دارىگەرگە قاتىستى اقپاراتتى العاش بولىپ قىتايدىڭ اعىلشىن تىلىندە شىعاتىن Global Times گازەتى حابارلادى. الايدا ءبىراز ۋاقىتتان كەيىن حابارلامانى ءوشىرىپ, ونى جوققا شىعاردى. ودان كەيىن اۋرۋحانا الەۋمەتتىك جەلىدەگى پاراقشاسىندا اقپاراتتى راستادى.
34 جاستاعى دارىگەر جەلتوقساننىڭ اياعىندا ءوزى قىزمەت ەتەتىن ۋحان قالاسىنداعى اۋرۋحاناعا بىردەي دياگنوزبەن 7 ناۋقاستىڭ تۇسكەنىن بايقايدى. ناۋقاستاردىڭ بارلىعى – تەڭىز تاعامدارىن ساتاتىن بازار قىزمەتكەرلەرى. بۇل جايتقا الاڭداعان لي دوستارىنا حابارلامالار جىبەرىپ, اباي بولۋىن ەسكەرتەدى. جاڭالىق الەۋمەتتىك جەلىلەردە تەز تاراپ, كوپ ۇزاماي پوليتسيا قىزمەتكەرلەرى دارىگەردى تەرگەۋگە شاقىرىپ, جالعان اقپارات تاراتۋعا تىيىم سالادى.
12 قاڭتاردا دارىگەردىڭ ءوزى دە اۋرۋحاناعا ءتۇسىپ, 1 اقپاندا كوروناۆيرۋس جۇقتىرعانى راستالادى. اۋرۋحانا قىزمەتكەرلەرىنىڭ مالىمەتىنە سۇيەنسەك, ولار ارىپتەستەرىن امان الىپ قالۋى ءۇشىن قولدان كەلگەننىڭ ءبارىن ىستەگەن. ناۋقاستىڭ قانىن وتتەگىمەن قامتاماسىز ەتەتىن ارنايى قۇرالداردان باستاپ, جۇرەك سوعىسىن رەتتەيتىن ارنايى ماشينالار قولدانعان. الايدا لي ۆەنليان 6 اقپان كۇنى كەشكى 21:30-دا جان تاپسىردى.
قىتاي ۇكىمەتى 2019-nCov ۆيرۋسىنا قارسى قاتاڭ شارالاردى قولعا الدى. ۇكىمەت مەيرامحانالاردا ۇلكەن توپتارمەن جينالۋعا, توي, تۋعان كۇن تويلاۋعا تىيىم سالدى. ال حانچجوۋ مەن نانچان سياقتى ءىرى قالالاردا سىرتقا شىعاتىن ادامداردىڭ سانىنا دا شەكتەۋ قويعان. حۋبەي پروۆينتسياسىندا ليفتىلەردىڭ جۇمىسىن توقتاتىپ تاستاعان.
ناۋقاستار سانىنىڭ كوبەيۋىنە بايلانىستى بيلىك 10 كۇندە 1000 ادامعا ارنالعان اۋرۋحانا سالۋدى تاپسىردى. ۋاقتىلى ورىندالعان تاپسىرما دا جاعدايدى تۇزەمەدى. ۋحان اۋرۋحانالارىندا ورىن جوق, ونىمەن قوسا مەديتسينالىق قۇرالداردىڭ جەتىسپەۋشىلىگى بار. دەگەنمەن ساقتىق شارالارى قولعا الىنعان. الەۋمەتتىك جەلىلەردە مەديتسينا قىزمەتكەرلەرى ۇيلەردى ارالاپ, تۇرعىنداردىڭ قىزۋىن ولشەپ ءجۇر دەگەن حابارلار تاراپ جاتىر. ءتىپتى قالا كوشەلەرىندە ادامداردىڭ جۇرۋىنە رۇقسات جوق دەگەن بەينەجازبالار دا جەلىنى شۋلاتتى.
الەم دە الاڭداۋلى. ويتكەنى شەت مەملەكەتتەر دە كۇن سايىن ازاماتتارىنان 2019-nCov ينفەكتسياسى انىقتالعانىن حابارلاۋدا. دجون حوپكينس ورتالىعىنىڭ ارنايى دەرەككوزىنىڭ اقپاراتىنا سۇيەنسەك, الەم بويىنشا 37 547 ادام ينفەكتسيا جۇقتىرعان. 2701 ادام ەمدەلىپ شىعىپ, 813-ءى قايتىس بولعان. شەت مەملەكەتتەردىڭ ىشىندە سينگاپۋر اۋرۋ جۇقتىرعان ازاماتى ەڭ كوپ مەملەكەت بولىپ وتىر. وندا 40 ادام تىركەلگەن, ال تايلاندتا – 32.
بۇل ۆيرۋس جاپونيانى دا اۋرەگە سالدى. جاپونيا جاعاجايلارىنا كەلەتىن لاينەرلەردە كوروناۆيرۋس جۇقتىرعان ازاماتتار انىقتالۋدا. ماسەلەن, گونكونگتەن شىققان World Dream لاينەرىندە بولعان 3600 جولاۋشىنىڭ ۇشەۋى ۆيرۋس جۇقتىرعان بولىپ شىقتى, تاعى ءبىر لاينەردە 60 ادام باقىلاۋعا الىنعان. ال يوكوگاما جاعاجايىنا كەلە جاتقان The Westerham لاينەرىندە, الدىن الا مالىمەت بويىنشا, 20 ناۋقاستىڭ بارى انىقتالىپ وتىر. جاپونيا پرەمەر-ءمينيسترى سيندزو ابە جولاۋشىلارعا جاعاعا شىعۋعا مۇمكىندىك بەرىلمەيتىنىن حابارلادى.
پەنسيلۆانيا ۋنيۆەرسيتەتىنە قاراستى جۇقپالى اۋرۋلار ورتالىعىنىڭ پروفەسسورى ەليزابەت ماكگروۋ كوروناۆيرۋسكە قارسى ۆاكتسينا ءازىر ويلاپ تابىلمايتىنىن ايتادى. «عاجايىپقا سەنۋدىڭ قاجەتى جوق, ۆاكتسينانى تەز ارادا جاساپ شىعارۋ مۇمكىن ەمەس. بۇل ىندەت كەزىندە شىقپاسا دا, دايىنداپ قويعان ابزال. ال ازىرگە SARS ۆيرۋسىنا قارسى ۆاكتسينانى قولدانعان دۇرىسىراق بولادى», دەدى.
