جيىندا قازاقستاننىڭ «اقىلدى» تەحنولوگيالاردى ەنگىزۋ سالاسىنداعى جەتىستىكتەرى, Big Data-نى ءتيىمدى قولدانۋ پەرسپەكتيۆالارى جانە جاساندى ينتەللەكت سالاسىن ودان ءارى دامىتۋ ماسەلەلەرى تالقىلاندى.
كەڭەس ساراپشىلارى جاساندى ينتەللەكتتى دامىتۋ – ۋاقىت تالابى دەگەن ۇستانىممەن وسى باعىتتاعى جۇمىستى مەملەكەتتىك جانە جەكە سەكتور بىرلەسە وتىرىپ, كيبەرقاۋىپسىزدىككە ەرەكشە نازار اۋدارۋى ءتيىس دەگەن ورتاق پىكىرگە كەلدى. وتىرىس قورىتىندىسىندا وسى جانە باسقا دا بىرقاتار ناقتى ۇسىنىستار ءبىر قۇجاتپەن راسىمدەلدى.
«حالىقارالىق ساراپشىلار كەڭەسىنىڭ جۇمىسى ءبىز ءۇشىن وتە ماڭىزدى. وسى كەڭەس جۇمىسىنىڭ بارىسىندا ايتىلعان باستامالاردىڭ بىرقاتارىن جۇزەگە اسىردىق جانە بۇگىنگى كۇنى بۇل جوبالار بىزگە ەلىمىزدە تسيفرلاندىرۋدى بەلسەندى تۇردە ىلگەرىلەتۋگە كومەكتەسەدى. وسى جولى دا, سىزدەردىڭ تاراپتارىڭىزدان ايتىلعان ۇسىنىستاردىڭ بارلىعىن مۇقيات ساراپتاپ, باسىم بولىگىن ىسكە اسىراتىنىمىزعا سەنىمدىمىن», دەپ اتاپ ءوتتى اسقار جۇماعاليەۆ.
بۇل كەڭەستىڭ توعىزىنشى وتىرىسى جانە قازاقستاندا جۇزەگە اسىرىلعان كوپتەگەن تسيفرلىق شەشىمدەر وسى حسك وتىرىستارىندا ۇسىنىلعانىن ايتىپ ءوتۋ كەرەك. مىسالى, "Smart Data Ukimet", "Smart Bridge", پرواكتيۆتى قىزمەتتەردى ەنگىزۋ, بالا تۋى بويىنشا جانە ت.ب. قىزمەتتەر مەن جوبالار.
ءدال وسى كۇنى اسقار جۇماعاليەۆ بىرقاتار ەكىجاقتى كەلىسسوزدەر جۇرگىزدى, ونىڭ ىشىندە ۇلىبريتانيانىڭ مەملەكەتتىك تسيفرلىق قىزمەتىنىڭ ديرەكتورى (GDS) – كريس فەرگيۋسونمەن جانە «Amazon Web Services» ۇكىمەتتى ترانسفورماتسيالاۋ جونىندەگى ديرەكتورى ل. ماكسۆەللمەن كەزدەسۋلەر وتكىزدى. تاراپتار بىرلەسكەن جاڭا "اقىلدى" جوبالاردى قۇرۋ, تسيفرلىق ەكونوميكا ءۇشىن بىلىكتى كادرلار دايارلاۋ جانە ەلەكتروندىق ۇكىمەتتى ودان ءارى دامىتۋ ماسەلەلەرىن ەگجەي-تەگجەيلى تالقىلادى.
