ايماقتار • 28 قاڭتار، 2020

جامبىلعا قىتايدان كەلگەن 37 ادام قاتاڭ مەديتسينالىق باقىلاۋدا

63 رەتكورسەتىلدى

قىتايدان شىققان كوروناۆيرۋستىق ينفەكتسيا بۇكىل الەمدى دۇرلىكتىرۋدە. قاۋىپتى كەسەلدىڭ الدىن الۋ ماقساتىندا ەلىمىزدە دە جان-جاقتى ساقتىق شارالارى جۇرگىزىلۋدە. جامبىل وبلىسىنىڭ اۋماعىندا دا سانيتاريالىق-ەپيدەمياعا قارسى جانە سانيتاريالىق-پروفيلاكتيكالىق ءىس-شارالاردى كۇشەيتۋ ماقساتىندا جۇمىستار اتقارىلۋدا.

جامبىل وبلىستىق دەنساۋلىق ساقتاۋ باسقارماسىنىڭ حابارلاۋىنشا، بۇگىندە وبلىستىق بالالار جۇقپالى اۋرۋلار اۋرۋحاناسى مەن اۋداندىق ورتالىق اۋرۋحانالارىنىڭ ينفەكتسيالىق بولىمشەلەرىندە 503 توسەك بار. ونىڭ 185-ءى ەرەسەكتەرگە ارنالعان بولسا، 318-ءى بالالارعا ارنالعان. قوسىمشا تاعى 333 توسەك قاراستىرىلىپ، دايىندالعان.

مەديتسينالىق ۇيىمدار جەكە باس قورعانىس كيىمدەرىمەن، ۆيرۋسقا قارسى پرەپاراتتار  مەن ءۆيرۋتسيليدتى دەزينفەكتسيالىق زاتتاردىڭ قورىمەن قامتاماسىز ەتىلگەن. وباعا قارسى 1826 دانا 1 تيپتىك كوپ رەتتىك كوستيۋم، 9942 دانا ءبىر رەتتىك قورعانىس كوستيۋم، 2717 قاپتاما تاميفليۋ، 49 قاپتاما رەلەنزا، 960 قاپتاما وكسالين جاقپامايى دايىندالعان. 

سونىمەن قاتار، وبلىستا مەديتسينا قىزمەتكەرلەرىنىڭ اراسىندا بەلگىسىز پنەۆمونيانىڭ دياگنوستيكاسى، ەمدەۋ جانە الدىن الۋ تۋرالى كەڭەس-سەمينارلار ۇيىمداستىرىلدى. بارلىعى 45 سەمينار ءوتىپ، وعان 3226 مەديتسينا قىزمەتكەرلەرى قامتىلدى. جەرگىلىكتى قۇزىرلى مەكەمەلەر ماماندارىنىڭ قاتىسۋىمەن «اۋليە اتا» اۋەجايىندا بەلگىسىز پنەۆمونيانىڭ اكەلىنۋى مەن ونىڭ تارالۋىنىڭ الدىن الۋ، ءبىرىنشى كەزەكتەگى شارالاردى ۇيىمداستىرىپ وتكىزۋ بويىنشا وقۋ-جاتتىعۋ ساباعى ءوتتى. ەمدەۋ مەكەمەلەرىنىڭ، ونىڭ ىشىندە جەدەل مەديتسينالىق جاردەم ستانتسياسىنىڭ مەديتسينا قىزمەتكەرلەرى اراسىندا بەلگىسىز پنەۆمونيانىڭ كۇدىكتى جاعدايلارىن انىقتاۋ، تىركەۋ، ەسەپكە الۋ، شۇعىل حابارلاما جولداۋ، ناۋقاستاردى قابىلداۋ مەن ولارعا جەدەل مامانداندىرىلعان كومەك كورسەتۋ بويىنشا دايارلىعى شىڭدالدى. وبلىستىڭ بارلىق مەديتسينا ۇيىمدارىنىڭ قابىلداۋ بولىمدەرىندە، قاراۋ بولمەلەرىندە، جەدەل مەديتسينالىق جاردەم ستانتسياسىندا مەديتسينا قىزمەتكەرلەرىنە ارنالعان الگوريتمدەر ازىرلەندى.

جامبىل وبلىستىق پوليتسيا دەپارتامەنتى كوشى-قون باسقارماسىنىڭ مالىمەتتەرىنە سايكەس، اعىمدى جىلدىڭ قاڭتار ايىندا قىتاي حالىق رەسپۋبليكاسىنان جامبىل وبلىسىنا 37 ازامات كەلگەن. بۇگىندە ولاردىڭ بارلىعى تۇراقتانعان مەكەن-جايى بويىنشا مەديتسينا قىزمەتكەرلەرىنىڭ قاتاڭ باقىلاۋىندا. قازىرگى تاڭدا 25 ازامات 14 كۇندىك مەديتسينالىق باقىلاۋعا الىنعان. 12 ازامات مەديتسينالىق باقىلاۋدا، شاعىمدارى جوق.

 

جامبىل وبلىسى

سوڭعى جاڭالىقتار

قىلمىستىق ءىس قوزعالدى

ايماقتار • كەشە

باستى اقپارات (21.02.2020)

ۆيدەو • 21 اقپان، 2020

ۇقساس جاڭالىقتار