دەنساۋلىق ساقتاۋ ءمينيسترى ەلجان ءبىرتانوۆتىڭ اقپاراتى بويىنشا ۆەدومستۆودا اقپارات جيناۋ بويىنشا جەدەل شتاب قۇرىلعان.
«ونىڭ بازاسىندا ينفەكتسيا تارالۋىنىڭ الدىن الۋ بويىنشا حالىققا تاۋلىك بويى Call-Center جۇمىس ىستەيدى. قوسىمشا اۋرۋحانالار اشىلىپ, مەديتسينا قىزمەتكەرلەرى وقىتىلدى. قاجەتتى دارىلىك زاتتار مەن مەديتسينالىق بۇيىمدار قورى قۇرىلدى. قازاقستاندا جۇرگىزىلىپ جاتقان بارلىق شارا دۇنيەجۇزىلىك دەنساۋلىق ساقتاۋ ۇيىمىنىڭ ۇسىنىستارىنا تولىعىمەن سايكەس كەلەدى. وسىلايشا ەلىمىزدە كوروناۆيرۋستىق ينفەكتسيانىڭ تارالۋىنا جول بەرمەۋ جونىندەگى ءىس-شارالار جوسپارى ازىرلەندى. بارلىق مەملەكەتتىك ورگاندى قاتىستىرا وتىرىپ, ۆەدومستۆوارالىق شتاب قۇرىلدى. بەكىتىلگەن جوسپارعا سايكەس قازاقستاننىڭ قىتايمەن مەملەكەتتىك شەكاراسىن كەسىپ ءوتۋ پۋنكتتەرىندە سانيتارلىق-ەپيدەميولوگيالىق باقىلاۋ كۇشەيتىلدى. بۇگىندە مەديتسينالىق ۇيىمدار العاشقى مەديتسينالىق-سانيتارلىق كومەكپەن كەلگەن ازاماتتاردىڭ 80%-ىن قامتىدى, 66 ادام كوروناۆيرۋستىق ينفەكتسياعا كۇدىكتى ۆيرۋستى ينفەكتسيامەن اۋرۋحاناعا جاتقىزىلدى, ونىڭ 25-ءىنىڭ جاعدايى جاقسارىپ, دياگنوزى الىنىپ تاستالدى. 41 ناۋقاس دياگنوستيكالىق زەرتتەۋ ءۇشىن مەديتسينالىق مەكەمەلەردەگى تەكسەرىلۋىن جالعاستىرادى. بارلىق پاتسيەنتتەردىڭ دەنساۋلىعى تۇراقتى, ەمدەلۋشىلەردىڭ جاعدايى ناشارلاعان جوق. بۇدان باسقا, كوروناۆيرۋستىق ينفەكتسياعا كۇدىكتى پاتسيەنتتەرمەن بايلانىستا بولعان 3 914 ادام باقىلاۋعا الىندى. وسى ادامدارعا 14 كۇن ىشىندە باقىلاۋ جۇرگىزىلەدى», دەدى ە.ءبىرتانوۆ.
اتالعان ۆەدومستۆو مەملەكەتتىك شەكاراداعى بارلىق وتكىزۋ پۋنكتىندە قحر-مەن عانا ەمەس, سونىمەن قاتار بارلىق باسقا مەملەكەتتەرمەن كۇشەيتىلگەن سانيتارلىق-وتكىزۋ باقىلاۋىن قامتاماسىز ەتەدى. دەنساۋلىق ساقتاۋ مينيسترلىگى قازاقستان ازاماتتارىنا قىتايعا, سونداي-اق كوروناۆيرۋستىق ينفەكتسيانى جۇقتىرۋ جاعدايلارى تىركەلگەن باسقا ەلدەرگە بارماۋعا كەڭەس بەرەدى.
ايتا كەتەتىن تاعى ءبىر جايت, دەنساۋلىق ساقتاۋ مينيسترلىگىنىڭ facebook الەۋمەتتىك جەلىسىندە جاريالاعان مالىمەتى بويىنشا قحر مەن شەكارالاس مەملەكەتتەردەن كەلگەن ازاماتتارعا مونيتورينگ جالعاسۋدا. ماسەلەن, 2020 جىلدىڭ 6 قاڭتارىنان 1 اقپان ارالىعىندا ەلىمىزگە 27 مىڭ 53 ادام كەلگەن.
«دەنساۋلىق ساقتاۋ مينيسترلىگى تاۋارلار مەن قىزمەتتەردىڭ ساپاسى مەن قاۋىپسىزدىگىن باقىلاۋ كوميتەتىنىڭ سانيتارلىق-كارانتيندىك پۋنكتتەرىنىڭ ماماندارى الماتى قالاسىنداعى حالىقارالىق اۋەجايدا – 20 مىڭ 490 ادامدى, تەمىر جول ۆوكزالدارىندا 399 جولاۋشىنى تەكسەردى. جرۆي بەلگىلەرىمەن 78 ادام كوپشىلىكتەن وقشاۋ اۋرۋحاناعا جاتقىزىلدى, ونىڭ 32-ءسى جازىلىپ شىقتى, قازىر ستاتسيونارلاردا مەديتسينالىق باقىلاۋدا 46 ادام قالدى. اۋرۋحاناعا جاتقىزىلعانداردىڭ بارلىعىنىڭ سىناماسى قوسىمشا باقىلاۋ ءۇشىن الماتىداعى ايقىمباەۆ اتىنداعى اسا قاۋىپتى جۇقپالى اۋرۋلاردىڭ ۇلتتىق عىلىمي ورتالىعىنا جىبەرىلدى. بۇل ورتالىق جاڭا كوروناۆيرۋستى پتر-دياگنوستيكالاۋ ادىستەمەسىن يگەرگەن. رەسپۋبليكادا تەراپيا ءۇشىن قاجەتتى ءدارى-دارمەك پەن مەديتسينالىق بۇيىمدار بار, جۇقپالى اۋرۋحانالاردى وقشاۋلاۋعا ارنالعان بوكستار, ارنايى دارىگەرلىك جانە ورتا مەديتسينالىق پەرسونال دايىندالعان. بۇل جاعداي – دەنساۋلىق ساقتاۋ مينيسترلىگىنىڭ تۇراقتى باقىلاۋىندا. رەسمي اقپاراتتى دەنساۋلىق ساقتاۋ مينيسترلىگىنىڭ سايتى مەن پاراقشاسىنان وقي الاسىز جانە كەز كەلگەن سۇراق بويىنشا تاۋلىك بويى جۇمىس ىستەيتىن 1406 بايلانىس-ورتالىعىنا قوڭىراۋ شالۋعا بولادى», دەلىنگەن جازبادا.
