پرەمەر-ءمينيستردىڭ ورىنباسارى ر. سكليار جانە «اتامەكەن» ۇكپ باسقارما توراعاسى ا. مىرزاحمەتوۆ «قاراپايىم زاتتار ەكونوميكاسى» سالالارىن, جەرگىلىكتى قامتۋدى جانە يمپورتتى الماستىرۋدى دامىتۋ بويىنشا اتقارىلىپ جاتقان جۇمىستار تۋرالى باياندادى.
وسى جىلدىڭ 31 قاڭتارىنداعى جاعداي بويىنشا «قاراپايىم زاتتار ەكونوميكاسىن» جەڭىلدەتىلگەن نەسيەلەۋ باعدارلاماسى بويىنشا 236 ملرد تەڭگە سوماسىنا 993 جوبا (اوك – 700, وڭدەۋ سەكتورى – 210, اوك قايتا وڭدەۋ – 83) ماقۇلداندى. ەكىنشى دەڭگەيلى بانكتەردىڭ قاراۋىندا 201 ملرد تەڭگەگە 295 جوبا جاتىر. وسىلايشا, جاقىن ارادا جالپى سوماسى 437 ملرد تەڭگەنى – 72,7% يگەرۋ بولجانىپ وتىر.
2019 جىلدىڭ ەكىنشى جارتى جىلدىعىندا وتاندىق تاۋار وندىرۋشىلەردە ء(وتو) جەڭىل ونەركاسىپ سالاسىنداعى رەتتەلەتىن ساتىپ الۋلار كولەمى جىلدىڭ ءبىرىنشى جارتىسىمەن سالىستىرعاندا 58%-عا, جيھاز ونەركاسىبىندە 72%-عا ۇلعايدى. قابىلدانعان شارالار سالالاردىڭ ماكروكورسەتكىشتەرىنە وڭ اسەر ەتتى. ماسەلەن, جىل قورىتىندىسى بويىنشا جەڭىل ونەركاسىپتەگى ءوندىرىس كولەمى 7%-عا, نەگىزگى كاپيتالعا سالىنعان ينۆەستيتسيالار 18,7%-عا ءوستى.
بيىل وندىرىستەردى دامىتۋدى قولداۋدىڭ ۇتىمدى قۇرالدارىنىڭ ءبىرى كۆازيمەملەكەتتىك سەكتور مەن ءوتو اراسىنداعى وففتەيك-كەلىسىمشارتتار مەحانيزمى بولادى.
جوبالىق وفيس رەتتەلەتىن ساتىپ الۋلاردا 3,9 ترلن تەڭگە سوماسىنا يمپورتتى الماستىرۋ الەۋەتى بار 362 تاۋاردى توپتاستىرىپ, ىرىكتەپ الدى. بۇگىنگى تاڭدا بيزنەس قوعامداستىقپەن بىرلەسىپ يمپورتتى الماستىرۋ بويىنشا 198,6 ملرد تەڭگەگە 70-تەن استام جوبانى پىسىقتاۋ جۇمىستارى باستالدى.
وڭىرلەر بولىنىسىندە جوبالاردىڭ ەڭ كوپ سانى تۇركىستان, اقتوبە, قىزىلوردا, قاراعاندى, شىعىس قازاقستان جانە پاۆلودار وبلىستارىندا ۇسىنىلعان. نۇر-سۇلتان جانە الماتى قالالارى, اتىراۋ جانە ماڭعىستاۋ وبلىستارى بويىنشا جوبالار ۇسىنىلماعان.
وتىرىسقا قاتىسۋشىلار اعاش وڭدەۋ, جيھاز, حيميا, توقىما, اياق كيىم جانە باسقا سالالارداعى يمپورتتى الماستىرۋ جونىندەگى بىرقاتار ناقتى جوبالاردى قارادى.
مەملەكەتتىك قولداۋ الاتىن بيزنەسكە ءار سۋبەكت بويىنشا مونيتورينگ جۇرگىزۋگە مۇمكىندىك بەرەتىن «ونەركاسىپ» اقپاراتتىق جۇيەسىن دامىتۋ جونىندەگى جۇمىس بارىسى تالقىلاندى.
ۇكىمەت باسشىسى يمپورتتى الماستىرۋ جانە ەكسپورتتى ىلگەرىلەتۋ بويىنشا بەلسەندى جۇمىستى جالعاستىرۋدى تاپسىردى.
