قازاقستاندى قازىرگىدەن دە قالاي «تسيفرلاندىرۋعا» بولادى, «تومەننەن - جوعارىعا» باستاماشىلىق ەتەتىن جوبالار نە ءۇشىن قاجەت جانە ءارتاراپتاندىرۋدىڭ ماڭىزدىلىعى نەدە؟ وسى جانە وزگە دە تاقىرىپتار تسيفرلىق دامۋ, يننوۆاتسيالار جانە اەروعارىش ونەركاسىبى ءمينيسترى اسقار جۇماعاليەۆتىڭ پرەزيدەنتتىك جاستار كادرلىق رەزەرۆى مۇشەلەرىمەن كەزدەسۋى بارىسىندا تالقىلاندى. كەزدەسۋگە تسيفرلاندىرۋ جانە IT, بايلانىس, سونداي-اق, عارىشتىق تەحنولوگيالار سالالارىندا جۇمىس ىستەيتىن رەزەرۆشىلەر قاتىستى.
«بۇگىن ءبىز وزدەرىڭىزبەن سىزدەردىڭ يدەيالارىڭىز بەن جوسپارلارىڭىز تۋرالى اڭگىمەلەسۋ جانە ولاردى جۇزەگە اسىرۋ جولدارى مەن مۇمكىندىكتەرىن تالقىلاۋ ءۇشىن كەزدەسىپ وتىرمىز. سىزدەردىڭ ارالارىڭىزدا كەيبىرىن جۇمىسقا قابىلداپ ۇلگەردىك, قازىر 10-عا جۋىق كانديداتتى جاۋاپتى پوزيتسيالارعا تاعايىنداۋ ءۇشىن وقىتىپ جاتىرمىز. جالپى, ءبىز الەۋەتى جوعارى, ءبىلىمدى دە ءورشىل جاستاردى كورىپ وتىرمىز. سوندىقتان سىزدەرگە تسيفرلاندىرۋ, تەلەكوممۋنيكاتسيا جانە عارىش سەكىلدى ماڭىزدى سالالاردا ءوز يدەيالارىڭىزدى جۇزەگە اسىرۋ ءۇشىن جاعداي جاساۋعا دايىنبىز» دەپ اتاپ ءوتتى اسقار جۇماعاليەۆ.
ءمينيستردىڭ ايتۋىنشا, رەزەرۆشىلەر قاتاڭ ىرىكتەۋدەن ءوتتى جانە وسى جولدا جۇمساعان كۇش-جىگەرلەرىنىڭ ارقاسىندا وزدەرىنىڭ جوعارى كاسىبي بىلىكتىلىگىن ەل يگىلىگىنە قولدانۋ ءۇشىن كوپتەگەن جاڭا مۇمكىندىككە قول جەتكىزدى.
ەلىمىزدە 300 ءبىلىمدى جاس ىرىكتەلىپ الىنعان پرەزيدەنتتىك جاستار كادرلىق رەزەرۆى جاساقتالدى. كادرلىق رەزەرۆتى قالىپتاستىرۋ باستاماسى مەملەكەت باسشىسى قاسىم-جومارت توقاەۆتىڭ سايلاۋالدى باعدارلاماسىنىڭ باستى تارماقتارىنىڭ ءبىرى ەدى. جوبانىڭ ماقساتى - جاستار ءۇشىن الەۋمەتتىك ءليفتىنىڭ ۇتىمدى جۇيەسىن قۇرۋ.
