ايتا كەتسەك, بىلتىردان بەرى قازاقستانعا چەح رەسپۋبليكاسىنان اۋىل شارۋاشىلىق جانۋارلارىن (تىرىدەي) كىرگىزۋگە ۋاقىتشا شەكتەۋ قويىلعان. زاڭدى بۇزعان كاسىپكەرلەرگە ءىرى قارانى جونەلتۋشى ەلگە قايتا قايتارۋ تۋرالى نۇسقاۋ بەرىلدى.
اۋىل شارۋاشىلىعى مينيسترلىگىنىڭ ۆەتەريناريالىق باقىلاۋ جانە قاداعالاۋ كوميتەتى قازاقستاندىق «اگرو-كومپلەكس-سۋلىشوك» كومپانياسىنا سلوۆاكيادان 50 باس اسىل تۇقىمدى ءىرى قارا مالىن (SEVITA s.r.o. - جۇك جونەلتۋشى) يمپورتتاۋعا ۆەتەرينارلىق رۇقسات بەرگەن بولاتىن.
الايدا قۇجاتتاردى, ونىڭ ىشىندە 2019 جىلعى 8 قازانداعى SVS /2019/120824- J ۆەتەرينارلىق سەرتيفيكاتىن تەكسەرۋ بارىسىندا جانۋارلاردىڭ شىققان ەلى چەح رەسپۋبليكاسى ەكەنى انىقتالدى. ال چەح رەسپۋبليكاسىنىڭ ۋاكىلەتتى ورگاندارى بىرنەشە رەت جالعان ۆەتەريناريالىق سەرتيفيكاتتار مەن كۋالىكتەر بەرۋ ارقىلى قاراپايىم جانۋارلاردى «اسىل تۇقىمدى» مال رەتىندە ەكسپورتتاۋ فاكتىلەرى تىركەلگەن بولاتىن. بۇل جاعداي بويىنشا قازىرگى ۋاقىتتا سوت پروتسەستەرى ءوتىپ جاتىر.
چەح رەسپۋبليكاسىنان جانۋارلاردى اكەلۋگە شەكتەۋ قويىلۋىنا بايلانىستى اشم ۆەتەريناريالىق باقىلاۋ جانە قاداعالاۋ كوميتەتىنىڭ سولتۇستىك قازاقستان وبلىستىق اۋماقتىق ينسپەكتسياسى «اگرو-كومپلەكس-سۋلىشوك» جشس باسشىلىعىنا جانۋارلاردى جونەلتۋشى ەلگە قايتا قايتارۋ قاجەتتىلىگى تۋرالى نۇسقاۋ بەردى.
