مينيسترلىكتىڭ مالىمدەۋىنشە, 2014 جىلدان باستاپ 2020 جىلدىڭ 1 قاڭتارىنا دەيىن ارمەنيا مەن قىرعىزستاندا تىركەلگەن اۆتوموبيلدەردى قازاقستانعا كەدەندىك باج بەن سالىق تولەمەي كىرگىزۋ تەك سول ەلدەردىڭ ازاماتتارىنا عانا رۇقسات ەتىلگەن. ال ودان وزگەلەرى بارلىق كەدەندىك جانە ۋتيليزاتسيالىق تولەمدى, سالىقتى تولەپ, تىركەتۋى كەرەك. بۇلاي بولماعان جاعدايدا ەل اۋماعىنان شىعارىلاتىنى حابارلاندى.
ەلىمىزدە 170 مىڭعا تارتا شەتەلدەن اكەلىنگەن كولىكتىڭ بولۋى, باسقا دا تۇسىنبەۋشىلىك حالىقتى الاڭداتتى. وسى ماسەلەگە قاتىستى رەسمي ورگان وكىلدەرى, ساراپشىلار, ۇكىمەتتىك ەمەس ۇيىم وكىلدەرى ءوز پىكىرلەرىن ءبىلدىرىپ, ماسەلەنى شەشۋگە قاتىستى ۇسىنىستارىن دا ايتتى.
دەرەكتەرگە سۇيەنسەك, شەتەلدەن اكەلىنگەن كولىكتەردىڭ 1884 جول وقيعاسىنا قاتىسى بار. ونىڭ سالدارىنان 132 ادام قايتىس بولىپ, 500-دەن استام ادام جاراقات العان. 2019 جىلى بەينەكامەرالار 1,1 ملرد تەڭگەدە كولەمىندەگى 90 مىڭنان استام زاڭ بۇزۋشىلىق تىركەدى. اتالىنعان اۆتوكولىكتەردىڭ قازاقستاندىق تىركەۋى بولماعاندىقتان, سالىنعان ايىپپۇلداردى تولەتۋ مۇمكىن ەمەس.
ۇكىمەتتىڭ كەڭەيتىلگەن وتىرىسىندا وسى ماسەلەگە قاتىستى پرەزيدەنت ءوز ويىن ءبىلدىرىپ, باس پروكۋراتۋراعا «ماسەلەنى شەشۋ ءۇشىن ۇكىمەت ءبىر اي ىشىندە ءبىر رەتتىك تارتىپپەن 2020 جىلدىڭ 1 اقپانىنداعى جاعداي بويىنشا قازاقستان ازاماتتارىنىڭ ەەو-دان جەكە پايدالانۋ ءۇشىن اكەلىنگەن اۆتوكولىكتەردى ۋاقىتشا تىركەۋدى قامتاماسىز ەتۋى كەرەك», دەپ تاپسىرما بەردى.
بۇل شەشىم پرەزيدەنتتىڭ قوعامداعى تۇيتكىل ماسەلەلەردى ءاردايىم نازارىندا ۇستايتىنىن كورسەتتى. ويتكەنى كولىكتەردى قازاقستاندىق تىركەۋدەن وتكىزۋ نەمەسە شەتەلگە قايتارۋعا ءبىر جىل مەرزىم بەرىلۋى اۆتوكولىك يەلەرى ءۇشىن ۇلكەن مۇمكىندىك.
الماس ارزىقۇلوۆ,
پرەزيدەنت جانىنداعى قازاقستان ستراتەگيالىق زەرتتەۋلەر ينستيتۋتىنىڭ جەتەكشى عىلىمي قىزمەتكەرى
