يگى شاراعا الماتى قالاسىنان وداقتىڭ باسقارما توراعاسى ءجۇرسىن ەرمان, Nur Otan پارتياسى ورتالىق اپپاراتى ساياسي جۇمىس دەپارتامەنتىنىڭ ديرەكتورى ەرلان قارابالاەۆ, Nur Otan پارتياسى ورتالىق اپپاراتى ساياسي جۇمىس دەپارتامەنتىنىڭ باس كونسۋلتانتى ەركەبۇلان جاۋلىباەۆ ارنايى قاتىسىپ, ءوز قۇتتىقتاۋلارىن ءبىلدىرىپ, فيليالدى رەسمي تۇردە اشىپ بەردى.
جيىنعا نۇر-سۇلتان قالاسىنداعى اعا بۋىن مەن جاس ايتىسكەرلەر تۇگەل قاتىستى. ءجۇرسىن ەرمان بۇل فيليالدىڭ اشىلۋىن تاريحي وقيعا دەپ اتادى. اشىلۋ سالتاناتى ءارى قاراي دوڭگەلەك ۇستەلمەن جالعاسىپ, الداعى جىلعا جوسپارلانىپ وتىرعان ايتىستار جايلى تالقىلاۋ ءوتتى. قوناقتاردى قازاقستان جازۋشىلار وداعى نۇر-سۇلتان قالالىق فيليالىنىڭ ديرەكتورى, ايتىسكەر اقىن داۋلەتكەرەي كاپ ۇلى عيماراتتا ورنالاسقان كىتاپحانا, وقۋ, دەمالىس بولمەلەرىمەن تانىستىردى.
فيليال توراعاسى بولىپ اعا بۋىن ايتىسكەرلەرىنىڭ ءبىرى, فيلولوگيا عىلىمدارىنىڭ كانديداتى, دوتسەنت, سەرىكزات دۇيسەنعازى تاعايىندالدى.
وداقتىڭ باسقارما توراعاسى ءجۇرسىن ەرمان بۇل فيليال نۇر-سۇلتان قالاسىنىڭ اقىندارى مەن قوناقتارىنىڭ ماڭداي تىرەيتىن ەكىنشى ءۇيى بولاتىنىن ايتىپ, اقىندارعا اق باتاسىن بەردى.
