يران ادىلەت مينيسترلىگىنىڭ وكىلى گولام حۋسسەين ەسمايلي اتالعان اپاتقا قاتىسى بار دەگەن كۇدىكتىلەردىڭ ۇستالىپ, تەرگەۋدىڭ باستالىپ كەتكەنىن مالىمدەدى. دەگەنمەن, قانشا ادامنىڭ جانە ناقتى كىمدەردىڭ جاۋاپقا تارتىلعانى تۋرالى اقپارات بەرمەدى. مەملەكەت باسشىسى حاسان روۋحاني حالىققا تەلە-جولداۋىندا مۇنداي اپاتقا ءبىر ادامنىڭ كىنالى بولۋى مۇمكىن ەمەس ەكەنىن ايتتى. سونىمەن بىرگە يران ۇكىمەتىنىڭ حالىقتىڭ جانە اپاتتا جاقىندارىن جوعالتقان ءار وتباسىنىڭ الدىندا جاۋاپتى ەكەنىن دە ەسكەردى.
ۋكراينا پرەزيدەنتى ۆلاديمير زەلەنسكي ءوز كەزەگىندە يران ۇكىمەتى ۇسىنعان 80 مىڭ اقش دوللارىنىڭ از ەكەنىن, بۇدان كوپ قاراجات تالاپ ەتەتىنىن ايتتى. سونىمەن بىرگە ۇشاقتىڭ «قارا جاشىگىن» وقۋ ءۇشىن ۋكراينالىق مامانداردى يرانعا جىبەرۋ «قارا جاشىكتىڭ» ۋكرايناعا قايتارىلماۋىنا الىپ كەلۋى مۇمكىن دەگەن كۇدىگىن دە جاسىرمادى. «ولار ونى يراندا وقىپ, ۋكرايناعا قايتارۋدىڭ قاجەتى جوق دەگەن تۇجىرىمعا كەلۋى مۇمكىن. ءبىز «قارا جاشىكتى» ءوزىمىز العىمىز كەلەدى, ونى ءوزىمىز وقىماقپىز. بۇل تۋرالى يران جاعىنا دا ايتتىق», دەدى ۆ.زەلەنسكي.
ۋكراينا پرەزيدەنتىنىڭ سوزىنە سۇيەنسەك, يران مەملەكەتىنىڭ باسشىسى حاسان رۋحاني ۋكراينا وكىلدەرىنىڭ اپاتتىڭ سەبەبىن انىقتاۋ جۇمىستارىنا قاتىستىرىلاتىنىن ايتقان. «سوندىقتان يرانعا بارعان جاعدايدا قانداي دا ءبىر كۇمان تۋسا, ۋكرايناعا «جاشىكپەن» قايتاتىنىمىزعا سەنىمدى بولۋىمىز كەرەك», دەيدى ۋكراينا پرەزيدەنتى.
ۆ.زەلەنسكيدىڭ وسىنشا سەنىمدى بولۋىنا ۇشاقتىڭ قۇلاۋ سەبەبىن يران ءاۋ باستان ءبىلدى دەگەن اقپارات تا سەبەپ بولىپ وتىر. ء«بىزدىڭ قولىمىزدا يراندىق Aseman Airlines اۋە كومپانياسىنىڭ ۇشقىشى مەن اەروپورت ديسپەتچەرىنىڭ اڭگىمەسىنىڭ جازباسى بار. ول جەردە ۇشاقتىڭ قۇلاۋىنا راكەتا سەبەپ بولعانى انىق ايتىلعان. يران مۇنى ءبىلىپ, بىزگە ايتپادى. سوتتا ۋكراينا جەڭەتىنىنە سەنىمدىمىن», دەپ تۇيىندەدى ۆ.زەلەنسكي. ۋكراينا تاراپى يراننان رەسمي كەشىرىم سۇراۋدى, اپاتتىڭ جاۋاپكەرشىلىگىن ءوز موينىنا الۋدى, جاپا شەككەندەرگە وتەماقى تولەۋدى تالاپ ەتىپ وتىر.
يراننىڭ ازاماتتىق اۆياتسيا ۇيىمى تەرگەۋ ءبولىمىنىڭ باسشىسى حاسان رەزايەفار جازبالاردىڭ تارالۋى, باق-تا جاريالانۋى ەكى ەل اراسىنداعى سەرىكتەستىككە كەرى اسەر ەتەتىنىن ايتتى. «بۇل اپات ورنىندا جۇمىس ىستەپ جاتقان ساراپشىلارعا ارنالعان جازبا ەدى. ونى كوپشىلىككە ۇسىنۋ حالىقارالىق نورمالارعا قارسى. سوندىقتان يران بۇدان بىلاي ۋكرايناعا اقپارات بەرۋدەن باس تارتادى», دەدى.
ەستەرىڭىزدە بولسا, ءدال سول كۇنى, ياعني 8 قاڭتاردا اقش يراننىڭ يراكتاعى اسكەري بازاسىنا راكەتا جىبەرگەن ەدى. يران ۇكىمەتى اپاتتى وسى وقيعامەن بايلانىستىرىپ, يران اسكەرى ۇشاق اپاتىنا ادامي فاكتور سەبەپ بولعانىن حابارلاعان. ولار ۋكراينالىق لاينەردى اقش راكەتاسى ساناپ, نىساناعا العانىن مالىمدەگەن بولاتىن. ودان كەيىن وقيعا ورنىندا راكەتا قالدىقتارى تابىلىپ, ۇشاقتى راكەتا قۇلاتتى دەگەن حابار تاراي باستادى. بريتانيا پرەمەر-ءمينيسترى بوريس دجونسون مەن كانادا ۇكىمەت باسشىسى دجاستين تريۋدو سول كۇنى-اق ۇشاق اپاتىنا راكەتا سەبەپ دەگەن تۇجىرىممەن كەلىسەتىنىن مالىمدەدى. اقش پرەزيدەنتى دونالد ترامپ بۇل وقيعاعا كۇمانمەن قارايتىنىن جەتكىزدى. ترامپ «ۇشاقتىڭ تەحنيكالىق قاتەدەن قۇلاۋى ەكىتالاي. ول قاتە جەردەگىلەردەن بولسا كەرەك», دەپ جازدى. كەلەسى كۇنى ۋكراينالىق ساراپشىلار دا راكەتانى قۇلاتقانىنا دالەلدەر تاپتى. الايدا يران ۇكىمەتى بۇل اقپاراتتى تەك 11 قاڭتاردا راستادى. سول كەزدە يران پرەزيدەنتى حاسان رۋحاني ۇشاق اپاتىن «كەشىرىلمەس قاتە» دەپ باعالاپ, مەملەكەت قاجەتتى شارالار قولداناتىنىن ايتقان بولاتىن.
