ورتالىقتىڭ قۇرامىنا ەكونوميكا جانە قارجى سالاسى بويىنشا بەلگىلى قازاقستاندىق ساراپشىلار كىرەدى. نەگىزگى ماقساتى – رەفورمالاردى جەدەل جۇزەگە اسىرۋ ءۇشىن ناقتى ۇسىنىستار دايىنداۋ.
جاڭا ورتالىق باسشىسى تيمۋر سۇلەيمەنوۆ 1978 جىلى 5 ساۋىردە دۇنيەگە كەلگەن. 2000 جىلى پاۆلودار مەملەكەتتىك ۋنيۆەرسيتەتىن ءبىتىرىپ, 2002 جىلى «بولاشاق» باعدارلاماسىمەن مەريلەند ۋنيۆەرسيتەتىندە ىسكەرلىك اكىمشىلەندىرۋ ماگيسترى ماماندىعى بويىنشا ءبىلىم العان. ءار جىلدارى ەكونوميكا جانە بيۋدجەتتىك جوسپارلاۋ ۆيتسە-ءمينيسترى, ەكونوميكالىق دامۋ جانە ساۋدا ۆيتسە-ءمينيسترى, ۇلتتىق ەكونوميكا ءمينيسترى قىزمەتىن اتقاردى. 2019 جىلدىڭ ناۋرىزىندا ۇلتتىق بانك توراعاسىنىڭ ورىنباسارى بولىپ تاعايىندالىپ, كوپ ۇزاماي پرەزيدەنتتىڭ كومەكشىسى بولدى.
ەسكە سالا كەتسەك, بيىل 24 قاڭتاردا وتكەن ۇكىمەتتىڭ كەڭەيتىلگەن وتىرىسىندا پرەزيدەنت قاسىم-جومارت توقاەۆ الەۋمەتتىك-ەكونوميكالىق رەفورمالاردى تالداۋ جانە مونيتورينگتەۋ ورتالىعىن قۇرۋ تۋرالى ايتقان بولاتىن.
«بۇل جاريالانعان رەفورمالاردىڭ ورىندالۋىن باقىلاۋ ءالسىز. ۇكىمەت رەفورمالاردى ازىرلەپ, ولاردى جۇزەگە اسىرۋدا جانە ونىڭ جۇمىسىنىڭ ساپاسىن باعالايدى. جاعدايدى وزگەرتۋ قاجەت. پرەزيدەنت اكىمشىلىگىنىڭ جانىنان الەۋمەتتىك-ەكونوميكالىق رەفورمالاردى تالداۋ جانە باقىلاۋ ورتالىعىن قۇرۋدى تاپسىرامىن. ورتالىق ەرىكتى نەگىزدە جۇمىس ىستەيدى, وعان پرەزيدەنت اكىمشىلىگىنىڭ قىزمەتكەرلەرىنەن بولەك عىلىمي جانە ساراپتامالىق قاۋىمداستىق وكىلدەرى كىرەدى» دەگەن بولاتىن مەملەكەت باسشىسى.
قاسىم-جومارت توقاەۆتىڭ ايتۋىنشا, بۇل ينستيتۋت دامىعان سايىن پرەزيدەنت جانىنداعى رەفورما اگەنتتىگىنە اينالۋى مۇمكىن. بۇل ۋاقىتتا ورتالىق ەشقانداي بيۋدجەتتىك شىعىندارسىز قۇرىلادى.
