلشىسى ۋيليام ح.موزەر العى سوزىندە بۇگىنگى قازاق ءتىلدى مەدياعا دەگەن سۇرانىس ارتىپ كەلە جاتقانىن اتاپ ءوتتى. «Qazforum وسىدان 4 جىل بۇرىن قازاق تىلىندە حابار تاراتاتىن ونلاين مەديا وكىلدەرىنىڭ كاسىبي الاڭىن قالىپتاستىرۋ ماقساتىندا باستالدى. بۇگىن قازاق ءتىلىنىڭ قولدانۋ اياسى كەڭىپ كەلەدى. 4 ملن ادام مەديانى تۇراقتى قازاق تىلىندە تۇتىنادى ەكەن, 500-دەن استام مەديا بار. الايدا قازاق تىلىندەگى مەديا ءۇشىن جارناما تارتۋ ماسەلەسى ءالى دە قيىن بولىپ تۇر. بۇل الاڭدا ءارتۇرلى مەديا وكىلدەرى بۇگىنگى جاھاندىق وزگەرىستە پايدا بولعان مەديا سالاسىنداعى باستى سىن-قاتەرلەردى شەشۋ جولىن تابۋعا تىرىسادى», دەدى ۋيليام ح. موزەر. اقش ەلشىسى بۇگىنگى قازاقتىلدى مەديا عانا ەمەس, جالپى الەمدىك مەديا جالعان اقپارات ماسەلەسىمەن بەتپە-بەت كەلىپ وتىرعانىن ايتتى.
Qazforum 2020 مەديافورۋمىنىڭ پلەنارلىق وتىرىسىندا «قازاق قوعامىنا قانداي مەديا قاجەت؟» تاقىرىبى كوتەرىلدى. بەلگىلى ساياساتتانۋشىلار ايدوس سارىم جانە سامات نۇرتازا, Tarlan.kz ۆەب-سايتىنىڭ باس رەداكتورى نۇرعالي نۇرتاي, Nege.kz ۆەب-سايتىنىڭ باس رەداكتورى ەرىك راحىم, «ايقىن» گازەتىنىڭ باس رەداكتورى نۇرمۇحامەد بايعارا ەلىمىزدەگى قازاقتىلدى بۇقارالىق اقپارات قۇرالدارىنا نارىقتاندىرۋ ۇدەرىستەرى مەن سوڭعى ساياسي وزگەرىستەردىڭ اسەرىن تالقىلادى. قاتىسۋشىلار ينتەرنەت پەن جاھاندىق تسيفرلاندىرۋ عاسىرىندا جاڭا مەديا مەن ءداستۇرلى باق-تىڭ سۇرانىسى تۋرالى سۇراقتارعا جاۋاپ بەرۋگە تىرىستى. «ايقىن» گازەتىنىڭ باس رەداكتورى نۇرمۇحامەد بايعارانىڭ ايتۋىنشا, بۇگىنگى باسپاسوزدە كوتەرىلىپ جاتقان تاقىرىپتار اياسى كەڭ. جۋرناليستەر تسيفرلاندىرۋ, IT, digital سالاسىن تەرەڭ زەرتتەپ, وقىرمانعا ساپالى ساراپتامالىق ماقالالار ۇسىنىپ ءجۇر. سونداي-اق ول ءباسپاسوزدىڭ ەلەكتروندى باق-پەن باسەكەگە ءتۇسۋى ءۇشىن ءداستۇرلى جولدارمەن قاتار, سوڭعى تەحنولوگيالاردى مەڭگەرىپ, اۋديتوريا سۇرانىسىنا ساي فورماتتا اقپارات تاراتۋدى ۇيرەنگەنى ابزال ەكەنىن باسا ايتتى.
سونداي-اق جەتەكشى مەديا ساراپشىلاردىڭ قاتىسۋىمەن شەبەرلىك ساباقتارى مەن ترەنينگتەر ءوتتى. قازاق تىلىندە You Tube الەۋمەتتىك جەلىسىندە ساپالى ءارى تابىستى جوبا جۇرگىزۋ كەڭىنەن تالقىلانىپ, قاتىسۋشىلار قىزىعۋشىلىق تانىتقان تاقىرىپتاردىڭ ءبىرى بولدى. شاراعا 200-دەن استام ادام قاتىستى. ەلوردالىق قوناقتارمەن قاتار, ەلىمىزدىڭ وڭىرلەرىنەن كەلگەن ماماندار ايماقتىق مەديا كەڭىستىكتە ساپالى ءارى مازمۇندى حابارلار سانىن ارتتىرۋ تۋرالى پىكىر الماسىپ, باسقا وبلىس, اۋدانداعى ارىپتەستەرىمەن بايلانىس ورناتتى.
