ەكونوميكا • 28 قاڭتار، 2020

بيىل اقپاندا بانك جۇيەسى اكتيۆتەرىنىڭ ساپاسىن تاۋەلسىز باعالاۋ اياقتالادى - م. ابىلقاسىموۆا

48 رەتكورسەتىلدى

پرەمەر-مينيستر اسقار ءماميننىڭ توراعالىعىمەن وتكەن ۇكىمەت وتىرىسىندا قارجى نارىعىن رەتتەۋ جانە دامىتۋ اگەنتتىگىنىڭ توراعاسى ءمادينا ابىلقاسىموۆا 2020 جىلى 24 قاڭتاردا وتكەن ۇكىمەتتىڭ كەڭەيتىلگەن وتىرىسىندا ايتىلعان تاپسىرمالاردى ىسكە اسىرۋ شارالارى تۋرالى باياندادى. بۇل تۋرالى پرەمەر-ءمينيستردىڭ ءباسپاسوز قىزمەتى حابارلادى.

اتالعان شارالار اياسىنداعى قارجىلىق رەتتەۋشىنىڭ جۇمىس باعىتتارىنىڭ ءبىرى ‒ قارجىلىق تۇراقتىلىقتى قامتاماسىز ەتۋ، ونىڭ ىشىندە بانك جۇيەسىن قالىپقا كەلتىرۋ. م. ابىلقاسىموۆا اتاپ وتكەندەي، بيىل اقپان ايىندا 2019 جىلى باستالعان بانك جۇيەسىنىڭ اكتيۆتەرىنىڭ ساپاسىن تاۋەلسىز باعالاۋ اياقتالادى.

«بانك سەكتورىن قالىپقا كەلتىرۋ بيۋدجەت قاراجاتىن پايدالانباي نارىقتىق جاعدايلاردا پروۆيزيالار مەن كاپيتالدىڭ بارابار قورىن قۇرۋ ارقىلى جالعاسادى»، — دەپ اتاپ ءوتتى ول. 

ونىڭ ايتۋىنشا، ءتيىستى تاسىلدەر بيىلعى جىلدىڭ ءى توقساننىڭ سوڭىنا دەيىن ازىرلەنەدى.

م. ابىلقاسىموۆا سونىمەن قاتار قارجى سەكتورىنىڭ تۇراقتىلىعىن قامتاماسىز ەتۋ ءۇشىن 2020 جىلدان باستاپ جۇيەلى تۇردە تولىق اۋقىمدى نەگىزدە بانك جانە ساقتاندىرۋ سەكتورلارىندا تاۋەكەلگە باعدارلانعان قاداعالاۋ (تبق) ەنگىزىلەتىنىن حابارلادى. تبق قارجىلىق تۇراقتىلىق جونىندەگى كەڭەس اياسىندا اگەنتتىك پەن ۇلتتىق بانكتىڭ بىرلەسىپ جۇرگىزەتىن ماكروپرۋدەنتسيالىق رەتتەۋ شارالارىمەن كۇشەيتىلەدى.

«بانك جۇيەسىن قالىپقا كەلتىرۋ بانكتەردىڭ ەكونوميكانى كرەديتتەۋىن ۇلعايتۋعا ىقپال ەتەتىن بولادى»، — دەدى م. ابىلقاسىموۆا.

سونىمەن بىرگە ول شاعىن جانە ورتا بيزنەستى نەسيەلەندىرۋ مۇمكىندىگىن كەڭەيتۋ ءۇشىن، ونىڭ ىشىندە ەكونوميكانىڭ باسىم سالالارىن نەسيەلەندىرۋ باعدارلاماسى شەڭبەرىندە دە شارالار ۇسىنىلاتىنىن ايتتى.

قارجى نارىعىن رەتتەۋ جانە دامىتۋ اگەنتتىگى قىزمەتىنىڭ تاعى ءبىر باعىتى ‒ كەپىلسىز تۇتىنۋشىلىق نەسيەلەندىرۋدىڭ قارقىندى وسۋىنە جول بەرمەۋ.

م. ابىلقاسىموۆا ەسكە سالىپ كەتكەندەي، بيىلعى 1 قاڭتاردان باستاپ تۇتىنۋشىلىق نەسيە بەرۋدە تاۋەكەلدەردى شەكتەۋ بويىنشا زاڭناما نورمالارى قولدانىسقا ەنگىزىلدى.

«اگەنتتىك تۇتىنۋشىلىق نەسيە بەرۋدىڭ قارقىندى ءوسۋىن شەكتەۋ ءۇشىن قابىلدانعان رەتتەۋشى شارالاردىڭ تيىمدىلىگىنە مونيتورينگتى جالعاستىرادى»، — دەدى ول. 

ونىڭ ايتۋىنشا، اگەنتتىك 2020 جىلعى ءبىرىنشى جارتىجىلدىقتا حالىقتىڭ بورىش جۇكتەمەسىنىڭ شامادان تىس وسۋىنە جول بەرمەۋ ءۇشىن قوسىمشا رەتتەۋشى شارالاردى قابىلدايدى.

«مەملەكەت باسشىسى بۇكىل قارجى سەكتورىن كەشەندى دامىتۋ بويىنشا قويعان جاڭا مىندەتتەردى ەسكەرە وتىرىپ، اگەنتتىك قارجى سەكتورىن دامىتۋدىڭ 2030 جىلعا دەيىنگى تۇجىرىمداماسىن جانداندىرىپ، اعىمداعى جىلعى 1 شىلدەگە دەيىن جاڭا رەداكتسيادا قابىلدايدى»، — دەپ م. ابىلقاسىموۆا قارجى رەتتەۋشىسىنىڭ مەملەكەت باسشىسىنىڭ تاپسىرمالارىن ىسكە اسىرۋ شارالارى شەڭبەرىندەگى قىزمەتىنىڭ كەزەكتى باعىتىن اتاپ ءوتتى.

قارجى نارىعىن رەتتەۋ جانە دامىتۋ اگەنتتىگىنىڭ توراعاسى م. ابىلقاسىموۆا ايتىپ وتكەندەي، قارجى قوعامداستىعىمەن بىرلەسىپ ينۆەستيتسيالاۋدىڭ جانە كاپيتال تارتۋدىڭ قوسىمشا مۇمكىندىكتەرىن جاساۋ ءۇشىن قارجى سەكتورىن دامىتۋ بويىنشا كەشەندى شارالار ازىرلەنەدى.

«ساقتاندىرۋ جانە باعالى قاعازدار نارىعى ماسەلەلەرى بويىنشا جاڭا قارجى قۇرالدارىن رەتتەۋ مەن ازىرلەۋدى جەتىلدىرۋ بولىگىندە قاجەتتى زاڭنامالىق وزگەرىستەر دايىندالادى. ءتيىستى زاڭ جوباسىن ۇكىمەتكە وسى جىلدىڭ سوڭىنا دەيىن ەنگىزۋ جوسپارلانىپ وتىر»، — دەپ تۇيىندەدى م. ابىلقاسىموۆا.

سوڭعى جاڭالىقتار

قىلمىستىق ءىس قوزعالدى

ايماقتار • كەشە

باستى اقپارات (21.02.2020)

ۆيدەو • 21 اقپان، 2020

ۇقساس جاڭالىقتار