«جامبىل وبلىسى قورداي اۋدانىندا بولعان كەشەگى ءجايت وزەكتى ورتەيدى. سول كەلەڭسىزدىكتە قازا بولعان جانداردىڭ وتباسىنا قايعىرىپ كوڭىل ايتامىن. مەن بارلىق قازاقستاندىقتاردى سابىر بولۋعا شاقىرعىم كەلەدى. مەملەكەت باسشىسى ق.توقاەۆتىڭ مالىمدەمە جاساعانىن بىلەسىزدەر. بۇل وقيعاعا قاتىستى كىنالى تۇلعالار انىقتالىپ, زاڭعا بايلانىستى ءوز جازالارىن الاتىن بولادى. ارنايى كوميسسيا قۇرىلىپ, بۇل جايسىزدىقتى تولىق باقىلاۋدا ۇستاپ, ءوز شەشىمدەرىن شىعارماق. ەلىمىزدىڭ باستى بايلىعى – ۇلتتار بىرلىگى ەكەنىن ۇمىتپايىق, ەلباسىنىڭ بەيبىتشىلىك پەن تاتۋلىقتى تۋ ەتكەن ساياساتىنىڭ ارقاسىندا وسىنداي بەيبىت كۇندى كەشىپ كەلەمىز ەمەس پە؟!» دەدى دەپۋتات.
ەل بىرلىگىنىڭ ساقتالۋىنا, دارىپتەلۋىنە قازاقستان حالقى اسسامبلەياسىنىڭ دا قوسىپ جاتقان ۇلەسى بار ەكەنىن, وسى سەكىلدى وقيعالاردى تۋدىراتىن ارانداتۋشىلارعا جول بەرمەۋىمىز كەرەك ەكەنىن ايتتى.
«ەلىمىزدىڭ ايرانداي ۇيىعان اۋىزبىرشىلىگىن بۇزۋعا مۇمكىندىك بەرمەۋىمىز قاجەت. بارلىق قازاقستاندىقتاردى سابىرلى بولۋعا شاقىرامىن. وسى جاعدايدى ەسكەرە وتىرىپ, وقيعانىڭ قايتا بولماۋىنىڭ بارلىق امالدارىن جاساۋعا ءتيىسپىز. قوي ۇستىنە بوزتورعاي جۇمىرتقالاعان زاماندا, بىرلىگىمىزدى, بەيبىتشىلىگىمىزدى بۇزۋشىلاردىڭ, ەل ىشىنە ىرىتكى سالۋشىلاردىڭ ارام پيعىلىن كەسەكولدەنەڭ كەسىپ وتىرعان ابزال. تاۋەلسىز قازاقستان شاڭىراعىنىڭ استىندا قازاق, وزبەك, ورىس سەكىلدى جۇزدەن اسا ۇلت- ۇلىستار باياندى عۇمىر كەشىپ كەلەدى.
ول ءبىزدىڭ بىرلىگىمىزدىڭ, ىنتىماعىمىزدىڭ ارقاسى! سول سەبەپتى ارانداتۋعا ەرمەي, بارىنشا سابىرلى بولا بىلەيىك!» دەدى گەننادي شيپوۆسكيح.
